Şehrîban Aslan 

 

AMED - Avûkata OHDyî Sûzan Akîpa bale ante serê nobeta dadîyê tepişteyan ê ke seba tutanê xo dayê destpêkerdiş û wina vat: "Duştê modelê dadîbîyayîşî de ke wareyê sîyasî û komelî ra ameyê birnayîş têkoşînêkê dadîyan ê azadî û edaletî esto." 

 

Çalakîya Nobeta Edaletî ke merdimê tepişteyan seba tutanê xo Amed de dabî destpêkerdiş bi aşman o dewam kena. Verê Zîndanê Tîpê Dyî yê Amedî, ATKyê Amedî û Edlîyeyê Amedî de nobeta xo yê hewteyî de hîrê rojan bidomnê û xeylêk kesî şinê serdayîşê dadîyan. 

 

Komeleya Huqûqnasê seba Azadîye (OHD)yê Amedî zî nizdî ra nobete teqîb kena. Endama Heyetê OHDyî avûkate Sûzan Akîpa derheqê babete de qisey kerd û da zanayene ke xoverdayîşê dadîyan şaristananê bînan de zî vila bîyo û rastîyê zîndanan komelî rê neql kenê.

 

'Xoverdayîşêkê dadîyan ê bi israr esto' 

 

Sûzane dîyar kerd ke bi hezaran merdimî vera waştişê azadî ardê ziwan nika tepişteyê û wina ci de şî: "Çîyo tewr bi dej zî rewşa tepişteyanê nêweşan o. Nê çend serrê peynîyî zîndanan de mergî virazîyenê. Tepişteyê ke di binê şertê giranî de yenê tehlîyekerdiş, dima ra dinyaya xo bedilnenê. Na rewşa tepişteyê nêweşan birînêke giranî yê welatî ya. Heto bîn ra zî xoverdayîşêkê bi israr ê dadîyan esto. Dadîyî seba tutanê xo waştişê azadî û edaletî kenê. Her cayî de nînan anê ziwan. Vera nê zî ma eşkenê vajê ke xoverdayîşêkê pîlî yê bi israrî yê dadîyan esto." 

 

'Têkoşînêkê dadîyan ê azadî û edaletî esto' 

 

Sûzane sewbîna qal kerd ke ganî her kes bala xo bido serê xoverdayîşê dadîyan û wina derg kerd: "Dadîyê Aştîye ra bigîre, heta Dadîyê Şemeyî dadîyê ke verê seferetxaneyan de ro aqûbetê tutanê xo persenê heta Emîne Şenyaşare, Bedrîye Dokû û dadîyê ke di Nobeta Edaletî de yê. No xoverdayîşê dadîyan beno ke sey serewedaritişêke duştê modelê cinîya maqûla ke îqtîdar ferz keno de, bêro erjnayîş. Duştê modelê dadîbîyayîşî ke wareyê sîyasî û komelî ra ameyê birnayîş, têkoşînêkê dadîyan ê azadî û edaletî esto." 

 

'Mîrasê kulturî ra hêz gênê' 

 

Sûzane dewamîya de wina qal kerd: "Di serra 2022yî de cinîyê têkoşîn kenê hêzê xo mîrasê tarîxî ra gênê û waştişê xo yê azadî û edaletî anê ziwan. Dadîyî ewro sîyaset û polîtîka kenê. Dadîyî ewro rolê cinîya maqûle red kenê. Vera nê zî ewro Stenbol,  Wan, Amed û Îzmîr de verê edlîyeyan, verê awanîyê ATKyî û verê berê zîndanan de seba tepişteyan têkoşîn kenê. Dadîyî venga ATKyan kenê ke xoser hereket bikerê. No bî 2 serrî vera covîdî ra tepişteyê nêweşî teverê sererastkerdişan verdayê. Otorîterê dewlete bi destê huqûqî nêseyyewbînî meşrû kerdê.  Di nê hetî de zî seba binpaykerdişê heqan peynî bibê veng yenê kerdiş. Ma huqûqnasî zî veng kenê ke ganî heme merdimî wayîr ro tepişteyan vejîyê."