STENBOL - Seba 7in serrgêra Qirkerdişê Pirsûsî tepişteyê ke Zîndanê Tekîrdagî de yê mesajê xo pare kerdî û vatî, do têkoşînê keyeyan tim dewam bikero.

 

Tepişteyê Zîndanê Tekîrdagî yê Hûmara 1in ê Tîpê Fyî seba 7in serrgêra Qirkerdişê Pirsûsî rê Înîsiyatîfê Keyeyan ê Pirsûsî rê mesaj şawitî.

 

'Do no proseso tarî werte ra bêro wedaritiş'

 

Tepişteyan mektube de dîyar kerd ke 33 qurbanî bi hawayêke “faşîst û wehşet” ameyî qetilkerdiş. Tepişteyan dîyar kerd ke 7 serrî yo hêrsê înan tewr bîyo zêde û vatî: "Waştî ke qerardarîya ma, hesabperskerdişî 33 qurbanîyê ma û bi edaleto ke qesr de ameyo hepskerdiş bi antidemokratik, asteng bikerê. Labelê hemverê nê  astengîyan de têkoşînê 33 qurbanîyan tim dewam de yo. Bi xêrê têkoşînê şima yê edaletî û xoverdayîşê şima, do ganî no proseso tarî werte ra bêro wedaritiş. Do têkoşîn û cigêrayîşê ma yê edaletî tim dewam bikero, heta ke serbikewo. Ma wina eşkenê hesabê qirkerdişî pers bikerê. Ma 33 qurbanîyê xo bi heskerdiş û hesret anê xo vîr. Ma xoverdayîşê şima keyeyan û hemrayan silam kenê."