AMED - Avûkate Elîf Îpek Tîrenç Ulaş ke hetê polîsan ra amebî derbkerdiş, cipersayîş ci rê ame akerdiş û derheqê polîsan de qerarê bêtaqîbkerdişî ame dayîş. 

 

16ê teşrîna verêne 2021î de bi rayberîya Tevgerê Cinîyan ê Azadan (TJA) û Meclîsê Cinîyan ê DBPyî hemverê nîjadperestî û cinsperestî bi şîarê ‘Êdî bes o’ Meydanê Îstasyonî de mîtîng amebi kerdiş. Avûkate Elîf Îpek Tîrenç Ulaş ke nuqteyê cigêrayîşî de hetê  polîsan ra amebî derbkerdiş. Elîfe eynî wextî de îdarekarîya Komeleya Cinîyan a Rosa de ca gêna. 

 

Elîfe nuqteyê cigêrayîşî yê yewin de ci ra nasname amebi waştiş û cigêrayîş nêamebikerdiş. Nuqteyê diyîn de nasname amebi waştiş û waştibî ke cigêrayîş bikerê. Elîfe destûr nêdabi û nê ser de hetê polîsan ra amebî derbkerdiş û hewl dabî destbend bikerê. Polîsê ke musayî Elîfe avûkate ya, na rey hewl dayî ke serê serebûtî padê.

 

'Ez dewlet a'

 

Elîfe eynî roje de derheqê polîsê ke aye derb kerdibî de gerre kerdibi. Avûktanê Elîfe 20ê teşrîna verêne 2021î de derheqê serebûtî de waştişname de dayî Serdozgerîya Komare ya Amedî de gerre kerdî. Waştişname de ame dîyar kerdiş ke polîsan Elîfe ra vatê, ‘Ez dewlet a, ez polîs a û to nêkena nê meydanî' û ser de qîrayê û demê serebûtî de kelepçeyê plastîk dergê aye kerdê û vatê ma do to destbend bikerê. Serê îxbarê derheqê gumanbaran de cipersayîş amebi destpêkerdiş.

 

Dîmenê derbkerdişî nêvînayîşî ameyî 

 

Dîmenan de yeno vînayîş ke Elîfe hetê polîsan ra yena derbkerdiş û polîsan milê Elîfe xêz kerdê û bi destan tehn dayê sîneyê Elîfe, tehdîd kerdê.  Dîmenan de yeno vînayîş ke Elîfe yena derbkerdiş û meydan ra yena vetiş."

 

Polîsan qebûl nêkerd

 

Polîsan îfadeyê ke dayî de sûcê hemverê înan qebûl nêkerdî û vatî, îdia yo tu rastîyê nê çin o. Dozgerîye derheqê 4 polîsan de bi sûcdariyê ‘wezîfeyê xo baş nêkerdê', ‘tehdîd’ cipersayîş akerd la seba kêmbîyayîşê delîlan û seba polîsan sûcdarî qebûl nêkerd, qerarê nêtaqîbkerdişî dayî.

 

Serdozgerîya Komare ya Amedî şîdetê polîsan nêvînaye ameye û Elîfe bi bahaneyê hemverê polîsan de xo ver daya, nêverdaya ê wezîfeyê xo bikerê û qestî kes birîndarkerdişî ra dewa akerdî.