Derya Ren

 

AMED - Sereka Odaya Tabîban a Amedî Elîf Turane dîyar kerd ke Tirkîya de dimayê prosesê normalbîyayîşî her kes rehet têgêra û vat: "Bi di hewteyê peynî yo ke hûmara kesê ke bi vîrus kewenê, zaf zêde bena. Seba nê ganî ma tedbîrê xo bigîrê."

 

Serê janê vîrusê koronayî ra di serrî û nîm derbaz bi û prosesê pandemî de bi hezaran kesî dinyaya xo bedilnaye. Hukmat di mengî yê ewil emsarî de derheqê prosesê normalbîyayîşî de eşkerayî da û dimayê eşkerayîye maske û pêro metodê ke seba pawitişê komelî bî ameyî wedaritiş. La rewşa normalî de reyna rayîr vernîya zêdebîyayîşê hûmara kesê ke bi jan kewtî, akerd. Dimayê eşkerayîya Rêxistina Weşîye ya Dinya ‘pandemî nêqedîya yo’ dima, Yewîya Tabîbê Tirkî zî eşkerayî da û vat, hûmare zêde bena.

 

Di hewteyê peynî de hûmare xeylêk zêde bî. Goreyê dayeyê wezîrê weşîye Fahrettîn Koca eşkera kerd, 20 û 26ê hezîrane de hûmare resaya 26 hezar û 135 û 27ê Hezîrane û 3ê Temmuze de no vejîyayo 57 hezar û 113î.

 

Sereka Odaya Tabîban ya Amedî Elîf Turan derheqê babete de qisey kerd.

 

‘Şar kewt mîyanê rehetî'

 

Elîfe wina qal kerd: “Bi wedaritişê tedbîran dir rehetîyêk vejîya werte. Seke rîsk wedarîyayo, têgêrayî. Maske ameyî wedaritiş. Eya, bi di serrî ra zêdeyêr o hemverê pandemî dir têkoşînêk ame dayîş. Seba nê her kes bêzar zî bi. La bi wedaritişê tedbîran dir her kes rehet bi.”

 

‘Qesawetê ekonomîye vejîyayî werte'

 

Elîfe vat, dayeyê vîrusê korona înan dir nîno parekerdiş û vat: "Goreyê xebatanê wareyan û meslegdaşanê ma hûmare bîya zêde. Eşkerayîya DSOyî zî no het ra yo. Kesê ke aşî nêbîyê, ganî bibê. Yê ke verê zî kerdê ganî newe ra bikerê. Eya, beno ke ma bi asanî derbaz bikerê la yê ke binê rîskî de estê. Ganî ma înan verê çiman de bigîrê û tedbîranê xo bigîrê. Çi heyf, qesawetê ekonomîye vejîyayê werte."

 

Elîfe ard vîr ke prosesê pandemî de kesê ke testê înan pozîtîf vejîyayîne, tersê ke kar ra bêrê eştiş nêvatêne ê pozîtîf ê û wina qedêna: "Xeylêk kesî nêşîne test nêkerdêne. Ganî dewlete nê babetan de paştdayîş bida. Ganî tedbîrî bêrê girewtiş. Ganî ma hîjyen û mabêne û maskeyan rê bi dîqet bê."