ANQARA - Vervatoxa HDPyî Ebru Gunay awanîya pêroyî ya partîya xo çapemenîye rê kombîyayîşê hewtane viraşt û serê babetê de rojdem ercna.

 

Vervatoxa HDPyî Ebru Gunay Merkezê Pêroyî yê partîya xo de kombîyayîşê çapemenîye kerd û rojdem ercna. Ebru Gunay bale ant serê 5in Kongreya Asayî ya Pîlî ya partîya xo ke do 3yê temmuze de Anqara de bêro organîzekerdiş.

 

‘Ma do cewab bidê partîya ma padê’

 

Ebruye muhîmîyê kongre ard vîr û wina vat, “Partîya ma do kongreya xo ya 5. bikera. Xebatê ma yê peyênî yê kongre bi coşî dewam kenê. Ma do kongre de vajê 'Çareserî ma yê, vateyêkê ma est o.' Sebrê şaran hînî nêmando. Xizanî, kurdî, elewîyî, cinîyî û ciwanî hînî nê sîstemê zorbazî yê îqtîdarî rê sebr nêkenê. Ma xo bi armancê awankerdişê demokrasî têkoşînê xo berz bikerê. HDP hêzê çareserîye yê nê prosesê krîtîkî yo.”

 

‘Ma do kongre de cewabêke pîl bidê’

 

Ebruye seba beşdarbîyayîşî kongre venga her kesî kerd û vat: “Seba Kongreya Pîle ya 5. Colemêrgî ra heda Edîrne merdimî kewenê rayîr û herikîyenê Anqara. Kongreya ma ya bi şîarê 'Çareserî ma yê, vateyê ma est o' 3ê temmuze de do newe ra hêvî pîl bikera. Ma venga her kedî danê ke tewrê kongreya ma bibo. Ma do kongreya xo de cewabêkê pîlî bidê faşîzmî û îqtîdarî. Kuçe, kede, xoza, kultur, reng, serkewtiş, xoverdayîş û azadîye ê ma yê; cuye yê ma ya. HDP hêvî yo, îqtîdar do şoro. Ma 3ê temmuze de Anqara de bêrê pêser.”