Yara Kendeş

 

KOBANÊ - Derheqê hêrişê dewleta tirke yê serê Başûr û Rojawanê Kurdistanî û amancê hêrişan de Dayîka Aştîye Emîne Dawod wina vat: "Bibê cewab û rayîr medê gonîwerê ke welatê ma îşxal kenê."

 

No wextêko derg o dewleta tirke wareyanê Başûrê Kurdistanî de operasyonê leşkerî yê teberê huqûqê mîyanneteweyî kena.  Tirkîya bi hemkarîya NATO û Îranî de bi nê operesyonê xo yê bi serran o Başûr û Rojawanê Kurdistanî de dewam kena. Nê hêzî benê asteng ke kurdî sey her şarê bînî statuyê xo yê sîyasî goreyê waştişê xo bikerê. Tirkîya menga nîsane de hêrişêkê hîra bi hetkarîya PDK'yî de berd serê Başûrê Kurdistanî û nê hêrîşan hema dewam kena. Eynî wextî de zî hêrişê dewleta tirke û komê girêdayê ci serê Rojawanê Kurdistanî de dewam kenê.

 

Derheqê babete de Dayîka Aştîye Emîne Dawoda ke dewa Qeremûxayî ra ya û Kantonê Kobanî de ciwîyena, ajansê ma rê ercnayîş kerd.

 

'Ma hêrişan şermezar kenê'

 

Emîne, dayîka di cangorîyê azadîye ya û wina reaksîyonê xo vera hêrişan mojnena: "Ma hêrişê naletî yê dewleta tirke şermezar kenê. Dewleta tirke bê hesab hêriş kena. Hem hêrişê mintiqaya Rojawanê Kurdistanî, sewbîna yê Başûrî zî kena. Tu mintiqa de hizûr nêverdena, hema hêriş kena. Nê îşxalkerdoxî ne wext zanê, ne zî kesan nas kenê û ne zî vanê ma se kenê. Dewleta tirke mabêne nêdana ke vindera, hêrişan kêm bikera û biewna derûdorê xo ra vaja, ez qirkerdişan kena. Ma no çî verê çiman de nêaseno, senî bi."

 

'Nêeşkenê Şarê Kurdî ke wayîrê tarîxêk bi têkoşîn o, zor berê'

 

Emîne, mîyanê qiseykerdişê xo de qalê hêrişê dewleta tirke yê serê her di hetê Kurdistanî kerd û vat: "Dewleta tirke çi karê aye tîya est o ke her roje bi rayîr û metodê cîya hêrişê ma kena. Sewbîna mintiqaya  Vakur û Rojhelatê Sûrîye de waştişê  32 km kena. Serê çi esasî de nê çî wazena? Her tim topanê xo serê keyeyanê sivîlan de erzena. Nêfikrîyena ke a tutan qetil kena, qirkerdişan kena. Şima herra ma ra çi wazenê? Xora fikrîyena împaratorîya Osmanîyan newe ra gandar bika. Do no zî bibo hewn û xeyalê ci. Seba ke ma rayîr nêdanê ci ke mîyanê herra ma de têmîyanî, ters û multecîtî awan bikero. A vana kurdêke ça bibo, ez çin bikerî. Eke kurdêke peynîya dinya de bo zî vana, ez xo biresnê û çin bikerî. La nêeşkenê Şarê Kurdî ke wayîrê tarîxêko bi têkoşîn awan bîyo, zor berê."

 

'Ma nika her demî ra tewr zêde bi hêz û amade yê'

 

Emîne dewam de wina vat: "Ma baş vînenê ke bi çi rengî hêrişê serê Başûrî de yeno kerdiş. Eynî wextî zî nê çekê ke dinya qedexe kerda, serê koyanê Kurdistanî de yenê xebitnayîş. Ma qet kes nêvîneno na rewşa xirabe ya hemverê huqûq û sîstemê merdimayî yê mîyanneteweyî? Reyna zî hêrişê xo verê ra tewr zêde kerda. Nika hêrişê înan tena hetê eskerî de nîyo. Bêguman bi rayîrê şerê taybet zî hêrişê xo tewr zêde kerdê. Her wext wazena ma herra ma ra bivisno. Ma nika verê ra tewr bi hêz û amade yê. Ê do nêeşkê zorê hêzê ma berê."

 

'Bibê cewab û rayîr nêdê gonîweran ke welatê ma îşxal kenê'

 

Emîne tewr peyîn vat, ma wayîrê dewaya xo yê û wina qedêna: "Ma qetî nê hêrişan serê şarê xo de qebûl nêkenê. Ma nêverdenê îşxalkerdoxî ma qir bikerê, bi nê hêrişan bîyayîşê ma vînî bikero. Ma wayîrê dewaya xo yê. Ma hende şehîd dayê. Ma serê fikr û felsefeyê Rayber Apo de yê. Vengdayîşê mi heme pêameyîşan ê her çar parçeyê Kurditanî esto ke hemverê nê hêrişan de bibê cewab û rayîr nêdê gonîweran ke welatê ma îşxal bikerê."