Zelal Tunç

 

WAN - Cinîyê ke bi reng û tilîliyanê xo seba kongreya HDPyî ewro kewenê rayîr, dîyar kerdî ke hêz û vatişê înan ke bivurnê, azadî û aştîye awan bikerê esto û venga tewrbîyayîşê kongre kerdî.

 

Partîya Demokratîke ya Şaran (HDP) bi sloganê, "Ma do pîya serbikewê' 3ê Temmuze de Salona Sporî ya Arenayî ya Anqarayî de 5in Kongreya xo ya Pîle ya Awarte kena. Her cayê Tirkîya û bajaranê mintiqayan de amadekarî temam bî. Wan ra zî do ewro otobusî bikewê rayîr. Cinîyê ke taxan û kuçeyan de bi rojano xebityayê, dîyar kerdî ke do bi reng û tilîliyanê xo tewrê kongre bibê û venga tewrbîyayîşî kerdî.

 

‘Hemverê qirkerdişê cinî ma do kongre de bêrê têhet'

 

Hemsereka HDPyî ya Wanî Handan Karakoyun dîyar kerd ke heta nika taxan de xo resnayê bi seyan cinîyan û vat: "Ma bi kelecanêkê pîl amadekarî temam kerd. Vera hêrişê hemverê partîya ma, hemverê qirkerdişê cinî, seba ma bibê vengê ciwanan, ma manayêke muhîm danê kongreya xo. Hemverê pêro hêrişan bêrê ma 3ê Temmuze de kongreya Anqarayî de cewabêke pîl bidê."

 

‘Ma waştişê azadîye berz bikerê'

 

Cinîyan ra Gurbet Oktay dîyar kerd ke yewin partîya ke azadî û heqê cinîyan pawena HDP ya û wina vat: "Ez venga heme cinîyan kena ke bi reng, tilîlî û waştişê azadîye kongre de bêrê têhet. Bêrê ma pîya HDPyî de bêrê têhet."

 

Kongreya hemverê krîzê ekonomî

 

Feyruz Akkuş zî dîyar kerd ke HDP nasname û ziwan paweno û vat: "Seba krîzê ekonomî ma problemê pîlî ciwîyenê. Ma kîra danê. Ma nêeşkenê debare bikerê. Ma şinê dayîş û girewtişî ma nêeşkenê çîyêk bigîrê. Ez bi hêvîya ke do HDP nê krîzî safî bikero. Bêrê ma hemverê krîzî kongreya HDPyî de bêrê têhet."

 

Welatija bi nameyê Evîn Oklu zî wina vat: "Seba aştî û hizûr bêro ma HDPyî pawenê. HDP eşkeno azadî, aştî û demokrasî bîyaro. Seba Tirkîyayêke demokratîke ma vanê HDP. Ma venga pêro cinîyan kenê. Bêrê hêz û vatişê ma yê ke bivurnê estê."