ÎZMÎR - 4in roniştişê dewaya Onur Gencerî ke 17ê Hezîrana 2021î de bînaya HDPyî yê Îzmîrî de Deniz Poyraz qetil kerd, 6in Dadgeha Cezaya Giran ya Edlîyeyê Bayrakli yê Îzmîrî de bêro vînayîş.

 

Rêxistina Partîya Demokratîke ya Şaran (HDP) ê Îzmîrî vernîya roniştişî de verê bînaya edliyeyî de eşkerayîya çapemenî organîze kerd. Eşkerayî de pankartê "Ma kiştoxan ra hesab pers bikerê, do faşîzm vînî bikero" ame akerdiş. Sewbîna sloganê, "Deniz Poyraz rûmeta ma ya", "Seba Pirsûsî edalet, seba Denîze edalet", "Deniz Poyraz bêmerg a" ameyî berzkerdiş. Parlamentera HDPyî ya Îzmîrî Serpil Kemalbay û xeylêk kesî beşdarê eşkerayîye bî. Dimayê eşkerayî; Cinî Pîya Bi Hêz ê, yê Îzmîrî eşkerayîya çapemenîye dayî.

 

Serpîl Kemalbay da zanayîş ke roniştişê vernîya nê de fiyaskoyê edaletî ameyo ciwîyayîş û vat, ganî her kesê ke nê qirkerdişî ra berpirsîyar ê, bêrê muhakemekerdiş. Sewbîna Serpîle da zanayîş ke sîstem versuc paweno, do peynî de bêro mehkûmkerdiş. 

 

Hemserekê HDPyî yê serdemê verê Sezai Temelli zî da zanayîş ke edalet bi xêrê têkoşînî bi ca yeno û vat, nê têkoşînê edaletî yê ma hemîne yo. Seba ke ma bi aştîye bêrê têhet ganî ma zîhnîyeto ke qirkerdişkeno hesab pers bikerê.

 

Parlamenterê CHPyî Sezgin Tanrikulu zî vat, hêrişê hemverê HDPyî yê padayîşî, bingeh qirkerdişê Denîz Poyraze rê amade kerdo, ma helal nêkenê, ma do hesab pers bikerê.

 

Dimayê eşkerayîye, Cinî Pîya Bi Hêz ê eşkerayîye dayî û vatî, bicîwîyo paştdayîşê cinîyan.

 

Heto bîn ra dayîka Deniz Poyraze, Fehime Poyraze zî wina vat: "Nika Denîze nêmerda, a verê ma de ya. Înan nêeşka Denîze bikişê. Kiştoxo xidar Denîze kişt labelê şar serê lingan de yo. Ma do têkoşînê xo dewam bikerê. Şehîdî nêmirenê.