ANQARA - Hemserekanê Pêroyî yê  HDPyî Pervîn Buldan û Mîthat Sancarî derheqê Roşanê Qurbanî de mesajêk pare kerdî û vatî ke wa roşan bibo wesîleyê aştî, têduştî û azadîye. 

 

Hemserekanê Pêroyî yê Partîya Demokratîke ya Şaran (HDP) Pervîn Buldan û Mîthat Sancar bi wesîleyê Roşanê Qurbanî mesajêk pare kerdî. Mesajê bi îmzayê Pervîn Buldan û Mîthat Sancarî de wina ame vatiş: "Ma Roşanê Qurbanî pîroz kenê û hêvî kenê ke sere de alemê Îslamî, seba heme şarê  Rojhelato Mîyanên û dinya rê bibo wesîleyê aştî, azadî û têduştî.” 

 

Mesaj wina yo: “Heyf û çi heyf ke ma Roşanê Qurbanî binê veresîya felaketan, hêrişê hîra yê hemverê şarî, krîzê ekonomî-sîyasî, veşanî û feqîrî yê seba îqtîdarî qewimyayî, pêşwazî kenê. Seba polîtîkayê şerî, rant û talanî yê AKPyî, şarê Tirkîya seba roşananê rasteqîn hesret mendê. Bi rastî zî se ra 90î komelî  şert û mercê roşanêkê rasteqîn ra bêpar ê. 

 

Labelê têkoşînê domdar ê heme derûdorê komelî û partîya ma û waştişê wayîrvejîyayîşê ameyoxê şarî, mijdanîya vurnayîşî dano. Nê rojê ke ma hetê têkoşînî de kewtê prosesê serkewtişî, hêvîya ma nika tewr zêde ya. Ya ke kongreya ma vurna baxçeyê şaran û vvurnayîşê Tirkîya; îradeyê şarê ma yê Newroze, 8ê Adare û 1ê Gulane de nîşanê her kesêk da ke serkewtiş nêzdî yo. No waştişê ma yo vurnayîşî, sebebê têkoşînê ma yo. Ma baş pê zanê ke her serkewtişêk bi nameyê komelî de bibo wesîle ke no serkewtiş sey roşanêk bêro pîrozkerdiş. Ma do qetî roşanê ke şarê ma heq keno, dîyarî înan bikerê. Ma Roşanê Qurbanî şima rê pîroz kenê, bi hêvîya ke sere de alemê Îslamî, seba heme şarê Rojhelato Mîyanên û dinya bibo  wesîleyê aştî, azadî û têduştî."