Rojda Aydin

 

ŞIRNEX - Ahmet Kasirgayo tepişte, bi rayîrê telefonî bi dayîka xo Kudret Kasirga dir qisey kerd û bale ant serê rewşa Zîndanê Tîpa Tyê Aksarayî. Kudrete, derheqê rewşa tepişteyan de qesawetê xo ard ziwan û vat: "Gardîyanî nîmeyê şewe de eştê serê qawişan  û hêrişê înan kerdê. Ma cuya tutanê xo ra bi qesawet ê û ma vengdayîşê wayîrbîyayîşê tepişteyan kenê.”

 

Tecrîdê zîndanan roje bi roje tewr giran bena. Pêwa  tecrîdî, zîndanan de xoverdayîş zî dewam keno. Keyeyê tepişteyan zî bi çalakîya "Nobeta Edaletî" yê Amed, Îzmîr, Stenbol û Wan de wazenê bale biancê serê rewşa tepişteyan. 

 

Ahmet Kasirga, Zîndanê Tîpê Tyê Aksarayî de tepişte yo. 23yê hezîrane roja paşeme bi rayîrê telefonî keyeyê xo gêrayo û neql kerdo ke gardîyanan eşto serê qawişa înan û hêrişê înan kerdê. Dayîka Ahmet, Kudret Kasirga, derheqê rewşa lajê xo de ajansê ma rê qisey kerd.

 

37 serrî ceza ci rê ameya birnayîş

 

Kudrete, dîyar kerd ke lajê ci Ahmet serra 2020ine de ameyo tepiştiş û 37 serrî yo ceza ci rê ameya birnayîş û vat: “Lajê mi Ahmet, serra 2020ine de Nevşehîr de ame destbendkerdiş û tepiştiş. Lajê mi nêzdîyê serrêke û nîm zîndanê uca de mend. Uca de di embazê ci zî estbî. La dimayê ke ma şî lajê mi tena mend. Nêzdîyê 5-6 mengan tena mend. Dima ra lajê mi surgûnê Zîndanê Aksarayî ame kerdiş û bi 6 mengî yo uca de yo. Lajê mi wexto ke Zîndanê Nevşehîrî de bi teda û zilmêk pîl û îşkence ci rê ameyîne kerdiş.”

 

'Gardîyanî tehdîd  ro tutanê ma kerdê' 

 

Kudrete, da zanayene ke lajê aye roja panşeme şanî de, seete dewrê 21.30î de bi rayîrê telefonî ro ci gêrayo û wina behs kerd: "Wexto mi lajê xo dir qisey kerd, vengê ey baş nêbî. Mi vat çîyêk bîyo. Lajê mi dima ra vat gardiyanan bi serê qawuşa înan de girewto û hêrişê înan kerdo, waştê çî-mîyê înan vila bikerê, bierzê. La vera ke lajê mi û tepişteyê bînî qebûl nêkerdê hêrişê înan kerdê. Dima ra 3 embazê ey eştê hucreyê yew merdimî. Lajê mi û tepişteyê bînî reaksîyon ramojnayê û dimayê nê yewî reyêke bîn tepişteyî ardê. Çî-mîyê tutê ma zî eştê. Gardîyanî tehdîd tutanê ma kenê. Gardiyanan tutanê ma ra vato, 'Bêveng bê. Xora şima tepişte yê, ma eşkenê heme bêranê şima bişikinê'. Ê nê heqî xo rê meşrû vînenê û tehdîd ro tutanê ma kenê. Sewbîna reyna, a roje hîrê  tepişteyê bînî zî Zîndanê Edîrneyî ra ardê verê înan." 

 

'Bazirganîyê xo serê Kurdan de danê  rayîrraşîyayîş' 

 

Kudrete, dîyar kerd ke no zilm, tehdîd û îşkenceyî qebûl nêkenê û wina qal kerd: "Ma tutê xo pîl kerdê seba ke bikerê zîndanan û îşkenceyî ro înan bikerê? Xo ra tutê  ma di mîyanê çar dêsan de yê û no yew  zî  îşkenceyo. No qîm nêkeno, erzenê serê qawuşê înan  û îşkence ro înan kenê. Ma nêzanenê ke tutê ma mird ê yan zî vêşanê. Tutê ma seba ke ma zêde nêdejê ma ra zêde çîyêk nêvanê. Vera nê zilmî û îşkenceyî zerra ma dadîyan dejena. Ma şew û roje seba tutanê xo bermenê. Wa dinya hemverê nê zilmî û îşkenceyo ke serê tepişteyan de yo, bêveng nêmano. Heta key na bêvengî do dewam bikero? Ewropa wa wayîr ro zîndanan vejîyo û qisey bikero. La karê Ewropa tena bazirganî ya. Bazirganîya xo serê ma Kurdan de danê rayîrraşîyayîşî. Eke ma Kurdî fek menfîet û îxanetî ra vera nêdê, ma do nêeşkê peynî nê zilmî bîyarê. Ma do heta key bibermê û zerrîya ma do bivêş o? Ne şewa mi şew a, ne zî roja mi roj a. Ez şanayan vera lajê xo nêeşkena rakewa." 

 

'Wayîr ro tepişteyan vejîyê' 

 

Kudrete, peynîyê qiseyanê xo de venga heme merdiman kerd ke wayîr ro tepişteyan vejîyê û wina peynî ro qiseyê xo  ard: "Ganî  çapemenî bibo vengê tepişteyan. Heqê merdiman tu çîyêk de nêmendo. Eke heqê merdiman bibayne, do tutê ma ewro bê sûc û bê sebeb nêameyêne tepiştiş. Tutê ma çi kerdê ke nê zilmî ro înan kenê? 37 serrî ceza dayê lajê mi. Di wextê şerî yê qedexeyê tebervejîyayîşê kuçeyan de lajê mi tîya nê bi, Antalya de xebetîyayêne. Senîn eşkenê nê cezayî ro lacê mi bibirnê? Yewin wexto ke derheqê lacê mi de dewa akerd 6 serrî û 3 mengî ceza ro ci ame birnayîş. La Dadgeha Berzî bi behane cezaya lacê  mi kemî vîna û cezaya ey xerepna. Reyêna dewaya  ey amî vînayîş û na reyî 37 serrî ceza ro ci amî birnayîş. Wa no zilm û teda peynî bibo. Kamci dadî  wazena tutê ci tepişte bo? Mi lajê xo di binê şert û mercê giranî de pîl kerd. La dewlete tepişt kerd mîyanê çar dêsan. Ma wazenê lezkî no zilm peynî bibo û tutê ma bêrê veradayîş. Ma vera rewşa tutanê xo qaxûyan de yê."