WAN - Îdarekara Merkezê Pêroyî yê OHDyî Avûkate Ekin Yeter, bale ant tecrîdê serê Rayberê PKKyî Abdullah Ocalanî û wina vat: "Seba ke ma bi hawayêke baş û demokratîk mîyanê nê krîz û kaosî ra vejîyê, problem werte wedaryîyo û no tecrîdo mûtlak ganî lezabez peynî bibo."

 

Serê Rayberê PKKyî Abdullah Ocalanî de bi 23 serrî yo tecrîdêk giran dewam keno. Bi 16 mengî yo zî tu xebere ci ra nîna girewtiş. Derheqê babete de Îdarekarîya Merkezê Pêroyî ya OHDyî Avûkate Ekin Yeter, ercnayîş kerd.

 

'Heqê her hukumwerdeyî/e est o ke pêvînayîş bi avûkatanê xo dir bikero'

 

Ekîne da zanayîş ke astengkerdişê pêvînayîşê bi Abdullah Ocalanî dir huqûqî nîyo û vat: "Tu bingehê hetê qanûnî çin o. Ma wazenê qanûnan bi ca bîyarê. Tecrîdo giran hemverê mevzuatê neteweyî û mîyanneteweyî yo. Seba ke ma bi hawayêke baş û demokratîk mîyanê nê krîz û kaosî ra vejîyê, ganî no problem werte ra wedaryo û no tecrîdo mûtlak ganî peynî bibo."

 

'Cezayê dîsîplînî huqûqî nîyê'

 

Ekîne dîyar kerd ke cezayê dîsîplînî yê serê Abdullah Ocalanî sey bahane yenê mojnayîş û cezayê dîsîplînî huqûqî nîyê. Ekîne wina dewam kerd: "Cezayê dîsîplînî zî ancax goreyê qanûnan bêrê dayîş. Seba kam ci fîîlê Abdullah Ocalanî ceza ame dayîş? Tu bahane seba nê nîno mojnayîş. Tena seba fîîlêk zî cezayêke zêdeyêr xeylêk ceza nêeşkenê bidê. Qedexe seba hukmwerdan yeno dayîş. Hem qedexeyê mektuban, hem zî neqlî seba hukumwerdan est o. Hem bêhuqûqîyêkê hem zî binpaykerdişê heqan est o. Sazgehê mîyanneteweyî zî demêk derg o ke seba na rewşe bêveng o."

 

'Ma tecrîdê Îmraliyî qebûl nêkenê'

 

Ekîne dewam de wina vat: "Seba ke ma şêrê Îmraliyî ma muracatê CPTyî kerdibi. Ma rejîmê tecrîdî yê Îmraliyî qebûl nêkenê. No huqûqî nîyo. Muracatê ke ma kenê meşrû yê. Ma wazenê ganî cewabê nê muracatan bêro dayîş. Tecrîdê Îmraliyî tena serê Abdullah Ocalanî de nîyo, heme zîndanan de vila bîyo. No beno sebebê tecrîdê serê komel û krîzê ekonomîye."