STENBOL - Temsîlkarê rêxistinê cinîyan, reaksîyon vera qerarê Dadgeha Berzî ke derheqê Peymana Stenbolî de dabî, dayî û vatî: "Têkoşîneko enternasyonal asayîşê ma ya tewr pîl o. Ganî têkoşîno hempar bêro pîlkerdiş."

 

Serekkomarê AKPyî Tayyip Erdoganî 20ê Adara 2021î de qerarnameyek vet û Peymana Stenbolî ant. Antişê Peymana Stenbolî hetê Dadgeha Berzî ra ame tesdîqkerdiş. Temsîlkarê rêxistinê cinîyan reaksîyon vera qerarî mojnayî û bale antî serê têkoşînê hempar. 

 

'Hêriş û metodê hêrişan îdeolojîk ê'

 

Aktivîsta Tevgerê Cinîyan ê Azadan (TJA) Aysun Çepere dîyar kerd ke AKP heme wareyan goreyê îdeolojîyê xo şekil dano û vat:  "Hukm zî nê çî ra dûrî nîyo. Ma hemverê nê hêrişan de şaş nêmanenê. Zîhnîyetê bîyaye, cuya hempar û azad înkar keno la ma do cuya hempar û azade awan bikerê. Hêriş û metodê hêrişan ê. Her ca de cinîyê ke edalet gêrenê estê. Keyeyê Şanyaşarî, Nobeta Edaletî, Dayîkê Aştîye, Dayîkê Şemeyî û xeylêk nimûne estê. Qerarê bêhuqûqî yenê girewtiş. Xeta têkoşînêk enternasyonal asayîşîê ma ya tewr pîl a. Ganî têkoşînê hempar bêro pîlkerdiş."

 

'Têkoşînê cinîyan hêvî dano'

Zerrîwaştoxa Mor Çati Elif Ege wina vat: "Ma nê qerarê bêhuqûqî qebûl nêkenê. Embazê ma yê avûkatî waştişnameyê xo de hema qalê Peymana Stenbolî kenê. Çîyo esas têkoşîn û destkewtişê ma yê. Coka no qerar, hêrişê hemverê cinîyan o.  La ma tu wext fek têkoşîn ra vera nêdanê. Têkoşînê cinîyan hêvî dano."

 

'Ma nê qerarî qebûl nêkenê'

 

Sekretera Cinîyan ê Sendîkaya Kedkaran ê Xizmetê Komelî û Weşîye ya Şubeyê Anadoluyî (SES) Hatice Yayla da zanayîş ke no qerar nîno qebûlkerdiş û wina vat: "Ma nê qerarê ke Dadgeha Berzî daya qebûl nêkenê. Ma nê  tahakumê sîstemê serdest ê camêrdan û hukmî yê serê xo qebûl nêkenê. Îqtîdaro bîyaye hema vaje bi 20 serrî yo hêrişê destkewtişê cinîyan keno. Coka ma muhîmî danê têkoşîno hempar."