ANQARA - Keyeyê kesê ke têkoşînê demokrasî de dinyaya xo bedilnayê, hetê zîhnîyeta faşîstî ra ameyê qetilkerdiş beşdarê 5in Kongreya Awarte ya HDPyî bî. Keyeyan kongre de tedayê serê HDPyî de ercnayî û mesajê HDP nêeşkeno bêro padayîş, dayî.

 

3yê Temmuze de Partîya Demokratîke ya Şaran (HDP) Eywana Sporî ya Anqarayî de 5ine Kongreya xo ya Awarte organîze kerd. Bi hezaran kesî û xeylêk temsîlkarê sîyasî, sewbîna kesê ke têkoşînê demokrasî de dinyaya xo bedilnayê û hetê zîhnîyetê faşîstî ra ameyê qetilkerdiş, beşdarê 5in Kongreya Awarte ya HDPyî bî. Keyeyê ke beşdarê kongre bî mesajê serkewtişî dayî.

 

'Ma estê ma do serbikewê'

 

Dayîka Deniz Poyraza ke awanîya  HDPyî ya Îzmir de ameye qetilkerdiş, Fehîme Poyraz mesajê do serbikewê da. Fehîme dîyar kerd ke ê seba şarî beşdarê kongre bîyê û wina vat: "Seba ke ez şarî bivînî, ez ameya kongre. Mi şarî dî ez xeylêk kêfweş bîya. Xeylêk kes ameyo. Ma estê, ma do serbikewê. HDP nêeşkeno bêro padayîş. Şarê Kurdî do her wext serê payan de bê."

 

'Dewayê padayîşî seba bêzarîya înan a'

 

Kênaya Musa Anter, Rahşan Anter ke beşdarê kongreye bî, kêfweşîya xo pare kerd û vat: "Tabîrêk est o; gewiznayîşê mîyanê herre de. Wexto ke nêeşkê, xo mîyanê herre de gewiznenê. Xeylêk tutî zere de yê. Yê ke teber de yê, binê tehluke de yê la nêeşkenê zorê înan berê. Ewro hende însanî ameyî tîya. No zî mi zaf kêfweş kerd. Ma xeylêk bêrîya tutanê xo yê zere kerdo. Wa lezkî bêrê veradayîş."

 

'Do HDP hîna zêde pîl bibo'

 

Dayîka Şemeyî Hanîfe Yildiz, operasyonê sîyasî rexne kerd û vat, ê pey HDPyî de yê. Hanîfe vat: "Wa bêrê nê şarî ra biewnê. Wa Newroze de cinîyan biewnê. Ma do serbikewê. Ma pey paşta HDPyî de yê, ma do tewr pîl bibê. Ddewayê ke akerdê pêro bahane yê. La ma do pîl bibê. Gama ke ma bibê yew, do her çî bibo. Goreyê AKPyî, ma pêro  'terorîst ê' la HDP kîşte şarî de yo."

 

'Ma edalet wazenê'

 

Hemşaredara Şaredarîya Pirsûsî Hatice Çevik ke vera ci qeyûm ame tayinkerdiş û eynî wextî de kênaya ci Qirkerdişê Garê Anqarayî de dinyaya xo bedilnaye wina vat: "Ma waştiş kenê ke edalet û aştî bêro Tirkîya. Ma nê seba Tirkîya û Rojhelatê Mîyanên wazenê. Seba heme şarê ke yenê pelçiqnayîş û nêheqî înan rê yeno kerdiş, ma edalet û aştî wazenê. Ma bawer kenê ke ma do aştîye bîyarê. Bi na wesîla cigêrayîşê ma yê edaletî yê Keyeyê Şenyaşarî nimûne yo. Ma zî sey Keyeyê 10ê Teşrîna Verêne edalet gêrenê. HDP Tirkîya de çareserîyê mende pêşkêş dkeno û heme şar cayêk de kom bîyo. Ma zanê ke do HDP aştî û demokrasî bîyaro. HDP bêro padayîş zî do fikrê ci dewam bikero. ma tena nîyê. Merdimê newe yenê. Dewa û padayîş çareserî nîyo. HDP do dewam bikero."