Marta somek

 

STENBOL- Endama Meclîsê Partîya HDPyî Semîha Şahîn dîyar kerd ke  reyke bîn kongre de vejîyayo werte ke HDP pirdê mabêne şaran o û ganî şar tewr zêde pîya têkoşîn bikero.

 

5in Kongreya Pîlî ya HDPyî 3ê Temmuze de bi tewrbîyayîşê hezaran kesî Salona Sporî ya Anqara de ame kerdiş. Kongre de xeylêk mesajî ameyî dayîş û ame vatiş ke yewin çareserî HDP yo. Her hetê Tirkîya û Rojhelat û Ewropa de xeylêk kesî kongre de cayê xo girewt. Kongre de Tifaqê Demokrasî mohrê xo da piro û mesajê xeylêk muhîmî ameyî dayîş.

 

Endamê Meclîsê Partî û Heyetê Dîsîplînî, Heyetê Şêwirmendî û Heyetê Pêkerdişî ameyî dîyarkerdiş. Semîha Şahîn seba Meclîsê Partîye ya demo newe ameye weçînayîş. Semîha derheqê kongre de fikrê xo ard ziwan.

 

Partîya ke vengê şaran ana têhet

 

Semîha dîyar kerd ke bi des hezaran kesî tewrê kongreye bîyê û vat: “2015ine dima faşîzmê AKP-MHPyî seba HDPyî krîmînalîze bikero, tecrîd bikero dewre û sîyasetê demokratîke tasfîye bikero muracatê her metodî keno. 10in serra HDPyî de kongreya 5ine de mesajê muhîm ameyî dayîş. Îqtîdar  hewl da ke HDPyî çin bikero. La roja ke ameyo awankerdiş, HDP bîyo partîya bindestan.”

 

Mohra xo da kongre ro

 

Semîha dîyar kerd ke prosesê dewaya kobanî, dewaya padayîşê HDPyî, destbendkerdişê 40 îdarekaranê Edenî, vistişê parlamenterîya 13 parlamenterî, destbendkerdişê hezaran kesî de kongre bi ca ameyo û wina vat: "Kongre de hem mesajê hemverê faşîzmî ameyo dayîş û hem zî seba hetê komelî û dostê Kurdan rê mesaj ameyo dayîş. Sewbîna mesajo ke vejîya vernî Tifaqê Demokrasî bi. Tifaqê demokrasî mohrê xo da kongre ro. Bi des hezaran kesî  verê aştî, têduştî û demokrasî de kongre de cayê xo girewtî. Keyeyê Metîn Lokumcu heta keyeyê Şenyaşarî, têkoşînê keyeyan kongre de ame vînayîş. Bi nê ma dî ke HDP partîyêke sîwanî yê xoverdayoxî ci de kom bîyê yo."

 

Xoverdayîşo tewr pîl yê hemverê faşîzmî…

 

Semîha vat, coşê kongre qet nêkewto û vat: "Fehmê HDPyî tena fînenê sîyasetê sindoq û Anqarayî xo xapênenê. No zî mojneno ke rastîya HDPyî baş nîna wendiş. Kongreya HDPyî mesajêk zaf zelal da. HDP bi xoverdayîşê şarî ameyo awankerdiş, partîyêke ke bi bedelê hempar yê şaran awan bîya. Tena partîya sindoqî nîya, weçînayîş û sîyasetî ya. HDP hemverê bindestîyê şaran,  barîkato tewr pîl o.  Vengdayîşê Tifaqê Demokrasî zî vengdayîşê rayîr ra şîyayîşî xeta têkoşînî yê hempar bi HDPyî dir yeno kerdiş o. Hewl danê ke vengê muxalîfan bidê vindarnayîş. HDP bêveng bo do heme muxalîfî bêrê bêvengkerdiş."

 

Mesajê pîlkerdişê têkoşînî

 

Semîha tewr peyîn wina vat: “Hêzo tewr pîl zî şaro ke qerar û coşê xo tewrê kongre kerdiş bi. Kongreya HDPyî eynî wextî de kongreya xorexnedayîşî zî bi. Kongreya ma na het ra mesajê pîlkerdişê têkoşînî da.”