Sema Çaglak        

 

ŞIRNEX – Zeynep Ureka ke lajê aye Îbrahîm Urek serra 2019ine de Heftanîn de dinyaya xo bedilna, hemverê şerî de venga yewîya kurdan kerd û vat: “Hêzê serdetî bazaranê xo serê kurdan de kenê. Xora dişminê kurdan zêde yê, qet nêbo wa kurdî nêbê dişminê yewbînana."

 

Hêrişê Dewleta Tirke ke bi hetkarîya  PDKyî aşma çarine de serê Mintiqaya Federe ya Kurdistanî de dewam kena, reaksîyonî her ke şinê zêde benê. Maya îbrahîm Urekî serra 2019ine de Heftanîn de dinyaya xo bedilna, Zeynep Urek hemverê şerî venga yewîye û tifaqê kurdan kerd.

 

Zeynep Urek (53) ke qezaya Qilebanî ya Şirnexî de manena, sey xeylê kurdan mîyanê keyeyêk welatperwer de pîl bena. Zeynebe 16 serrîya xo de zewecêna û bena maya 7 tutan. Lajê aye İbrahîm serra 2014ine de tewrê PKKyî beno û serra 2019ine de şerê Heftanînî de dinyaya xo bedilnaye. Zeynebe wina vat: "Bi zor û zehmetî ma cuya xo dewam kerd. Teda û zordarîyê dewlete tim serê ma de bi. Lajê mi Îbrahîm qijîyê xo ra helwestê xo mojnayîne. Hem bi nêzdî û hem zî bi fehmê xo helwestê xo vera zulm û nêheqî mojnayîne. Ma pê serberz ê. Ma wayîrê mîrasê ey yê têkoşîn û xoverdayîşî ke ma rê verda vejîyê."

 

'Ganî kurdî pê bikerê'

 

Zeynebe reaksîyon vera hêrişê Tirkîya yê serê Mintiqaya Federe ya Kurdistanî mojn aû vat: "Ma şer nêwazenê. Tu mayî şer nêwazenê û nêwazenê ke tutê înan bêrê kiştiş. No şer bi hemkarîya Barzanî ame destpêkerdiş. Ganî Barzanî nê şerî de kîşte Tirkîya de ca nêgirewtêne. Wexto ke DAIŞî hêriş kerd, kam vera DAIŞî bi asteng? Tena kurdî eşkenê hetkarîya yewbînan bikerî. Ganî  tu dewlet û hêzêk bîn nê hêvî nêkerê. Pêro dewletî berjewendîyê xo fikrîyenê. Ganî her çar parçeyê Kurdîstanî de kurdî tifaqê xo bikerê yew û hemverê şerî de yewbîyayîşê xo awan bikerê. Serdestî bazarê xo serê kurdan de kenê. Xora dişminê kurdan zêde yê, qet nêbo wa kurdî nêbê dişminê yewbînan. Ganî kurd bêrê têhet û pê bikerê. Bi serran o gonî yena rijnayîş. Ma pêro bi şehîdanê xo serberz ê. Heta ke ma sax bê ma do pey dewaya tutanê xo de şêrê. Ganî kurdî wayîrê kurdbîyayîşê xo vejîyê û hemverê nê şerî de bibê yew û yewbînan dir xîyanet nêkerê."

 

‘Şixulnayîşê çekanê kîmyayî rê çimanê xo padanê'

 

Zeynebe bale ant şixulnayîşê çekanê kîmyayî û vat: "Ewropa şixulnayîşê çekanê kîmyayî ke Tirkîya şixulnena, bêveng manena. Seba ke a zî bazarê xo serê kurdan de kena. Pêro  dewletê mîyanneteweyî û sazgeh û rêxistinî zî zanê ke Tirkîya hemverê gerilla de çekanê kîmyayî û çekanê qedexe şixulnena. La seba ke gorewyê berjewendîyê xo têgêrenê, bêveng manenê. Çekê kîmyayî zirar danê merdiman û hem zî danê xoza û heywanan. Ma tu wext nê zulmî û îşkence xo vîr ra nêkenê."

 

‘Ma do herra xo bipawê'

 

Zeynebe qiseykerdişê xo wina qedêna: "Ma her çiqas bêrê tepiştiş û kiştiş zî ma pey dewaya xo yê. Şarê ma rayîrê heqê xo de yeno tepiştiş û kiştiş. Çîyê ke Tirkîya kena xeylêk xirab o û cayê şermî yo. Xora xetimyayê. Coka hêrişê xo tewr zêde kenê. Eke  îradeyê kurdan bibo, do xo nêkerê torra xîyanetî. Pî û kalanê ma hende nê rayîrî de bedel dabî û reyna zî xîyanet qebul nêkerdî. Eke kurdî hemverê şarê xo, herra xo xîyanet bikerê, no xeylêk şaş o. Lazim o ke tu kurd nê çî qebul nêkero û welatê xo bipawo."