AMED - Nameyê ke wareyê çapemenîya azade de bîya sembole Ayfer Serçe 16 serrî verê dinyaya xo bedilnaye. Embazê aye ke qelama aye erd de nêverdenê, nê adetî dewam kenê.

 

Ayfer Serçe serra 1974ine de Wêranşarê Rihayî de ameye dinya. Ayfere hema ciwanîya xo de waştêne ke biba rojnamegere. 1998ine de mîyanê têkoşînê cinîyanê kurdan de cayê xo girewt. Demêkê derg Tirkîya, Armenîstan û Başûrê Kurdistanî de muxabirî kerd. Dima ra zî verê xo da Rojhelatê Kurdistanî. Mahabat û Urmîye de dest bi cigêrayîşê xokiştişê cinîyan kerd. 19 û 23yê temmuza 2006ine de mintiqaya Kelarêşî ya mabêne sînorê Îran û Tirkîya de netîceyê dafikê arteşa Îranî de ameye qetilkerdiş. Heta roja ewro zî Îranî derheqê Ayfere de xeberêke nêda. Serê kiştişê Ayfere de 14 serrî derbaz bi la heta nika zî nîno zanayîş ke cenazeya aye ça de ya. Neslê dimayê aye adetê çapemenîya azade dewam kenê.  Rojnamegerê cinî, mîrasê Ayfere dewr girewtî û vatişê aye her şert û mercan de anê ziwan. Rojnamegerê cinî teşîrkerdişê kiştişê cinîyan û teşîrkerdişê zîhnîyetê tecawuzkar dewam kenê. Sewbîna rojnamegerê cinî bi JINHAyî dir xeyalê Ayfere bi ca ardî.

 

Destpêkerdişê bi MHAyî ya rojnamegerîye

 

Şilane serê serra 2000î de Ajansê Xeberan ê Mezopotamyayî (MHA) de şixulya. Dimayê ke ajans 2005ine de ame padayîş, eynî serre de Ajansê Xeberan ê Firatî (ANF) de rojnamegerîye xo dewam kerd. Şilane muxabirîya Armenîstanî ya ANFyî kerd û dima ra derbazê Mintiqaya Kurdistanî ya Federe bî. Dima ra zî seba serê kiştişê cinîyan de cigêrayîş bikero û şî bajarê Urmîye û Mahabadî yê Rojhelatê Kurdistanî. 

 

Hetê rejîmê Îranî ra ameye qetilkerdiş

 

Dimayê xebatê cigêrayîşê kiştişê cinîyan ê hîrê hewteyan, Şîlane mabêne temmuza 19-23yî 2006ine de Kelareşî yê serê sînorê Tirkîya-Îranî de hetê artêşa Îranî ra bi defikêke yena qetilkerdiş. Tarîxê qetilkerdişê Şîlane goreyê Rêxistina Rojnamegerê Sînornenas sey 23yê Temmuza 2006ine yeno derbazkerdiş. Goreyê hîn çimeyan zî tarîxê kişyayîşê Şîlane sey 19ê Temmuze derbaz beno.

 

Hema cenazeya aye çin a

 

Pêwa ke serê qetilkerdişê Şîlane yê hetê rejîmê Îranî ra ameye qetilkerdiş 16 serrî derbaz bîyo zî hema derheqê cenazeya Şîlane de tu zanayîş nêameyo girewtiş. Pêwa lebate keyeyî, çapemenîya azade û pawitoxê heqê merdiman, reyna zî  rejîmê Îranî cenazeya Şîlane nêda. 

 

Xeyalê Şîlane bi ca ame

 

Fikrê Şîlane ke waştêne ajansêkê aîdî cinîyan bibo, bi ca ame. 8ê Adara 2012ine de Ajansê Xeberan ê Cinîyan (JINHA) ame awankerdiş. Adetê çapemenîya azade ewro bi JIN NEWS, JIN TV, NEWAYA JIN û Nû Jinhayî de dewam keno. Cinî, bi mîrasê ke Şîlane ra girewtê xo ver danê.

 

Cigêrayîşê ke Şîlane Armenîstan de kerdî 

 

Şîlane Armanîstan de serrê dergî serê kulturê kurdan û cinîyan de cigêrayîş kerd. Her şarêk goreyê înan adetê înan est o. No bi serran o dewam keno. Şîlane zî adetê çapemenîya azade sey mîrasêk bi erc pey xo de verda.