Melike Aydin 

 

ÎZMÎR - Dayîka Denîz Poyraze bînaya HDPyî ya Îzmîrî de ameye qetilkerdiş, Fehîme Poyraze venga beşdarîyê roniştişo ke do siba bêro kerdiş û dîyar kerd ke ganî pêro kesê bi versucî dir têkilî dayêî vejîyê werte û ganî versucî  dadgehe de amade bê. 

 

17ê Hezîrana 2021 de Onur Gencer hêrişê bînaya Partîya Demokratîke ya Şaran (HDP) kerd û Deniz Poyraze qetil kerd. Do siba 4in roniştişê Onur Gencer ke bêro muhakemkerdiş, 6in Dadgeha Cezaya Giran ya Bayrakli bêro vînayîş.

 

Verê roniştişî dayîka Deniz Poyraz, Fehîme Poyraze derheqê dewa de qisey kerd.

 

'Ganî versucî bîyarê roniştişî'

 

Fehîme destpêk de ard vîr ke versuc bi rayîrê Sîstemê Veng û Dîmen (SEGBÎS) beşdarê roniştişî bîyo, coka waştişê redi hakimî yê avûkatan zî ameyo redkerdiş. Fehîme dîyar kerd ke ganî versuc eywana dadgehe de amade bo û vat: "Ganî cewabê persan biameyîne dayîş. SEGBÎSyî rê qisey kerd. Ma wazenê bîyarê dadgehe. Xora ganî kiştoxî bîyarê dadgehe, deqeyê peyîn de vatî nîno. Hende ewraqî estê, ganî o bi xo vajo. O bi xo nîno, wexto ke nîno zî dewa bena derg û delîlî vînî bî. Sewbîna qiseykerdiş werte ra vînî benê. Ganî o bi xo uca de bo, ganî bi fekê xo qisey bikero."

 

'Bi tena sereyê xo nêkerd'

 

Fehîme dîyar kerd ke yewo faşîst kênaya ci qetil kerdo û vat: "Versuc tena bi sereyê xo nîyo. Ê bi tena sereyê xo nê çî nêkerd. Engişta xeylêk merdimî ci de esta. Bi taybetî a çadire verê HDPyî de akerdî. Kesê ke kênaya mi ra vanê, a merdiman bena serê koyan, ê ajan ê. Nika uca de nîyê. Ame kênaya mi kişt û dima ra şi Anqara.  Do uca de zî çîyêk bikerdêne labelê uca ra şi cayêk bîn. Seba ke destê min birîndar bi kênaya mi şî uca. Kênaya mi hedef ameye ramojnayîş. O kes ajanê dewlete yo."

 

'Ganî versucî heme vejîyê werte'

 

Fehîme dîyar kerd ke ganî derheqê her kesê ke bi versûcî dir têkilî dayê ro cipersayîş bêro destpêkerdiş û vat: "Versucî tena bi sereyê xo nê çî nêkerdo. Ganî êyê ke engişta înan ci de esta vejîyê werte. Xeylêk kesan dir têkilî dayo ro. Sewbîna fotografê versucî yê Minbicî vejîyayî werte. Versucî cesaretê dadgehe de heqaret bikero, dî. Ganî ma merdimê winasîyan mîyanê xo ra pak bikerê. Ganî versuc ceza bigîro."

 

'Ma do têkoşîn dewam bikerê'

 

Fehîme vat, Denîze tu ganeyêk nêdijnayo û wina dewam kerd: "Ez nê nêheqî qebûl nêkena. Heta dilopêk gonîya mi bibo, ez o seba kênaya xo xover bidî. Ez o Nobeta Edaletî de vinderî. Ma do seba zîndanan zî roşê. Yê ke kewenê zîndanan zî sey Denîze yê. Ê 'terorist nîyê' Ma Dayîkê Aştîye yê. Heta waştişê ma bi ca bêro ma do nobeta xo dewam bikerê."

 

Fehîme tewr peyîn wina vat, ez veng dana her kesî ke beşdarê roniştişî bibê.