Derya Ren

 

AMED - Endama Komîsyonê Cinîyan ê Merkezê Kulturê Kurdî yê Theofilosî yê Qibrisî Fatma Jirkî, bale ant serê kampanyaya ke seba azadîya Rayberê PKKyî Abdullah Ocalanî ameya destpêkerdiş û vat: "Heta nika 35 hezarî îmza arêdayê la amanc kenê heta payîzî 60 hezar îmza arê bidê."

 

Avûkatanê Rayberê PKKyî Abdullah Ocalanî seba pêvînayîşê bi muwekîlê xo dir mîyanê hewteyî de bikerê, di rey muracat kenê labelê cewabêk ne negatîf ne zî pozîtîf nîno dayene. Avûkatanê Abdullah Ocalanî ra, Rezan Sarica û Newroz Uysal dimayê 8 serran, 2-22yê gulane de, 12-18ê hezîrane de û 7ê tebaxa serra 2019ine de eşkabî bi muwekîlê xo dir pêvînayîş bikerê. Abdullah Ocalan, yewin rey eşkabi 27ê nîsana 2020î de heqê xo yê telefonî bixebitno. Seba ke qesawetê rayapêroyî derheqê Abdullah Ocalanî de zêde bîbî, 25ê adare de serê telefonî de bi birayê xo Mehmet Ocalanî dir pêvînayîş kerdibi. Mehmet Ocalanî, dîyar kerdibi ke qiseykerdişê înan nîme de ameyo birnayîş.

 

Reaksîyon û nêrazîbîyayîşê hemverê tecrîdî dewam kenê. Merkezê Kurdî yê Theofilosî yê Qibrisî tewrê kampanyaya ke seba azadîya Abdullah Ocalanî amebî destpêkerdiş, bi. Merkez,  vîrardişê Serekê Komîteyê Paştdayîşê Kurdistanî yê Qibrisî Theofilos Georgiadîs ke 20ê adara 1994ine de ame qetilkerdiş, ame akerdiş. No merkez hetkarî dano kesê ke Tirkîya ra koçber bîyê.

 

Endama Komîsyonê Cinîyan ê Merkezê Kulturê Kurdî yê Theofilosî Fatma Jirkî ajansê ma rê qisey kerd û bale ante serê xebatanê kampanya. 

 

'Çi beno wa bibo ma do serbikewê'

 

Fatma, destpêkê qiseykerdişê xo de bale ant serê tecrîdê hemverê  Rayberê PKKyî Abdullah Ocalanî û vat: "Tena Dewleta Tirkî ney, dewletê hegemonîk zî hemkarê tecrîdî yê. No hetkarî bi komplo dest pêkerd û heta ewro zî dewam kerd. Heme dewletî nika hemverê zulmê ke Şarê Kurdî rê beno û vera tecrîdî de bêveng ê. CPT zî mîyan de. Serek Apo seba azadîya şaran 50 serrî yo têkoşîn kenê. Tu cayêk dinya de hemverê rayberêk tecrîdêko winasî nêameyo kerdiş. Ma do hemverê nê polîtîkayan bi Şarê Kurdî dir têkoşîn bikerê. Se beno wa bibo ma do serbikewê. Serek Apo hemverê polîtîkayê tecrîdî xo ver dano."

 

‘Seba azadîya cinîyan têkoşînêk pîl dayo'

 

Fatma, dîyar kerd ke sere de welatê Ewropa de seba azadîya Abdullah Ocalanî kampanyayêke ameya destpêkerdiş û wina vat: "Xeylêk welatan de çalakîyê tewir bi tewir yenê kerdiş. No çî muhîm o. Qibris de zî çalakî estê. Heta Serek Apo azad bibo, ma do xo ver bidê. Seba ke bîyayîşê Serek Apo, bîyayîşê Şarê Kurdî yo. Sere de cinîyê kurdî û Şarê Kurdî ganî bibê yew û seba azadîya Serek Apo têkoşîn bikerê. Serek Apo seba azadîya cinîyan têkoşînêko pîl dayo. Heta ke azadîya fizîkî ya Serek Apo bi ca nêro, komel zî azad nêbeno. Sere de cinî azad nêbenê. Ma sey merkezê kulturî  xebatanê xo dewam kenê. Labelê merkezê ma zêde nîno naskerdiş û demo ke ma verê xo danê kuçeyan, seba arêdayîşê îmzayan, ma ziwanê yewbînan zêde fam nêkenê. La demo ke ma vanê, seba Serek Apo ma îmza arêdanê, ca de îmza kenê."

 

'Ma 35 hezarî îmza arêda'

 

Fatma vat, amanc kenê heta mewsîmê payîzî 60 hezar îmza arêdê û vat: "Mabêne serranê 2013 û 2014ine de seba azadîya Serek Apo derûdorê Rumanî de ma 60 hezarî îmza arêdabi. Nika reyna ma îmza arêdanê. Reyan ma bi nîjadperestê tirkî dir yenê rî bi rî û vatişê nêbaş kenê. Labelê ganî bêro zanayîş ke pêwa her tweir hêriş û astengîyan ma do tîya xebate xo dewam bikerê. Sewbîna heta nika ma 35 hezarî îmza arêda. Labelê ma amanc kenê ke heta payîzî 60 hezarî îmza arêdê. Nê îmzayê ke ameyê arêdayîşî do bibê cewabêk."

 

Fatma wina qiseykerdişê xo qedêna: "Ez venga dewlatan kena, wa nêbê hemkarê sûcê Tirkîya. Wa kes serê kurdan de bazar nêkerê. Wa kurdan nêkerê hacetê berjewendîyê xo."