Zelal Tunç

 

WAN - Sekretera Temsîlkarîya TÎHV'î yê Wanî Sevîm Çîçek derheqê raporê ATK’yî yê seba tepişteyanê nêweşan seke, ‘eşkenê tepişte bimanê' de qisey kerd û vat, ATK suc keno û wina vat. "Nê mekerê, bi polîtîkayê xo yê asayîşî mebê sebebê cuya merdiman."

 

Binpaykerdişê heqan ê zîndanan ra rewşa tepişteyê nêweşan giran bena û sewbîna înfazê tepişteyan yeno veşnayîş. ATK vera tepişteyê ke rewşa înan giran a, tahliye bikero raporê ‘eşkeno/a tepişte bimano/a' dano. ATK’yî tewr peyîn seba sîyasetmedara kurde Aysel Tugluk, seba tepişteyo nêweş Mehmet Emîn Ozkano 83 serre û Makbule Ozera 80 serrî rê raporê ‘eşkeno/a tepişte bimano/a' da.

 

Sekretera Temsîlkarîya TÎHVî ya Wanî Sevîm Çîçek derheqê rewşa tepişteyan û qeraranê ATK’yî de ercnayîş kerd.

 

Tirkîya de 314 hezar û 502 tepişteyî estê

 

Sevîme dîyar kerd ke binpaykerdişê heqan resayo sewîyeyêka xidar û vat: “Îqtîdar bi perspektîfê heqê merdiman, bi polîtîkayê asayîşî de israrê xo dewam keno û nika 314 hezar û 502 tepişteyî estê. Na hûmare xeylêk serê kapasîteyî de ya. No bi tena sereyê xo problemêk o. La rewşêke bîne esta ke tepişteyî binê tehluke de yê. No xeylêk bi dej o. Vatişê derheqê nê de xeylêk muhîm ê. Ma çiqas erey bimanê, do tepişteyî hende tehluke de bê."

 

‘Berpirsîyarîya dewlete esta’

 

Sevîme dîyar kerd ke serê serra 2021’î ra heta nika 46 tepişteyan dinyaya xo bedilnaye û wina ercna: "La rewşa tewr muhîm a ya ke ma xo nêresnenê zanayîşê derheqê rewşa tepişteyan de. Tepişteyî nêeşkenê xo biresnê heqê xo yê resnayîşê weşîye. Revîran de personelî çin ê. Demê xo de tepişteyî nînê sewqkerdiş. Nêweşan  bi rîng benê û nêweşxane de zî kelemçe anêkenê. Demê agêrayîşî de zî seba pandemîyî hucre de gênê. Seba nê caardişan zî nêweşî nêwazenê şêrê nêweşxane. No tercîhêk nîyo. La 14 rojî hucre de mendiş, babeta vatişî ya. Tîya de ma vanê ke sînorkerdişê azadîya kesêkê babeta vatişî ya. Tîya de berpirsyarîya dewlete esto. Pêro heqê tepişteyan ra dewlete berpirsîyar a. Dewlete babeta zîndanan de berpirsyariya xo bi ca nêana. Na babete de ma probleman anê ziwan la ê ker û lal ê.”

 

‘ATK goreyê îqtîdarî têgêreno'

 

Sevîme bale ant serê ATK’yî û wina vat: "ATK  çarçewaya zanistî de hereket nêkeno. ATK seba tepişteyan ganî raporê zanistî bido. La ma ewnîyeyêne ke ATK  zanistî ra dûr, objektîfbîyayîşî ra dûr hereket keno. Raporî xoser û bêhet nîyê. Ganî heyetê xoser şêrê serdayîşê tepişteyan. La bi tu hawayî nêeşkenê şêrê. Tepişteyê nêweşî bi xeylêk binpaykerdişan dir yenê rî bi rî. Tepişteyî prosesê sewqkerdiş û surgunî ciwîyenê. Ma serê xeberdarîya keyeyan, avûkatan û reyna zî mektuban de eşkenê bimusê."

 

Raporan de îdiayê dadgehe ca gênê

 

Sevîme bale ant serê rewşa sîyasetmedara Kurde Aysel Tugluk û dîyar kerd ke ganî Aysele bêra veradayîş û vat: "Raporê Unîversîteya Kocaeliyî ra hetê ATK’yî ra ame redkerdiş. Goreyê rapor dayê ATK’yî, ganî tewr tay 3 hewteyan Aysele bêra taqîbkerdiş la  ATK hîrê rojî de rapor reyna peyser şaweno. Raporê ATK’yî yê derheqê weşîya Aysele de îdiayê dadgehan ca gênê. No zî xora her çî mojneno.  Ganî ATK prosesê raporê tepişteyanê nêweşan de qerarê pozîtîf bido. Heto bîn ra ATK qerarê pozîtîf bido zî na rey zî dozgerî erjneno. Ganî fek nê caardişan ra vera bido. No bê wijdanî yo û rewşa nê tepişteyan bi tu hawayî nîno qebûlkerdiş."

 

‘Mebê sebebê cuya merdiman'

 

Sevîme tewr peyîn wina veng da: “Nê mekerê. Bi polîtîkayê xo yê binê nameyê asayîşî de mebê sebebê cuya merdiman. Fek nê nêzdîbîyayîşan vera bidê. Berpisyariya sazgehî o yo ke xoser û bêhet bo. Na nuqta de ganî her kes wezîfeyê xo bikero."