ANQARA - Parlamentera Partîya Keskan a Norveçî Bente Knagenhjelm û Sekreterê Pêroyî yê Sendîkayê Unîte The Unîon ê Îngîlîstanî û vervatoxê Însîyatîfê Ocalanî rê Azadî Tony Burke ke 5in Kongreya HDPyî de ca girewtî, derheqê tecrîdî de qisey kerdî û vatî, tecrîd bi tu hawa nîno qebûlkerdiş.

 

5in Kongreya Pîlî ya HDPyî 3ê Temmuze de bi tewrbîyayîşê bi hezaran kesî Salonê Sporî ya Anqarayî de ame kerdiş. Kongre de xeylêk mesajî ameyî dayîş û ame vatiş ke yewin çareserî HDP yo. Her çar hetê Tirkîya û Rojhelat û Ewropa de xeylêk kesî kongre de cayê xo girewtî.

 

Parlamentera Partîya Keskan a Norveçî Bente Knagenhjelm û Sekrterê Pêroyî yê Sendîkaya Unîte The Unîon ê Îngîlîstanî û vervatoxê Însîyatîfê Ocalanî rê Azadî Tony Burke zî tewrê kongre bî, muşahedeyîyê xo neql kerdî.

'Ez bi heyranî têkoşînê kurdan temaşe kena'

 

Bente dîyar kerd ke tewrbîyayîşê kongre seba aye tecrbuyêk muhîm o û coşê şarî bi heyranî temaşe kerda û wina vat: "Ez 4 serrî verê zî amebîya kongre. O wext zî ez xeylêk tesîr bîya. Mi waştêne reyna bêra la pandemî estbi. Nika ez ameya û xeylêk kêfweş a. Ez têkoşînê kurdan bi heyranî taqîb kena. Do no heta peynî seba mi wina bo. Ez seba dewaya Kobanî û roniştişê Selahattîn Demîrtaşî zî ameya. Mi dewa taqîb kerd. Bêhuqûqî qet nîno qebûlkerdiş. Tepiştişê sîyasetmedaranê kurdî nîno qebûlkerdiş."

 

‘Tecrîd nêeşkeno bêro qebûlkerdiş'

 

Bente dîyar kerd ke vatişê Rayberê PKKyî Abdullah Ocalanî ke pêvînayîşê peynî yê bi avûkatan dir ameyo kerdiş, kongre de ameyê vîrardiş û wina vat: "Ocalan çareserîya problemê kurdî de rolê muhîm o. Eke destûr bidê ke rolê xo kay bikero, do çareserî mumkin bo. Eke destûr bidayîne Ocalanî do rew ra nê problemî safî bikerdêne. Bi rastî no seba ma pêrûnan dej o. Nêverdenê Ocalan rolê xo kay bikero. Tecrîdê serê Ocalanî bi tu hawayî nêeşkeno bêro qebûlkerdiş. Sewbîna ikare bê qebûkirin. Her wiha hewldayîşê CPTyî zî qels ê. Rewşa Ocalanî ya Nelson Mandela ana vîrê merdimî. Ganî ma tewr zêde vengê xo vejê."

 

Sekreterê Pêroyî yê Sendîkaya Unîte The Unîon ê Îngîlîstanî û vervatoxê Însîyatîfê Ocalanî rê Azadî Tony Burke dîyar kerd ke mesajê ke kongreyî de ameyê dayîş, xeylêk muhîm bîyê û heta azadîya Ocalanî bi ca nêro do no têkoşîn dewam bikero û vat: "Her çîyêk hemverê Ocalanî de bi ca yeno, hêrişêk nêbaş o. Îngîlîstan de bi xêrê sendîkaya ma û sendîkayê bînan seba Ocalanî kampanya yenê kerdiş. Ma mîtîngan organîze kenê. Ganî ma nê xebatan xurt bikerê, ma bikerê rojeva pêro sendîkayan û partîya karkeran ê Îngîlîstanî. Çi heyf, Erdogan hêrişê xo yê hemverê HDPyî û kurdan dewam keno. Seba nê hêrişî peynî bibê, ganî ma bixebityê."

‘Mandelayê Rojhelatê Mîyanên o'

 

Tonyî bale ant serê vatişê Rayberê PKKyî yê derheqê çareserîya problemê kurdî de û wina vat: "Ocalan wayîrê tecrubeyêk pîl o. Pêwa nê Ocalan hetê komelî ra yeno qebûlkerdiş û xeylêk heskerdiş. Seba nê zî dewlete xeylêk Ocalanî ra tersena. No demêk derg o binê tecrîdî de yo û sebebê nê zî no yo. Ocalan bi rastî zî Mandelayê Rojhelatê Mîyanên o. Ma xeylêk rey nê her ca de ardo ziwan. Ma kampanya bi ca ardî û ma vat, ma seba Ocalanî ganî wina bikerê. Nika Ewropa de kampanyayî dewam kenê. Hêvîdar a do DYA de zî pîl bibê. Erdogan hêz û zanayîşê Ocalanî ra terseno. Seba nê zî  demêk derg o tecrîd keno. Erdogan nêwazeno merdimî bibê yew. Polîtîkayê înan oyo ke şaran yewbînan dir sûr bikero."