ENQERE - Mesajê sîyasetmedarê tepişteyî ro Kongreya HDPyî de ame wendiş. Cinîyê sîyasetmedarî yê Zîndanê  Kandirayî de tepişte yê, mesajê xo de vatî, "Vengê şima do sey qîrînayîşê azadîye yê hemverê esîrgirewtişê Ocalanî vejîyo."

 

Mesajê sîyasetmedarê tepişteyî 5. Kongreya Pîlî ya Asayî ya Partîya Demokratîke ya Şaran (HDP) de ame wendiş.

 

Mesajê Kandira

 

Hemsereka Pêroyî ya HDP'yî Fîgen Yuksekdag, Hemşaredara Bajarê Pîlî ya Amedî Gultan Kişanak, Hemşaredara Dersimî ya verê Nurhayat Altun, Parlamenterê verê Gulser Yildirim û Edîbe Şahîn ke Zîndanê Tîpê Fyê Kandrayî de yenê tepiştene 5. Kongreya Pîlî ya Asayî ya Partiya Demokratîke ya Şaran (HDP) rê mesaj şawitî. Mesajê cinîyanê siyasetmedarî yê tepişteyî wina yo: “Silam, hemrayê hêvî, azadî, aştî, edalet, ked, xoza û xoverdayîşî ke merdiman keno merdim! Ma şima bi zerrî ra silam kenê. Can û dostê ma yê erjayeyî ke no roşano pîl ê demokrasî de bi derbazkerdişê heme astengî û hêrîşê xidar ameyî têhet.

 

Ma zanê ke vengê şima yê berz, îradeyê şima do heme qefleyan abikero. Hemverê esaretê Birêz Ocalanî yê Îmraliyî di tecrîdî de yê, şima sey qîrînayîşê azadîya bi hezaran tepişteyê sîyasî yê di zindanan de biherikyê. Helbet edalet do bi têkoşîn bi ca bêro. Bi na hêvî û bawerî ma şima hemine reyke bîn bi zerrî û can silam kenê."

 

Leyla Guven:

 

Hemsereka Kongreya Komelî ya Demokratîke (KCD) Leyla Guven Zîndanê Tîpê E yê Xerpêtî ke ci de tepişte ya, mesajêk Kongreya HDP'yî rê şawit. Leyla mesajê ke bi rayîrê avûkatanê xo şawita de wina vat:

 

“Gelî hemrayê min ê erjayeyî, şarê ma yê bi rûmet!

 

Ma sey 9 cinîyê Kurdî yê Zindanê Xarpitî, şima bi rêzdarî silam kenê  û verê xoverdayîşê şima yê destanî û îradeyê şima yê xurt ê hemverê faşîzmî bi rêzdarî bejna xo tewênenê. Pêwa kesê ke nêeşkenê HDP'yî bidê çokan zî, ma hêvîdar ê ke kongreya ma ya ke şima bi des hezaran kom bî, serbikewo û şima rê serkewtişê her hawayî wazenê.

 

Ganî ma zaf eşkera vajê ke; hewcedarîyê şarê Kurdî ne bi polîtîkayê çinkerdişî yê AKP-MHP'yî esto, ne zî bi nêzdîbîyayîşê tersonek yê pêameyîşê masaya hîrê lingî yê ke wazenê îqtîdarî bikerê esto. Ma zanê ke partîya ma HDP do weçînayîşan de bi tedbîr têbigêro û bi helwestê xo yê stratejîk cewabo tewr baş bido her kesî.

 

Demê hesabkerdişî yo

 

Tecrîdê ke bi Birêz Abdullah Ocalanî ame destpêkerdiş heme zîndanan û heme beşê komelî vila bi; Dem demê hesabperskerdişê nê rejîmê faşîstî yê kurd, mûxalîf, cinî, kedkar, bi kilmî her kesê ke heqê xo gênê, sey 'terorîst' yenê îlankerdiş o. Şarê ma yê rêzdar, vernîya ke bêhêvî bê, ma do her ware de bikerê xo verike û bi rayberîya cinîyan pîya rayîra şêrê. Ver bi deşta ke feqîrî, bindestî, zulm û bêhuqûqî ci de çin o... Bêrê ma bi ganeverdişê vatişê ke vano, 'hêvî serkewtişî ra biqîmetêr a' rayîrê xo dewam bikerê. Serkewtiş her kesî rê."

 

Cinîyê Sîncanî zî kongre silam kerdî

 

Hemsereka Pêroyî ya Partîya Mintiqaya Demokratîke (DBP) ya verê Sebahat Tuncel, Aktîvîsta Tevgerê Cinîyan ê Azadan (TJA) Ayla Akat Ata, cinîyê siyasetmedarî; Zeynep Karaman, Aynur Aşan, Zeynep Olbecî, Pervîn Oduncu, Meryem Adîbellî, Dîlek Yagli Zîndanê Cinîyan ê Sîncanî de ameyî tepiştene. Ayşe Yagci û Bircan Yorulmaz zî seba kongreya HDP'yî mesaj şawitî. Mesajê cinîyê tepişteyan wina yo: "Meclîsa erjaye, delegeyê kongreyê yê birêz, şarê ma yê erjaye, dost û hemrayê erjaye; Ma şima hemine bi xoverdayîş û coşê têkoşînê xo û bi bedewiya hemrayîya cinîyan silam kenê. Ma  a bawerî de yê ke kongreya ma do seba çareserîya problemê sîyasî, ekonomî û komelî yê şarê Kurdistan û Tirkîya, cinî û kedkaran bibo îrade û îradeyê awankerdişê cuya demokratîke, ekolojîk û azadîya cinî nîşan bido.

 

Ma do cuya newe pîya; şima zere de, ma teber de xoverdayîş û têkoşîn awan bikerê. Ma silam û heskerdişê xo pêşkêşê heme hemrayanê xo, şarê ma yê ke roja awankerdişê HDPyî heta nika kede dayê û seba ameyoxê bi destê xo awan bikerê, kenê û serkewtiş hemserekê xo û heme embazanê xo ra wazenê. Silam û heskerdiş."

 

Selahattîn Demîrtaş û Selçûk Mizrakli zî mesajêk hempar şawitî.

 

Herdi sîyasetmedaran şarê ke beşdar bîyê silam kerdî û dîyar kerdî ke HDP do bi na kongreye dir hîn bi xurtî rayîr ra şîyayîşê xo dewam bikero.

 

Mesajê hempar de ame vatiş, "Ma do zîndanan de bibê veng têkoşînê şarê xo rê. Kitabê ma de  teslîmbîyayîş, serîtewênayîş, vîndîkerdiş çin o. Seba zorberdişê îqtîdarayê zilmî, seba caardişê aştî, demokrasî û azadîye ma heta peynî xo ver danê. Ma do bi partîya xo, şarê xo dest bi dest, qelb bi qelb nê têkoşînî bi serkewtiş tacîdar bikerê.