Şehrîban Aslan – Medya Uren 

 

AMED - Vervatoxa Meclîsê Cinîyan ê DTSO'yî dîyar kerd ke no 4. serrgêra awankerdişê meclîsê cinîyan o û vat: "Dimayê awankerdişê meclîsê cinîyan, problemê xo pare kerdî û înan pîya resnayî çareserî. No meclîs zî bi nimûneyêk muhîm. Coka ma nika Odaya Esnaf û Sanatkaran ê Amedî ke wayîrê 60 hezar endaman de, meclîsê cinîyan deklere kenê."  

 

Meclîsê Cinîyan ê Odaya Bazirgan û Endustrî yê Amedî keweno 4. serrgêra awanbîyayîşê xo. Meclîsê cinîyan roja ke ameyo awankerdiş ra seba xeylêk komele, dezdeh û pêameyîşan bi nimûneyêk pîl. Vervatoxa Meclîsî Nevîn Îl semînerê ke seba xebatê koparatîfan Amed de ameyo dayîş de bi ajansê ma rê qisey kerd. Nevîne qiseykerdişê xo de dîyar kerd ke do Odaya Esnaf û Sanatkaran ê Amedî de zî bi eynî rengî meclîsê cinîyan awan bikerê.

 

‘Paştdayîş ma bi hêz keno'

 

Nevîne wina dest bi qiseykerdişî kerd: “Bi çar serrî yo ma DTSO'yî de meclîsê cinîyan awan kerdo. Ez wazena sere de tay qalê hîkayeya xo bikera. Vernîya ke ma meclîsê cinîyan awan bikerê, çi heyf temsîlkarîyê cinîyan sewîyeya tewr kêm de bi. Yanî hûmara cinîyan zî hema vaje çinbî. Serrê dergî ma da serê na xebate. Seba temsîlkarîyê cinîyan berz bibo û heqê xo bivîno ma meclîs awan kerd. Dimayê awankerdişê meclîsî de cinîyan heme problem û pêşnîyazîyê xo tewr baş ma dir pare kerdî û ardî ziwan. Ma pîya probleman ercna û seba safîkerdişî ma xebate kerd. Ççîyo tewr muhîm zî paştdayîşê cinîyan ê pîya vejîya werte. Bi pîlbîyayîşê paştdayîşî dir safîkerdiş zî ame awankerdiş û ma serkewte zî bî."

 

‘Ma do prosesê newe awan bikerê' 

 

Nevîne bi nê vatişan qiseykerdişê xo domna: "Mintiqa de, serê 100’î de koparatîfî ameyî awankerdiş. Nê  koparatîfan de tengasîyê pîlî zî rî dayî. Ma waşt ke ma nê probleman, meclîsê cinîyan de bi cinîyan dir ercnayîş bikerê. Seba safîkerdişî zî ma do game bierzê. Ma goreyê nê bi pêameyîşê fermî, selahîyetdaran dir problem û pêşnîyazîyê xo yê  çareserî pare bikerê. Ma do wezîran dir bikewê mîyanê têkilî. Seba koparatîfê ke estê tewr zêde çalak û bi berardiş bibê zî ma do bikewê mîyanê projeyê mintiqa."

 

‘Ma do xo biresnê pêro cinîyan'

 

Nevîne ard vîr ke welat de krîzêk esto û vat: "Mîyanê cuye de û mîyanê karkeran de zî beşo ke tewr zêde tesîr beno, bê guman cinî yê. Seba nê zî ma xebatêke semînerê kargehan Amed de da destpêkerdiş. Seba cinîyê ke kargehê înan estê, ver bi qefilyayîşî de nêşêrê, ma xebityenê. Nika ra xeylêk kargehî ameyî qefilyayîş û xeylêk cinîyê karkerî kar ra ameyî dûrvistiş. Seba ke nê zî bêrê vînayîş, ma arêdayê û ma do rayapêroyî rê pare bikerê. Bi paştdayîş ma do hewl bidê destê xo biresnê pêro cinîyan."

 

‘Meclîsê cinîyan yeno awankerdiş'

 

Nevîne dîyar kerd ke meclîsê cinîyan seba heme xebatkaranê cinîyan bî hêvîyêke pîl û vat: "Meclîsê ke ma awan kerdo, xeylêk serkewte yo û netîceyê pîlî kerdî dest. Ganî pêro bajaran de zî no bêro vînayîş û meclîsê cinîyan awan bikerê. Odaya Esnaf û Sanatkaran ê Amedî ke 60 hezar endamê ci estê, do meclîsê cinîyan awan bikero."