ŞIRNEX - Talankerdişê xoza û birnayîşê daran ke hetê qorîcîyan ê mintiqaya Besta, Koyê Cûdî û Gabarî yê Şirnexî dewam keno. Ame dîyarkerdiş ke tena mintiqaya Bestayî de 14 cayê cîya de dest bi birnayîşê daran û talankerdişê xoza ameyo kerdiş.

 

Çarçewaya operasyonan de birnayîşê daran ke daristanê mintiqaya Besta, Koyê Cudî û Gabarî yê Şirnexî de ameyê destpêkerdiş, bêmabên dewam keno. Her serre bi ameyîşê mewsîmê hamnanî dir birnayîşê daran ke hetê qorîcîyan ra binê muşahedeyê cendirmeyan de yeno kerdiş, dewam keno. Goreyê xebera Ajansê Mezopotamyayî (MA) darê ke se serre yê yenê birnayîş, bi kamyonan yenê barkerdiş û anê hîn nuqtayê Şirnexî. Goreyê raporê Mudurîyê Pêroyî yê Daristanan ê serra 2021’î, Şirnex de wareyê daristanî se ra 8 kêm bî, ame tespîtkerdiş. Mintiqa de birnayîşê daran dewam keno û nuqtayê ke darî yenê birnayîş, wargehên cendirmeyan yeno viraştiş. Birnayîşê daran ê mintiqa ver bi hetê Sêrtî de dewam keno û destûr nîno dayîş ke welatijê mintiqa û koçerî bikewê mintiqa.

 

Darî bi tewrbîyayîşê qorîcîyan yenê birnayîş

 

Mintiqaya Bestayî de yew wareyêk darî nînê birnayîş çin o, bi tonan darî bi tewrbîyayîşê qorîcîyan yenê birnayîş. Ame zanayîş ke nika zî mintiqayê; Kaniyamîr, Birateto, Birapeşo, Deyndarok, Cinîwer, Belûzer, Rîsor, Serêrû, Tîkera, Qurteka peşiya, Girêdeyince, Şerevan, Xirtkbestê û Navyanî de birnayîşê daran dewam keno. Ame dîyarkerdiş ke darê ke nê mintiqayan de yenê birnayîş, mintiqaya Navyanî ya girêdayê koyê  Cûdî yenê komkerdiş û tîya ra zî bar kenê kamyonan û benê. 

 

'Seba ke wareyê cendirmeyan yo, ma nêeşkenê çîyêk bikerê!'

 

Hemverê birnayîşê daran ê 14 mintiqayan de ameyo destpêkerdiş, bêvengîya selahîyetdaranê mintiqa zî dewam keno, bi birnayîşî daran yeno waştiş ke mintiqa bi temamî bêboye verdê. Waştişnameyê ke welatijê mintiqa seba ke birnayîşê daran bêro vindarnayîş, Mudurîyê Mintiqaya Daristanan ê Rihayî kerdibî zî bi vatişê, “Seba ke wareyê cendirmeyan o, ma nêeşkenê çîyêk bikerê" no waştişê înan amebi redkerdiş.