Rozerin Gultekin

 

STENBOL - Versûcê Qirkerdişê Pirsûsî bi 7 serrî yo nînê muhakemekerdiş. Keyeyî zî hemverê nê de bi serran o korîdorê edlîye de edalet gêrenê. Avûkata dewa ra Sezin Uçar wina vat: "Ame waştiş ke cigêrayîşê edaletî bêro astengkerdiş."

 

20ê Temmuze 2015ine de 33 endamê Federasyonê Komeleyê Ciwanan ê Sosyalîst (SGDF) yê ke waştî bi şarê Kobanî dir bikewê mîyanê paştdayîşî û tutan rê pêkayî bişawê baxçeyê Merkezê Kulturî yê Amarayî hetê DAÎŞî ra ameyî qetilkerdiş. Serê qetilkerdişê înan ser o 7 serrî derbaz bi. Mîyanê 7 serran de tena Yakup Şahin ame muhakemekerdiş û 34 rey cezaya heta heta girewt. Dosyaya versûcê fîrarî yê

 

Îlhami Bali û Deniz Buyukçelebi yewbînan ra ameyî visnayîş û qerar ame dayîş ke bêrê tepiştiş.

 

Do 24in roniştişê dewaya 5in Kanûne de Kampusê Zîndanê Hîlvanî de bêro vînayîş. 7in serrgêra qirkerdişî de avûkatê dewa Sezin Uçar ercnayîş kerd.

 

'Waştî destkewtişê Şorişê Rojawanî bifetisnê'

 

Sezîne da zanayîş ke amancê nê hêrişî oyo ke paştdayîşê bi Şarê Kurdî dir asteng bikero û vat: "Waştî  destkewtişê Şorişê Rojawanê bifetisnê. Dimayê qirkerdişî derheqê cipersayîşî de qerarê  nimitişî ame dayîş. Ma îtiraz kerd labelê heta muhakemekerdişî dest pêkerd, qerarê nimitişî dewam kerd. Xeylêk waştişê ma derheqê dosya de estbî la nêameyî qebulkerdiş. Derheqê DAÎŞijan de qerarê tepiştişî estbi labelê reyna zî qirkerdiş kerdî. Ma nê dir dî ke hîn kesî yenê pawitiş."

 

'Ame waştiş ke cigêrayîşê edaletî bêro astengkerdiş'

 

Dimayê qirkerdişê Pirsûsî xeylêk qirkerdişî ameyî kerdiş. Qirkerdişê Anqara, Sultanahmet, Reina, Balafirgeh, Kuçeyê Îstiklalî. Ma vat, beno ke versûcê nê qirkerdişan pîya girêdayeyê bê û çarçewaya nê de bêrê muhakemekerdiş. Keyeyan zî seba muhakemekerdiş kêm ameyo kerdiş, îtîraz kerdî. Ma zî sey avûkatan heyetê dadgehe seba ke muhakemekerdişêk adîlane nêkerd, red kerd. No zî sey sûc ame vînayîş. Heyet, seba qirkerdiş bêro roşnkerdiş, delîlêke zî dosya de zêde nêkerd. Heyet,vera ke delîlan zêde bikero, waşt derheqê dosya de qerar bido û derheqê keye, avûkat, birîndaran de gerreyê sûcî bikero. Nê dir ame waştiş ke cigêrayîşê edaletî bêro astengkerdiş. Labelê keyeyan tu wext fek têkoşînê xo ra vera nêda."

 

Lingê sîyasî yê qirkerdişî

 

Sezîne dîyar kerd ke înan waşto Serekê ê serdemî Ahmet Davutoglu bêro goşdarîkerdiş û vat: "Berpirsîyarê qirkerdişî tena DAÎŞ nîyo, berpirsîyarê nê qirkerdişî yê sîyasî zî esto. Ahmet Davutoglu qirkerdişê serdemê hezîrane û teşrîna peyêne îşaret kerdibi labelê dewamê ci nêardibi. O wext vatibi, 'Ez rastiyê ê tarîxî de vajî, kes nêeşkeno rîyê yewbînan ra biewno'. Pêwa serekkomarî, xebatkarê îstîmlakî yê berpirsîyarê nê qirkerdişî estê."

 

Polîtîkayê bêcezaverdayîşî

 

Sezîne dewam de wina vat: "Bêcezaverdayîş seba înan beno bendê pawitişî. Yakup Şahin bi SEGBÎSî beşdarê ronniştişî bibi. No problem o. Sewbîna ma xeylêk rey muracatê Dadgeha Berzî kerd labelê seba nê muracatan xeylêk rey cewabê redkerdişî ameyo dayîş. Ma vat, dewamkerdişê qerarê nimitişî yê serê dosya de heqê muhakemekerdişê adîl binpay keno. Nê ser de zî ma muracat kerd. Dewlete pawitişê heqê cuye yê  welatijan nêdî. Muracatê ma yê derheqê nê de zî nika  Dadgeha Heqê Merdiman a. Hîn qerarî nêameyê dayîş."

 

Hedef muhakemekerdişê Erdoganî yo

 

Sezine 7in serrgêra Qirkerdişê Pirsûsî de waştişê edaletî her kesî rê kerd û wina qedêna: "Ganî her kes beşdarê dewa bibo û paştdayîş bido. Ganî her kes fam bikero ke ewro lazimîyê ma bi paştdayîşêk  wina est o. Dewaya Qirkerdişê Pirsûsî do 5ê Kanûne de bêro vînayîş. Waştişê ma yê tewr pîl oyo ke Ahmet Davutoglu sey şahid bêro goşdarîkerdiş. Hedefê ma oyo ke Erdogan, Davutoglu, wezîfedarê selahîyetdarî yê nê qirkerdişî berpirsîyar ê, bêrê muhakemekerdiş. Eke wina bibo ancax edalet bi ca bêro."