COLEMÊRG - Dewleta Tirke operasyonê wareyê Astenga Reşî yê Geverê Colemêrgî peynî kerd û şîyayîşê zozananê herême pênc rojan qedexe kerd.

 

Wareyê Astenga Reşî yê mabêne dewanê Şîşemzîn, Xurekana Seyîda û Xurekana Temo yê Geverî 26ê Hezîrane de operasyonêk leşkerî amebi destpêkerdiş. Operasyon ame peynîkerdiş û wesayîtê zirxî yê leşkerî, helîkopter, kepçe û dozerî peyser ameyî antiş. La cendirmeyan dewijanê Şîşemzîn, Xurekana Seyîda û Xurekana Temo rê neql kerdî ke şîyayîşê zozanan heta 5 rojan qedexe kerdê.

 

Demê operasyonî de 13 kesî amebî destbendkerdiş û  26ê Hezîrane de şan de îfadeyê înan Fermandarîyê cendirmeyan ê Geverî 11 kesî amebî veradayîş.  Îfadeê Bîrhat û Behçet Engudar zî serê sibayî ame girewtiş. Yeno pawitiş ke dimayê îfadeyî sewqê dadgerîye bêrê kerdiş.

 

Ame diyarkerdiş seba şiwan û gawan ameyê destbendkerdiş zî nêzdîyê 5 hezarî pes û dewar vînî bîyê û seba şîyayîşê zozanan ameyo qedexekerdiş, dewijî nêeşkenê şêrê heywananê xo bigîrî.