MERKEZÊ XEBERAN - Goreyê raporê Rêxistina Heqê Merdiman ê Efrîn-Sûrîyeye, Kantonê Efrînî mîyan de cinîyêke, 45 welatijî ameyî remnayîş, sewbîna seba bazirganî zî 900 darî ameyî birnayîş.

 

Bi 4 serrî yo Artêşa Tirke û çeteyê ci kantonê Efrînî de yê û roniştoxê ci koçberê kantonê Şehbayî bîyî. Rêxistinê Heqê Merdiman ê Efrîn-Sûrîyeye raporê xo yê menga hezîrane eşkera kerd. Goreyê raporî mîyan de cinîyêke, 45 welatijî ameyî remnayîş. Sewbîna bi amancê xirakerdişê xoza û bazirganiyî 900î ra zêdeyêr darî ameyê birnayîş.

 

Rapor de wina ame vatiş: 

 

"Qezaya Cindirêsî ya kantonê Efrînî ya îşxalkerde de MÎT û çeteyê El-Hemzat, çeteyê Polîsê Leşkerî û Feyleq El-Şamî 14 welatijî remnayî.

 

Çeteyê Emşat, Cebhe El-Şamiyî û çeteyê Polîsê Sivîl û Polîsê Leşkerî bi bahaneyê bêbingeh qezayanê; Şiyê, Şêrawa, Bilbil û Mabata de zî 11 welatijî remnayî ke înan ra yew zî cinî ya.

 

Qezaya Şêrawa de çeteyê Feyleq El-Şamî, çeteyê Polîsê Leşkerî û çeteyê “Asayîşê Sîyasî” 13 welatijî remna.

 

Qezaya Raco û merkezê kantonê Efrînî yê îşxalkerde de zî, MÎT û çeteyê Ehrar El-Şerqiyî û çeteyê Polîsê Leşkerî 7 welatijî remnayî.

 

Çeteyê artêşa Tirke seranserê kantonê Efrînî de 900 ra zêdeyêr darê (zeytûn, hinare û darê bînî) birnayî ke bi kolîyan bazirganî bikerê û xoza wêran kenê.

 

6 mengî destpêkê yê emsar de, mîyan de 30 cinî, 346 welatijî ameyê remnayîş, 18 kesî ameyî qetilkerdiş. Sewbîna zêdeyêrê 8 hezar û 500 darî ameyî birnayîş û 300 darê bînî zî veşnayê, eynî wextî de bi desin hektarî daristan û zîyan ame veşnayîş.