AMED - Endama Meclîsê Cinîyan ê DBPyî Ayhan Akgul da zanayene ke sere de Hemsereka Pêroyî ya DBPyî Salîha Aydenîz û heme cinîyê ke sîyasetê demokratîkî rayîr ra benê, benê hedefê îqtîdarî û wina vat: "Salîha Aydenîz, duştê tahrîkê giranî yê polîsî de pawitişê xo ardo ca. Ma sey Meclîsê Cinîyanê DBPyî verê hemsereka xo de yê." 

 

Bi waştişê azadîya fizîkî yê Rayberê PKKyî Abdullah Ocalanî ke 23 serrî yo binê tecrîdê giranî de yo, di 12ê Hezîrane de 'Rayîraşîyayîşê Gemlîkî yo pîl' amebi ca. Di rayîraşîyayîşo ke ame ca de, mîyan de parlementerî zî bîbî xeylêk merdimî ameyî derbkerdiş û serê vatişê tehrîkerdişî yê polîsan de Hemsereka Pêroyî ya DBPyî Salîha Aydenîz pawitişê xozayî ardbi ca. La dimayê nê Wezîrê Karê Zereyî Suleyman Soylû beyanato ke dabi de, Salîha hedef girewt û vatbi do cipersayîş bêro akerdiş. 

 

Dimayê nê Serdozgerîya Komare ya Stenbolî, 15ê Hezîrane de derheqê Salîha Aydenîz de bi sûcdarîyê 'Polîsî rê mukavemet' cipersayîş da destpêkerdiş. La dozgêrî dima ra bi behaneyê 'Derheqê parlementera ke yeno vatiş verîyê weçînayîşî yan zî dimayê weçînayîşî sûc kerdo de, otorîteyê cipersayîşî, aîdê Serdozgerîya Komare ya Anqarayî ya û cezayê giranî ya'. Derheqê dosya de qerarê qelsîyî da û şawit Serdozgerîya Komara Anqarayî. 

 

Serdozgerîya Komare ya Anqarayî zî derheqê Salîha de bi îdîayê 'Mukavemetî polîsî rê kerdo', 'Heqaret ro ci kerdo û birîndar kerdo', 'Rayîraşîyayîşo bê destûr o' Fezleke hadre kerd û şawit Wezaretê Edlî. Eynî roje de Wezîrê Edlî Bekîr Bozdagî zî fezleke îmza kerd û şawit serekkomarîye. Dimayê talîmatê Erdoganî fezleke şawitî Komîsyonê Têmîyanêrî yê Meclîsî. Komîsyonî zî 23yê Hezîrane de seba destnêdayîşê Salîha wedarîyo, ameyî têhet. Serekê Komîsyonê Destûrê Asasî Yûsûf Beyazît yo AKPyîj o, serekîya komîsyonî kerd. 

 

Fezlekeyê ke bi qestî wedaritişê seveknayîşê Salîha Aydenîz, bi behaneyê muxalefetê duştê Qanûnê Humara 2911î  Nawitkerdoxî û verê wuştişê polîsan ameyê hadrekerdiş. Do Sarûhan Olûç di komîsyon de derheqê hewldayîşê wedaritişê destnêdayîşê Salîha de qisey bikero. 

 

Dimayê pêvînayîşê komîsyonî de, do Komîsyonê  Hadrekarîyî bêro awankerdiş. Dima ra zî do derheqê wedaritişî yan zî nêwedaritişê destnêdayîşê Salîha de rapor bêro hadrekerdiş û Komîsyonê Tekelî rê bêro şawitiş. Salîha ganî di mabênê 7 rojan de Komîsyonê Hadrekarî rê pawitişê xo yê fekkî yan zî nuştekî bikero. Salîha bi xo zî eşkena pawitişê xo bikero û beno ke parlementerê ke zî seba pawitişê xo wezîfedar bikero. 

 

Endama Meclîsê Cinîyan ê DBPyî Ayhan Akgul derheqê munaqaşekerdişê destnêdayîşê Salîha Aydenîz de qisey kerd. 

 

'Ma verê Salîha de yê' 

 

Ayhane da zanayene ke 12ê Hezîrane de Gemlîkê Bûrsayî de bi amancê protestokerdişê tecrîdî rayîrşîyayîşêke kerdê û wextê rayîrşîyayîşî de polîsan bi tewirêke tehda mudaxale kerdo û vat: "Wexto Hemsereka ma Salîha Aydenîz pawitişê cewherî kerd, nê dîyayîşkîyî rayaumûmî rê ameyî parekerdiş. La dîyayîşkîyê ke Salîha Aydenîz ardo na sewîya çinî yê. Seba ke înan bi zanebîyayîş wina kerdî û tena dîyayîşkîyê Salîha pare kerdê. Ê hêzê asayîşî bê zî, tu kes nêeşkeno bi vatiş û çalakîyan kesî tehrîk bikero. Salîha duştê tehrîkê giranî yê polîsan de pawitişê cewherî ardo ca. Ma sey Meclîsê Cinîyan ê DBPyî verê hemsereka xo de yê." 

 

'Bi şîdetê polîtîkayê mêrdeyî ra ameya rî bi rî' 

 

Ayhane di dewamê qiseyê xo de da zanayene ke ro sîyasetmedaranê cinîyan polîtîkayêke sîyakerdişî yeno kerdiş û wina vat: "Menga vîyarteyî de hemverê Vervatoxa Meclîsê Cinîyan ê HDPyî Ayşe Acar Başaran de, tehdîdo 'Ez o to bismar bikerî' ame kerdiş. No zî motişê no yo. Hemserekê ma hedef yenê girewtiş, no netîceyê zîhnîyetê înan o. Sebebê hedefgirewtişê Salîha zî no wo ke sey cinîyêke îradeyê şarî ya. Seba nê bi şîdetê dewleta mêrdeyî ra ameya rî bi rî." 

 

'Ma her tim benê hedefê îqtîdarî' 

 

Ayhane peynîyê qiseyê xo de bale ante serê hêrişê ke, serê nasnameyê cinîyî de û wina peynî ro ci ard: "Cinîyê ke têkoşînê polîtîkî kenê her tim di hedefê îqtîdarî de yê. Têkoşînê polîtîkî danê, kaykerdişê mêrdeyî xerepnenê. Hêrişê ke hemverê hemsereka ma de, hemverê têkoşînê cinîyan de yo. Ma vînenê ke çapemenîya hetkerdoxe zî nê kampanyayê lîncî giranêr kena. Cinîyê HDPyî û DBPyî her tim di hedefê îqtîdarî de bîyê. Ma do sey Meclîsê Cinîyan ê DBPyî têkoşînê xo her tim pîl bikerê."