DÊRSIM - Dewa Şamo û Zogarî yê Xozatî serra 1994ine de amebî vengkerdiş û par zî adir bi nê dewan kewtibi. No zêdeyê aşmêke yo zî nê dewan de bêmabên darî yenê birnayîş.

 

Mintiqaya dewanê Şamo û Zogarî yê Xozatê Dêrsimî de zêdeyêr aşmêke yo darî yenê birnayîş. Seba guleyê Qereqola Amutkayî ameyê eştiş, nê dewan de şewat vejîyabi. Her çend ke walîtî nê şewatî înkar kerdibi zî, dima ra fotograf û dîmenê şewatî amebî weşanayîş. Ame zanayîş ke îhaleyê birnayîşê daran dayê kargehêk Meletî de yo û seba birnayîşê nê daran 60 keyeyî mintiqa de ameyê bicakerdiş.

 

Serekê Komeleya Paştdayîş û Kulturî Dêrsimî ya Îzmîrî Aslan Sûltan ke derheqê babete de Ajansê Xeberan ê Mezopotamyayî (MA) rê qisey kerd û vat, dewa înan Şamo serranê 90î de ameya veşnayîş û wina vat: “A mintiqa sey ‘mintiqaya qedexe’ ameye neqlkerdiş û nêverdayî dewijî bikewê dewe. Gelîya Alî û Koyê Yilanî ke par şewat ci de vejîyabi, aşmêke ra zêdeyêr o darî yenê birnayîş. Hem daristanê dewa ma û hem zî mezrayê Zagorî par di rey ameyî veşnayîş. Îhaleyê birnayîşê daranê na mintiqa dayî kargehêk Meletijî. Xarpêt û Paluyî ra 60 keyeyî ardê mintiqa ke seba daran bibirnê. Seba birnayîşê daran 30 traktoran xebitnenê.” 

 

‘Daristanê kurdîstanî yenê talankerdiş’

 

Tewr peyîn Aslanî wina vat: “Tîya de armanco esas madenê zerdî yê. Na şîrketa Meletî kena ke waran daristanan ra pakî bikera dima zî xo birensa madenanê zerdî. Birnayîşê daran dewam keno. Wa destê xo nêdê cografya û xozaya ma. Daristanê ma tarîxê ma yê. Dêrsim de zî sey Şirnexî qirkerdişê daran est o. Eke ma vera qirkrdişê daranê Şirnexî vengê xo bivetêne ewro Dêrsim de no qirkerdiş nêameyêne kerdene. Dewijê mi vanê eke wina dewam bikero dewe de darêke zî nêmanena.  Qirkerdiş û hêrişêko cidî est o. Wa şarê ma verê xo bidê Kurdîstanî.''