AMED - Rojnamegere Berîtan Elyakut ke meslegdaş û embaza rojnameger Razaman Gecîkeno ke ame tepiştişî ya, dîyar kerd ke do şahidîya rojnamegerîya heme rojnamegerê ke ameyê tepiştişî, bikero. Berîtane wina derg kerd: "Hêrişê hemverê çapemenîye bi amancê bêvengkerdişî yê, bi amanco ke rastîya welatî çinî bibo û di çapemenîyê xo de bi vatişê xo vejê vernî."  

 

Çarçewaya cipersayîşo ke hetê Serdozgerîya Komare ya Amedî ra amîbî destpêkerdişî de polîsan di 8ê Hezîrane de 20 ci ra rojnamegerî 22 merdimî destbend kerdî û 8 rojî nezaret de mendî. Di15ê Hezîrane de vetî dadgehe û 16 rojnamegerî bi îdîayê endamîya rêxistine û propagandayê rêxistine kerdê ameyî tepiştiş. Nê rojnamegerî; Serdar Altan, Mehmet Alî Ertaş, Safîye Alagaş, Azîz Orûç, Omer Çelîk, Sûat Dogûhan, Ramazan Gecîken, Neşe Toprak, Zeynel Abîdîn Bûlût, Mazlûm Dogan Guler, Mehmet Şahîn, Elîf Ungur, Îbrahîm Koyûncû, Remzîye Temel, Abdûrrahman Oncu û Lezgîn Akdenîz bi îdîayê 'Endamîya  rêxistine' ameyî tepiştiş.

 

Dimayê tepiştişê rojnamegeran, keye û meslegdaşanê înan ra reaksîyon ame ramojnayîş. Meslegdaşanê înan eşkera kerdî ke do qelema înan herd de nêverdê û ala înan dewr bigîrê. 

 

Yew nê rojnamegeran ra ke amebi tepiştiş Ramazan Gecîken bi. Rojnamegere Berîtan Elyakut embaze û meslegdaşê Ramazanî ya. Nameyê  Ramazanî yo bîn, Mazlûm bî. Berîtane da zanayene ke bi serran o Mazlûmî nas kena. 

 

Berîtane dîyar kerd ke serê sibayê 8ê Hezîrane de, seete di 05.00î de ber ginayo piro û vat: "Polîsî bî. Ez mat menda. Vat 'No keyeyê  Ramazanî yo?' Mi vat 'Eya'.  Kewtî zerre. Mi vat 'Tut zerre de esto û rakeweno'. Dima ra sey şahidî cîranî ardî. Cigêrayîş kerdî, Mazlûm tepiştî û berdî. Dima ra mi fam kerd ke operasyon esto. Ma bandêr bîyî ke xeylêk meslegdaşê ma ameyê tepiştiş." 

 

'Teda eksê huqûqî yo' 

 

Berîtane wina derg kerd: "Wexto eşt serê keyeyan û şîrketan eşt serê JINNEWSî zî. Cigêrayîş kerdî. Harddîsk û xeylêk ekîpmanî girewtî. No cigêrayîş eksê huqûqî bî. Mudura karê nuştuşî Safîye Alagaş amî tepiştiş. Ma nêzanê ke çi kerdê mîyanê ekîpmanî ke destser kerdî. Delîlê sexteyî wareardê û ronayê vernîyê Safîyeye. Xeynî prosesê destbendkerdişî zî cigêrayîşê şîrketan dewam kerdê. Awanî fînayî binê ablûka. Hema zî ablûka  nêqedîyayo." 

 

'Ajans ame padayîş la xebate ma dewam kena' 

 

Berîtane eşkera kerd ke prosesê destbendkerdişê Mazlûmî û meslegdaşanê aye ameyo dergkerdiş û wina vat: "8 rojî derg  kerdî. No zî ramojneno ke tu delîl nêvînayê. Di prosesê destbendkerdişî de problemê pîlî bîbî. La no qîm nêkerd. 22 rojnamegerî ameyî destbendkerdiş. 16 tenî ameyî tepiştiş. No qanûno ke meclîsî ra derbas bi û tepiştişê rojnamegeran mesajêk bi. La no seba ma polîtîkayêkê ke ma apey game bierzê nîyo. Sazgehê ma ameyî bombavarankerdiş ma bi KHKyî ameyî padayîş la ma xebatê xo dewam kerdî." 

 

'Çapemenî bêveng bo her kes bêveng o' 

 

Berîtane qal kerd ke, a zî rojnameger a û di prosesê 2015î de her cayî de tehdîdan dir ameya  rî bi rî û wina qal kerd: "Ma mesajê 'Ma nêtersenê'  zaf zelal dayî. Embazê ma mesajêk zelal dayî. 'Ma nêtersenê û hende tehdîdî zêde bê zî ma tîya de yê. Ma do bi kamera û qelema xo nê rastîyan binusnê'. La ma vîna ke kamerayan ra zî tersenê. Ê vanê qey do bi nê tedayan ma apey berê la ma apey nêşinê. Ez şîya pêvînayîşê Mazlûmî û mesajêk zelal da û vat 'Ma karê xo kerd. Di dosyaya ke bêro hadrekerdişî de çîyêke çinî yo. Heme serê fealîyetê rojnamegerîye de yê. Ganî rayaumûmî hetkarî bido ma. Çapemenî bêveng bibo do her kes bêveng bibo. Vera nê ganî her kes bêveng nêmano.'"

 

Hem hemraya hem zî meslegdaş a 

 

Berîtane peynîyê qiseyê xo de dîyar kerd ke do bi hemrayê xo yo ke ameyo tepiştişî dir kuçeyan de xebate bikero û wina peynî ro ci ard: "Her kes jîyatîbîyayîşê Mazlûmî ke serê karî de baş zaneno. Çîyo tewr zêde ci ra hes kerdêne xebetnayîşê  Jimmy jîp bî. Operatorîya ey kerdêne. Xebata xo bi zerrî waştîyêk pîl kerdêne. Seba meslegê xo baş bikero her çîyî kerdêne. Ez bi xusûsî, Safiye dir zaf  zêde xebetîyaya. Ez di JINHA, Gazete Şujin û JINNEWSî de xebetîyaya. Ez her tim Safîyeye dir kuçeyan de bîya. Ma têreyde xebetîyayêne. Safîye tewr zêdeyêr edlîyeyan de xebetîyayêne. Xeberê ke ma viraştê sey sûcî anê hemverê ma."