Marta Somek-Safiye Alagaş

 

STENBOL - Seba gumanbar Cemal Metîn Avci ke Pinar Gultekîn qetil kerd, cezaya ‘vistişê tahrîkê bêheq’ ame dayîş û cinîyan reaksîyon vera qerarî dayî. Cinîyan dîyar kerd ke  do hemverê nê têkoşînêkê cinîyan ê xurtî vejê werte.

 

Roniştişê dewaya qatilê Pinar Gultekîne, Cemal Metîn Avci ke bi îşkence Pinare kişt, kesê ke ci dir bî hetkar; Mertcan Avci, dayîka qatîlî Ayten Avci, pîyê ci Selîm Avci, cinîya ey ke ê vera dayo, Eda Karagun û şirîkê ci Gokhan Orhan ke seba sîyakerdişê delîlan yeno muhakemekerdiş, roniştiş 3in Dadgeha Cezaya Giran ya Muglayî de ame vînayene. Dimayê goşdarîkerdişê avûkatanê hetan, heyeta dadgehê derbarê Metîn Avci de cezaya muebetê giran da, la dima ra na ceza bi bahaneyê ke tahrîk bîyo vist 23 serran û derheqê gumanbaranê bînan de zî qerarê beraetî da.

 

Dosya şawitî îstînaf

 

Serdozgerîya Komare ya Muglayî û avûkatê keyeyî qerarê ke 3in Dadgeha Cezaya Giran ya Muglayî dabi berdî îstînaf. Heto bîn ra seba qerarê ke ameyo dayîş de her ca reaksîyon ame mojnayîş û cinîyan dîyar kerd ke ê qerarê hukmê camêrdan nas nêkenê û têkoşîn de bi qerar ê.

 

Dewlete pey gumanbaran de ya

 

Aktîvîsta Femînîste Selîn Top dîyar kerd ke bi feshkerdişê peymana Stenbolî serekkomar û îqtîdarî mesajê, ‘ma paşta şima d eyê' dayê gumanbar û vat: “No vatişê gumanbar Cemal Metîn Avci ke vat, ‘başo ke peymane ameya feshkerdiş’ de vejîyayo werte. Peymane bi têkoşînê cinîyan ameye qezenckerdiş. Netîceyê têkoşînê cuye ya cinîyan, yê LGBT û cinîyanê multecîyan de ame girewtene. Dewlete zî nê bi feshkerdişê vano ke ez pey gumanbaran de ya. Dewaya Pinare de qerarêkê şermo pîl ame dayene. No qerar hêrsêko pîl ard meydan. Ma bi hêrsê heme kuçeyan de yê."

 

‘Ma do cuya xo bipawê'

 

Selîne tewr peyîn wina vat: “Ma qerarê hukmî nas nêkenê. Yê ke cezaya qatilê Pinare vistî, cezaya muebetî danê cuye ke cuya xo pawenê. Nevîn Yildirim bi muebet tepişte ya. No zî nîşaneyê somutî ke 'ma pey qatilî de yê' yo. Ma hemverê nê qatilan de cuya xo pawenê. Ma do tim kuçeyan pirr bikerê."

 

‘Têkoşînê cinîyan vizêr dest pênêkerdo'

 

Endama Heyetê Îdarekara Şubeyê Hûmara 2yin ê Egîtîm Senî yê Stenbolî Sevgî Yilmaz zî wina vat: “Bi 20 serrî yo kiştişê cinîyan her ke şino zêde beno. Pêwa tehdayê polîsan, cinî kewenê meydanan. No bi têkoşînêk ame kerdene.  Seba Pêkerdişê Stenbolî têkoşînêk pîl ame dayene. No têkoşîn têkoşînêkê zaf kan o. Îqtîdar bi hêrişan hemverê têkoşînê cinîyan de vindeno. Ganî sîstem û zîhnîyet bivuryo. Bêguman cayê ke demokrasî çinbo, cinî bedelê giran danê. Ma tena têkoşînê cinîyan nêkenê. Ma têkonîşê cuyêka têduşt û demokrasî zî danê. Eke ma pîya têkoşîn bikerê ma do hîna bi hêz bê."

 

Cezaya ameya dayene cesaret daya gumanbaran

 

Endama Cinîyê Unîversîta Beyda Ceylan zî reaksîyon ramojna û vat: "Qatil û hemkarê ci ameyî xelatkerdiş. Cezaya ameya dayene zî cesaret daya gumanbaran. Qatilê Pinare vat, ‘başo ke peymane ameya feshkerdiş’. Peymana Stenbolî heqê cinîyan pawitêne. Wexto ke ameye feshkerdiş, bêguman yê ke tewr zêde ci ra feyde girewtî qatilî bî. Ma sey cinîyê ciwanî hemverê şîdetê camêrdan de têkoşîn kenê. Ma do hesabê heme cinîyê ke ameyê qetilkerdiş zî bipersê."