AMED - Ablûqakerdişê awanîya  produksîyonê Piya û Arîyî 27 rojî yo dewam keno. Polîsî şewe û roje verê awanî de vindernayeyê.

 

Amed de 8’ê hezîrane de 20 ci ra rojnamegerî, bi pêroyî 22 kesî ameyî destbendkerdiş û erzîya serê produksîyonî, Sereştişê kargehê çapemenîye de xeylêk kamera, komputur û materyalê dijîtalî desteser kerdî. Roja sereştişî ra operasyonê ke ame kerdiş ra heta nika 27 rojî yo awanîya produksîyonê Pîya û Arî binê ablûqa de yo. Her di berê awanî bi polîsan pirrî yo û şewe û roje verde vinderte yê. Destûr nîno dayîş ke xebatkarî şêrê kargeh. Avûkatê ke derheqê babete de muracat kerdî zî înan ra ame vatiş ke, "cigêrayîş dewam keno" û destûrê dekewtiş û vejîyayîşî çin o. 

 

Se bibi?

 

Çarçewaya cipersayîşê Serdozgerîya Komare ya Amedî de 20 ci ra rojnamegerî, bi pêroyî 22 kesî amebî destbendkerdiş.  Rojnamegeran ra Mudûra JINNEWS’î Safîye Alagaş, Hemserekê DFG’î Serdar Altan, Mudûrê Karê Nuşteyî yê Rojnameyê Xwebûnî Mehmet Alî Ertaş, Edîtorê MA’yî Azîz Oruç, edîtorê Xwebûnî Zeynel Abîdîn Bûlût, rojnameger Omer Çelîk, Mazlum Guler, Îbrahîm Koyuncu, Neşe Toprak, Elîf Ungur, Abdurrahman Oncu, Suat Doguhan, Remziye Temel, Ramazan Gecîken, Lezgîn Akdenîz û Mehmet Şahîn bi îdiayê “endamîya rêxistine” ameyî tepiştiş. Heto bîn ra Gulşen Koçuk, Esmer Tunç, Mehmet Yalçin, Kadîr Bayram, Feynaz Koçuk û Îhsan Ergulen zî bi şertê kontrolê edlî amebî veradayîş.