Marta Somek 

 

STENBOL - Hemsereka HDPyî ya Stenbolî Îlknûr Bîrol da zanayene ke rayîr ra şîyayîşê Gemlîkî  îfadeyê îradeyê duştê tecrîdî de bîyo û wina vat: "Wexto ke Abdullah Ocalan derheqê helkerdişê problemê Kurdî de bi rayîr û metodê pêvînayîşî û muzakereyî fikrê xo bi rayaumûmîyî dir pare kerd,  lej bîbî. Seba tecrîd peynî bibo do têkoşînê ma bidomo." 

 

Rayberê PKKyî Abdullah Ocalan 23 serrî yo di binê tecrîdê giranî de yo û 15 mengî yo bi keyeyî û avûkatanê xo dir nêeşkeno pêvînayîş bikero. Bi amancê tecrîdê serê Abdullah Ocalanî de yo, peynî bibo û azadiya fîzîkî  bêro ca her çar hetê dinya de çalakî yenê kerdene. Di 12ê Hezîrane de bi serekîya HDK, KCD, Hereketê Cinîyan ê Azadan (TJA), DBP û MED-TUHAD FEDî bi şîarê 'Ma duştê tecrîdî de seba pawitişê azadîye şinê Gemlîk' Gemlîkê Bursayî de ame waştiş ke rayîrşîyayîşêkê bêro ca. 

 

Heme dinya pêhesîya: Waştişê azadîya fîzîkî 

 

Xeylêk şaristanê Tirkîya ra bi hezaran kes ver bi Gemlîkî kewtî rayîr û pêwa manîyanê polîsan waştişê xo ardî ziwan. Rayîr ra şîyayîşî de şarî waştiş kerd ke tecrîdo giran bêro wedaritiş û azadîya fîzîkî ya lîderê PKKyî bêro ca. Şarî seba nê zî qerarê çalakîye bêmabên girewt. 

 

Hemsereka HDPyî ya Stenbolî Îlknûr Bîrol, derheqê rayîr ra şîyayîşê Gemlîkî de ajansê ma rê qisey kerd. 

 

‘Komele tengezar kerdî’

 

Îlknûre dîyar kerd ke rayîr ra şîyayîşê Gemlîkî yê 12ê Hezîrane bi amancê tecrîdê giranî yê serê Abdullah Ocalanî de peynî bo, kerdî û wina derg kerd: "No rejîmê tecrîdî di sere de Îmralî de tesîr  serê heme hetê komelî de kerd o. Bi amanco ke komele vengê xo berz nêkero tecrîd giran kerdê û heme hêzê demokrasîyî, sîyasetê demokratîk û komelî bêzar kerdo. Wezîfeyê sazgehê demokratîke no yo ke edalet bêro tesîskerdiş û seyyewbînîyî rê asas hadre bikero." 

 

‘Ganî dest nê tevrî ra vera bidê’ 

 

Îlknûre wina qal kerd: "Rayîr ra şîyayîşê Gemlîkî seba tecrîd bêro wedaritiş ame ca. Rayîr ra şîyayîş îfadeyê îradeyî bî. Di eynî wextî de, ê ke welat ver bi tarîyî dir berdê ganî lezkî dest nê tevrî ra vera bidê. La înan bi tewirêkê teda verê xo dayî kesê ke rayîr de şîyî Gemlîk. Kadikoyî de zî şîdetê tedayî yê polîsan ame ciwîyayîş." 

 

‘Problemê Kurdî û nizdîyî ci’

 

Îlknûre eşkera kerd ke Tirkîya êdî ameya sewîyeyêka ke nêeşkena boya xo bigîro û wina ard ziwan: "Problemê Kurdî bi metodê lejî û eskerî hel kenê. La ganî dest nê ra vera bidê. Bi rayîr ra şîyayîşê Gemlîkî ame waştiş bêro vîrameyîş ke no problem, bi metodê demokratîke bêro helkerdiş." 

 

‘Adres Abdullah Ocalan o’

 

Îlknûre dîyar kerd ke aktoro sereyîn ê helkerdişê problemê Kurdî Rayberê PKKyî Abdullah Ocalan o û wina ard ziwan: "Wexto ke Abdullah Ocalan derheqê helkerdişê problemê Kurdî de bi rayîr û metodê pêvînayîşî û muzakereyî fikrê xo bi rayaumûmî dir pare kerd, lej bîbî. Seba tecrîd peynî bibo do têkoşînê ma bidomo. Rayîr ra şîyayîşê Gemlîkî seba nê gamêke ya. Ma eşkenê nê hel bikerê. Ma na cografya de seba şar seyyewbînî biciwîyo sîyaset kenê. Tu lej û şer heta peynî rayîr ra nêşino. Ganî heme komelê Tirkîya seba helkerdişî veng bido. Ganî muxalefet zî îqtîdar zî nê vengî bieşnawo. No şer tu fêde nêdano kesêk. Tecrîd tu fêde nêdano kesêkê. Vera nê zî ma vanê ke seba game eştişî rayîr ra şîyayîşê Gemlîkî bi silasîyî bî."