KOBANÎ - Kongereya Starî ya Mintiqaya Firatî, seba serrgera 26ine şehadetê Zîlane de, kombîyayîşêk serê cuya aye de organîze kerd.

 

30ê Hezîrane serrgera 26ine yê şehadetê têkoşêre Zeyneb Kinacî (Zîlan) yo. Têkoşêr Zîlane serra 1996ine de Dêrsim de çalakîyêke fedayî vera eskeranê artêşa tirkî de kerd û kewte rêza cangoriyê azadîye. Zeyneb Kinaci serra 1972ine de merkezê bajarê Meletî yê Vakurê Kurdistanî de ameye dinya. Aye Meletî de, Unîversîteya Înonû beşê rêberî û şêwirmendîyê psîkolojî wend. Vernîya ke beşdarê mîyanê refê tevgerê azadîye biba, nêweşxaneyê Meletî de sey teknîsyena rontgenî kar kerdêne. Zîlane serra 1994ine de bajarê Edeneyî, mîyanê Enîyî de dest bi xebate kena û qasê serrêke xebata xo mîyanê Eniyî de domnena. Serra 1995ine de bajarê Dêrsimî de beşdarê refê Tevgerê Xelisyayîşê Kurdistanî bena. Serra 1995ine de rayîrê heqîqet û azadî weçîna û Dêrsimê Vakurê Kurdistanî de tewrê mîyanê refanê têkoşerê azadîye bena. Roja 30ê Hezîrana 1996ine de, merkêzêkê dewleta tirkî yê bajarê Dêrsimî de çalakîyêk fedayî vera artêşî de kena.

 

Rêxistina Kongereya Starî ya Mintiqaya Firatî seba serrgera 27ine yê şehadetê Zîlane de kombîyayîşêk organîze kerd. Kombîyayîş de fotografê têkoşer Zîlane, alê Rêxistina Kongereya Starî amebî daliqnayîş. Bi pêroyî sazgeh û dezgehê Îdarekarîya Xoserî ya Mintiqaya Firatî beşdarê kombîyayîşî bî. Kombîyayîş bi deqeyêk rêzgirewtişî yê seba vîrardişê cangoriyê azadîye dest pêkerd û dima ra hetê Xunav Îbrahîm endama wareyê perwerdeyî yê cinîyan ê Mintiqaya Firatî ra mektuba têkoşêra azadîye Zîlane bi ziwanê Kurdkî ame wendiş. Dimayê peynîkerdişê wendişê mektube, beşdaran dest bi berzkerdişê sloganê, "Cinî ciwîyayîş azadî" û "Zîlane bêmerg a" kerdî. 

 

Kombîyayîş bi sloganê, "Bê serek cuye nêbena" û "Biciwîyo xoverdayîşê cinîya azade” peynî bi.