AMED - Aktîvîsta TJA’yî Zelal Bîlgîn ke tepişte ya, derheqê cezaya ke gumanbarê Pinar Gultekîne rê ame birnayîş de mektubêke nuşte û vat: "Ma cinî tu wext fek ci ra vera nêdanê. Ma do bibê kabusê şima û şima rehet nêverdê."

 

Roniştişê dewaya kiştoxê Pinar Gultekîne, Cemal Metîn Avci ke bi îşkence Pinare kişt, kesê ke ey dir bî hetkar; Mertcan Avci, dayîka kiştoxî Ayten Avci, pîyê ci Selîm Avci, cinîya ci ke ci ra visyaya Eda Karagun û şirîkê ci Gokhan Orhan ke seba sîyakerdişê delîlan ameyîne muhakemekerdiş, roniştiş 3. Dadgeha Cezaya Giran ya Muglayî de ame vînayîş. Dimayê goşdarîkerdişê avûkatanê hetan,  heyetê dadgehe derheqê Metîn Avci de cezaya muebeta giran da, la dima ra na ceza bi bahaneyê ke tahrîk bîyo, vist 23 serran û derheqê gumanbaranê bînan de zî qerarê beraetî da.

 

Dozgerî îtîrazê qerarê dadgehe kerdibi, mutalayî de seba gumanbarî cezaya muebetê giran waştibi. Sewbîna dozgerî seba gumanbarê bînî zî sucê ke delîlan nimitê, waştişê ceza kerdibi.

 

Aktîvîsta TJA’yî Zelal Bîlgîn ke Zîndanê Cinîyan ê Amedî de manena, derheqê babete de JINNEWSî rê mektubêke şawite.

 

Mektuba Zelale wina ya:

 

“Zîhnîyetê serdest yê camêrdî, tarîx ra heta nika bi pêro tecrubeyê şerî xo her ca de mende kerdo û şerê ci yê hemverê cinî zî resayo sewîyeyêka bêahlaq û wehşet. Îqtîdar bi terso ke vînî bikero, bi pêro mekanîzmayê xo hêrîşê cinîyan keno. Ma bi bawerîya têkoşîn û azadîya nasnameyê xo rê têkoşînê xo dewam kenê û seba nê zî ma esîr ameyê girewtiş. Yê ke eşkenê qetil bikerê kenê û yê ke nêeşkenê zî esîr gênê û hewl danê ke têkoşînê azadîye vindarnê. Ma ça de bê zî, ma do fek xoverdayîşî ra vera nêdê. Ê baş zanê.

 

Qerarê ke hukmî dayo

 

Reyna merdim zîndanan ra teber ra ewnîyeno, rewşe xeylêk bi dej a. Kanalanê neteweyî yê hewze de ma kiştişê cinîyan vînenê, şîdetê serê cinîyan de vînenê. Ma bêçaretî yê nê ciwîyenê û hêrsê xo girs kenê. Seba şert û mercê xoverdayîşê ma, destê ma ra ameyo girewtiş no zî beno sebebê serewedaritişê ma. Hemverê nê caardişanê ke merdimî cuye ra kenê, sere nêwedaritiş mumkin o gelo? Hemverê nê wehşetê dewleta camêrdan gelo ma heme tehluke de nîyê? Qerarê ke hukm dano, her çî baş vejeno werte. Kiştoxê bi tahrîkê bêheq cezayê înan fînenê û cesaret danê camêrdan. Gelo kamci qerarê hukmî bêhet û adîlane yo?

 

Cinîyê Kurdî seba nasnameyê polîtîk, muxalîfbîyayîş û Kurdbîyayîşî terorîst yenê îlankerdiş û rastê cezayê giranan yenê. Seba  cînayetê cinîyan zî qerarê ke yenê dayîş her çî zelal baş ramojneo.

 

Qerarê derheqê Pinare de skandal o

 

Vatişê roniştişê gumanbarê Pinar Gultekîne de, bahaneyê vistişê ceza, cezaya ke gumanbarî rê ameya birnayîş, skandalêkê newe yê hukmî yo. Pinare cinîyêka ke kelecanê cuye ciwîyayîne û cinîyêka ke hêvî û xeyalê aye yê cuye bîye. n Pinara ke bi pêro cinîyan dir mîyanê paştdayîşî de bîye û cinîyêka ke vindertişê aye zelal bi. Eke cuye ra nêameyîne visnayîş do ewro têkoşînê xo pîl bikerêne. Do her ware de kîşte cinîyan de bîne. La wina nêbi. Bi organîzekerde ameye qetilkerdiş û bî qurbanê cînayetêk ke hemkarî ameyo kerdiş. Şîdet dî, ameye xeniqayîş û varîlî de ameye veşnayîş. Kiştoxo çimsûr ke îdia kerd bedenê aye ya bê can veşna yo, netîceyê otopsî de vejîya werte ke demo ke Pinare veşaya hema gane bîya.

 

Erdogan çira na babete de qisey nêkeno?

 

Dima ra, dima ra se bi? Çîyê ke ma xerîb nîyê ameyî ca û cinî hedef ameyî girewtiş û vatişê ehlaqî kewtî dewre. Vernê de ehlaqê Pinare ame cipersayîş, dima ra cuye aye ya xususî ameye serûbinkerdiş. Seba îdiayê kiştoxî, telefonê aye şawitî cigêrayîşî û vatî pak o. Yanî sey kiştoxî îdia kerdibi; dîmen, qeyd û mesajê şantajî çinbî. Netîceyê roniştişê bi mengan dewam kerdêne de 20’ê hezîrane de qerar ame dayene. Erdogan ke vatêne, êdî kiştişê cinîyan de tahrîk, rewşa baş, poşmanî çin o û nê cezayî nînê warî la hema na babete de qisey nêkerdo.

 

Seba ke rincan bi na ceza ameye vistiş?

 

Gelo no tahrîkê bêheq çi bi tîya de? Wexto ke plan kerd rincan bi, wexto ke hemkarê sucî dî rincan bi? Yan zî wexto ke Pinare îkna kerdêne xo dir bero? Yan zî rijnayîşê betonî de zehmetî  ant, wexto ke çakmak fîna ta rincan bi? yan zî wexto ke çal kerdêne a? Çi bi no tahrîko bêheq? Pêro delîlî werte de bî la no tahrîko bêheq çi bi? Bi Pinare dir edalet merd, heqîqet merd, cînayetî dewam kerdî. Seba kiştoxê çimsûrî vernê de muebet ame waştiş, dima ra fînayî 23 serrî û seba tahrîkê bêheq no kewt 14 serran. Do wextêk kilm de zî pakêtêka hukmî ra bi efû bêro vetiş.

 

Keye senîn ame beratkerdiş

 

Heme şert û mercê cînayetê cinîyan bi hetkarîya dewlete û hukmî de saxlem benê. Bêguman hema xeylêk babetan de sereyê ma têmîyan de yo. Ma înan bi çend  persan cewab bikerê. Pey nê çimsûrî û keyeyî de kam est o, kamci cemaet û kamci selahîyetdar esto? Nasnayîşê nîyetê baş û masumîyetê avûkatê çimsûrî çi yo? Cayê çalkerdişê gelo nîşaneyê kamci nîyetê başî yo? La keye û hemkarê ci, senîn beno ke pêwa pêro delîlan yenê beratkerdiş? Sewbîna şeklê îcrakerdişê meslegî yê avûkatê gumanbarî, vatişê nefret û cinsperest, gelo şima zî bêzar nêkeno. Gelo ganî etîk û ehlaqê meslegê avûkatî tîya d enêro cipersayîş û munaqeşekerdiş?

 

Ma do bibê vengê yewbînan

 

Têkoşînê cinîyan babeta vatişî ya. Gama ke babete bena cuya cinî, bi hemkarîya camêrdan her ware de rastê hêrişan yena. Hemverê nê pêroyî de çîyo ke camêrdî kenê xo vîr ra est o. Ma cinî tu wext fek vera nêdanê. Ma do bibê kabusê şima û hewnê şima biremnê û şima bêzar bikerê. Ma cinîyê ke dinya de mendê, hemverê pêro çekê şima her ware de pawitişê cewherî bikerê. Ma bibê veng, boye û bedenê yewbînan. Ma do hemverê pêro çalakîyanê şima yê wehşet de ma do bibê qîrînayîşê çalakîya şorişgêr."