Oznûr Deger

 

ANQARA - Rojnamegere Sîbel Yukler reaksîyon vera tepiştişê  16 rojnamegeranê kurdan de da û dîyar kerd ke bahaneyê tepiştişê înan, babetê ke her roje çapemenîya terefdar de yenê nuştene û munaqeşekerdişî yê û wina vat: "Beno ke ma  welatêk ke rejîmê yew kesî serdest o de ciwîyenê la eke rojnamegerê Kurdî azad nêbê tu kes azad nîyo."

 

Çarçewaya cipersayîşê ke hetê Serdozgerîya Komare ya Amedî ra amebî destpêkerdiş de polîsan 8ê hezîrane de 20 ci ra rojnamegerî,  22 kesî destbend kerdî  û 8 rojan nezaretxane de mendî. Rojnamegerê ke destbendkerde bî 15ê Hezîrane de vetî dadgehe û 16 kesî bi îdiayê "endamîya rêxistine û propagandaya rêxistine kerdê", ameyî tepiştiş. Serdar Altan, Mehmet Alî Ertaş, Safiye Alagaş, Azîz Oruç, Omer Çelîk, Suat Doguhan, Ramazan Gecîken, Neşe Toprak, Zeynel Abîdîn Bûlût, Mazlum Dogan Guler, Mehmet Şahîn, Elîf Ungur, Îbrahîm Koyuncu, Remziye Temel, Abdûrrahman Oncu û Lezgîn Akdenîz bi îdiayê ‘endamîya rêxistine’ ameyî tepiştiş.

 

Pêwa tepiştişê 16 rojnamegeranê kurdan Qanûnê Dezenformasyonî Komîsyonê Edalet û Komîsyonê Mecrayê Dîjîtalî yê Meclîsî de ame qebûlkerdiş û yeno pawtiş ke menga teşrîna verêne de bêro Heyetê Pêroyî. Qanûnê Dezenformasyonî sey darbeyêk giran ê hemverê rojnamegerî yeno ercnayîş.

 

Rojnamegere Sîbel Yuklere zî 5ê Temmuze de Edene de seba ke tewrê eşkerayîya çapemenîye ya seba 16 rojnamegeran amebî kerdiş bîbî, hetê polîsan ra ameye îşkencekerdiş û tepiştiş. Sîbel Yuklere derheqê babete de ercnayîş kerd.

 

‘Teda her ke şî zêde bî'

 

Sîbele dîyar kerd ke demêk derg o şerêk de yê û krîzê ekonomî ra heta polîtîkayê şerî heme çîyê ke yenê ciwîyayîş parçeyê nê şerî yê û wina vat: “Tesîrê şerê 2015-2016ine de ameyo ciwîyayîş, hema dewam keno. Rojnamegerî demêk derg o binê teda de yê. 16 rojnamegerî ameyî tepiştiş. Vernîya nê de zî xeylêk embazê ma ameyî tepiştiş. Embazê ma yê ke prosesê helîkopterî taqîb kerdî, ameyî tepiştiş. Mabêne 2015 û 2016ine de xeylêk embazê ma seba xeberan ameyî tepiştiş. Tedayê serê rojnamegeran her ke şi dewam kerd. Her tim verê xo dayî rojnamegeranê kurdan. Şewêke de tepiştişê 20 rojnamegeran zî fotografê no yo."

 

‘Şima do zî azad nêbê'

 

Sîbele dîyar kerd ke 2011î de binê Dewaya KCKyî de 36 rojnamegerî ameyê tepiştiş û wina vat: "Darbeyê hemverê çapemenîye her ke şi pîl bi. Dimayê ke rojnamegerê kurdî ameyî tepiştiş, xebatkarê JINNEWS û MAyî vatî, ‘azadîya ke seba ma çin a, do seba şima zî çinbo'. Wexto rojnamegerî ameyî tepiştiş, Qanûnê Sansurî ame rojeve. Maddeyê 29ine ê qanûnî de hukmê, ‘agahîyê şaşî vilakerdiş' ca gêno û seba rojnamegeran bi nê bahaneyî serrêke ra heta 3 serran ceza yena waştiş. Çarçewaya nê maddeyî de xeberê serê çapemenîya dijîtale de yenê parekerdiş û tweetî benê sebebê tepiştişî. Tabloyo peyîn zî xora no ma rê mojna. 16 embazê ma beşêk seba nê ameyî tepiştiş."

 

‘Yê ke veng nêvejenê do dore înan rê zî bêro'

 

Sîbele dewam de vat, 4ê Temmuze de eşkerayîya ke reaksîyon vera tepiştişê rojnamegeran de ameya destbendkerdiş û wina vat: "Ma emnîyet de musayî ke avûkatî nêeşkenê bikewê şerh û îfadeyê zabitnameyê cipersayîşî. No zî bi  genelgeyê ke Wezaretê Karê Zereyî 3ê Hezîrane de şawito Mudûrîyê Emnîyetî bîyo. Goreyê nê avûkatî demê îfadeyî de nêeşkenê şerhê dayîşê serê îfadeyî û waştişan bikerê. Eke ma heqê xo bizanê zî ma destbendkerdiş de bêpawitiş manenê. Yê ke ewro hemverê tepiştişê rojnamegeranê kurdan veng nêvejê, dorê do bêro înan zî. Ez bêvengîya rayaumumî ya hemverê tepiştişê rojnamegeranê kurdan zî rexne kena. Seba embazan kampanya ameye destpêkerdiş. Çapemenîya terefdare kurdan hedef mojnena ra. Bi hawayêke hewl danê ke rojnamegeranê Kurdan îlegalîze bikerê. No tabloyek bi xof o. Ganî ma sey meslegdaşanê înan na bêvengîye bişikinê."

 

‘Do feydeyê ci kesî rê çinbo'

 

Sîbele tewr peyîn wina vat: "Ma binê şîdetî de, binê versîya şerî de xeberan viraznenê. Na raştîya kurdan û raştîya rojnageranê kurdan a. Embazê ke Anqara û Stenbol ra yenê Amed vînenê ke Pîa, Arî û Pel senî binê îşxalkerdişî de yê û demo ke JINNEWSî zîyaret kenê, vînenê ke rojnamegerî senîn hetê polîsan ra yenê taqîbkerdiş. Ganî her kes nê bivîno. Azadîya ke seba rojnamegeranê kurdan çin a, do seba tu kesî çinî bo û do feydeyê ci zî kesî rê çinî bo."