MERKEZÊ XEBERAN – Dewa Koranî ya girêdayeyê bajarê Urmîye de vizêr nîmeroj de netîceyê teqîyayîşê mayîne de tutêke 5 serrî û dayîka aye birîndar bî.

 

Vizêr dewa Koranî ya girêdayeyê bajarê Urmîye yê rojhelatê Kurdistanî de mayînêke antî tang ke nîna zanayîş ke key mintiqa de ameya bicakerdiş, teqîya û netîce de 2 kesî birîndar bî. Tuta bi nameyê Ronya Xudayî ya 5 serrî, demo ke zîyanê pey keyeyê xo de kay kerdêne, cismêko nêteqîyaye vîna û seba ke bimojno dayîka xo bena keye. Demo ke dayîka Ronya, Meryem Ezîzvende mayîne destê kênaya xo de vînena, bi lezabez mayîne destê kênaya xo ra vejena û wazena ke bierza la mayîne destê dayîke de teqêna.

 

Netîceyê teqîyayîşî de ame dîyarkerdiş ke Meryem Ezîzvende bi giranî û tuta aye 5 serrî Ronya Xudayî zî birîndar bîyê. Dayîke û tuta xo ya birîndar hetê merdimanê xo ra wedaryayî nêweşxaneyê Urmîye. Seba ke Meryem Ezîzvende bi giranî birîndar bibî, dimayê mûdaxaleyê ewilî Nêweşxaneyê Dewlete yê Urmîye ra sewqê Nêweşxaneyê Dewlete ya Tebrîzî ameye kerdiş. Ame zanayîş ke heta nika zî tehlukeyê ciwîyayîşê Meryeme dewam keno û dermankerdişê kênaya aye Ronya zî nêweşxaneyê Urmîye de dewam keno.

 

Mayîne kîşte baregehê Îranî de ameye vînayîş

 

Şîmal Xudayî ke dewa koranî de ciwîyeno, vistewreyê Meryeme yo û ma waşt ke ma derheqê serebût û rewşa birîndaran de ci ra zanayîş bigîrê wina vat: “Ma merkezê bajarî de bî, demo ke zanayîşê teqiyayîşî ma rê ame, ma şî nêweşxane. La serebût zîyanêko kîşte keyeyê ma de bi, ameyo meydan. Uca de zî bargehê leşkerî yê girêdayê dewleta Îranî esto.  Kesê ke zîyan de vaş arêdayîne, dîyê ke kênaya qije mayîne dîya û demo ke dayîka aye waşta ke destê kênaya xo ra vejo, destê aye de teqîya ya. Vizêr ra ma nêweşxane de yê, rewşa kênaya qije nika baş a, la rewşa cinîya birayê mi xeylêk giran a. Homa zulmê ke ma rê kenê, qebûl nêkero.”

 

Heto bîn ra goreyê hîn îdiayê ke mintiqa de yenê vatiş, na mayîne lejê Îran û Iraqî yê demê verê ra heta nika menda.