Yara Kendeş

 

KOBANÊ - Girêdayê hêrişê dewleta tirke yê serê Dewa Perexî ya Zaxoyê Başûrê Kurdistanî de cinîyan venga rêxistinê heqê merdiman kerd ke êdî çimanê xo abikerê û wina vat: "Ma rayîr nêdanê faşîzmê mîyanê herra xo û îşxalkerdişê xo hîra keno. Ma do sîne bi sîne hemverê hêrişan de vinderê û tu wext game peyser nêerzê."

 

20ê Temmuze de dewleta tirke Dewa Perexî ya ke serê qezaya Zaxoyî ya Mintiqaya Kurdistanî de ya, wareyê seyrangehî topvaran kerdebî û netîceyê nê topvaranî de yew ci ra pitik, 9 turîstî dinyaya xo bedilnabî û 29 kesî zî birîndar bibî. Reaksîyonî hemverê hêrişan de dewam kenê. Cinîyê Rojawanê  Kurdistanî derheqê hêrişan de reaksîyon ramojnayî û fikrê xo ardî ziwan.

 

'Bi hêrişan wazenê averşîyayîş û hêzê pîlî werte ra wedarnê'

 

Hemsereka Partîya Yewîya Demokratîke (PYD) ya qezaya Şêranî Fatime Osman dîyar kerd ke dewleta tirke bi hêrişan wazena ke zorê hêzê pîlî bero û wina vat: "Hêrişê AKP û PDKyî yê serê Başûrê Kurdistanî roja ewro ra nîyo. Ê her wext bi nê rengî hêrişan serê mintiqa de kenê. Her tim hêrişê xo serê Şengal û cayê Kurdistanî de kenê. No zî seba dewleta tirke beno firsendêk ke hêrişê Rojawanê Kurdistanî bikero. Bi hêrişan wazenê averşîyayîş û hêzê pîlî werte ra wedarnê."

 

'Bi hêz û keda xo zorê îşxalkerdişî benê'

 

Fatime tewr peyîn wina vat: "Şorişê Rojawanî têkoşînê şaran ê bi rûmetî yo. Şorişê serkewtişî yo. La dewlete tirka faşîste her rey xo rê firsendêkê viraznena ke zorê şarî bero, têkoşînê şarî mîyanê lêşinîya xo de vînî bikero. Amancê dewleta tirke ya îşxalkerdoxe xora aseno. A wazena şar teslîm bibo û herra xo biroşo. La ma tu wext nê çî qebul nêkenê. Ez venga pêro şaran kena, wa bi hêz, kede û xoverdayîşê xo zorê îşxalkerdişî berê û heyfê embazanê xo bigîrê."

 

'Nika bi mîlyonan însanî beşdarê na dewa bîyê'

 

Temsîlkara Hemserekîya Meclîsê Şêranî Lûtfiye Mehmod Silêman destpêkê qiseykerdişê xo de vat, ganî her kes bi ruh û can têbigêro û vat: "Bi nê hêrişan ke bi xususî serê Başûrê Kurdistanî de yenê kerdiş, ma hetkarîya AKP û PDKyî yê seba qirkerdişê şaran vînenê, bi rengêk senîn o. Seba nê zî goreyê berjewendî û waştişê înan, eke kurdêk ça de bibo, ganî xo biresnê înan û înan qir bikerê. Her kesî çimanê xo hemverê nê şerî de girewto. avên xwe li ber vî şerî girtiye. Hêrişê ke ewro koyan de beno, hemverê nê de têkoşînêk bêhempa ameyo kerdiş. Înan ganê xo feda kerdo û ameyê sewîyeya şehadetî Nê kesî her çar perçeyê Vakur, Başûr, Rojhelat û Rojawanê Kurdistanî de ameyê û kom bîyê. Dewleta tirke her tim vatêne, ez o şima çin bikerî. Bi fikrê mi demo ke no hereket bi di, hîrê kesî bi û nêeşkabî werte ra wedarnê, nika zî nêeşkenê wedarnê. Nika bi milyonan însanî beşdarê nê dewa bîyê."

 

'Ma do hemverê hêrişan de tu wext game nêerzê'

 

Lûtfîye wina qiseykerdişê xo qedêna: "Dewleta tirke û hemkarê xo çi planê lêşin estê, hemverê şarê aştîye wazenê de şixulnena. Ez zî vana hemverê nê de ganî ma serê herra xo de biciwîyê. Ma rayîr nêdanê faşîzmo ke îşxalkerdişê xo mîyanê herra ma de hîra keno. Ma do sîne bi sîne hemverê nê hêrişan de vinderê û tu wext game peyser nêerzê."

 

'Me her tim sewîyeya têkoşînê xo yê hemverê nê kerdişan berz kerd'

 

Endama Şaredarîya Şarî ya qezaya  Şêranî Mehboba Ismaîl bale ant serê têkoşînê hemverê hêrişan û wina vat: "No demêk derg o hêrişê dewleta tirke yê serê Başûrê Kurdistanî zêde bîyê. A rojî keyeyêkê Mexmûrî hedef ame girewtiş. Her tim hêriş kenê û goş nêdanê ke tutê estê. Çîyê ke PDK û AKP kenê, merdimayî de cayê nîna çin o. Çi heyf dewletê mîyanneteweyî na babete de ewnîyenê la tu reaksîyon nêmojnenê ra. Ma her tim sewîyeya têkoşînê xo yê hemverê nê kerdişan de berz kerd. Heta ke welatê ma tehdîd û kerdişê hemverê heqê merdiman de xelas bibê, ma do têkoşînê xo dewam bikerê."