Marta Somek

 

STENBOL  - Aktîvîsta Rayraşîyayîşê Gemlîkî Burcugul Çubuk da zanayene ke pêwa hêrişê polîsan şar di her kuçeyê Kadikoyî de xo ver dayo û wina vat: "Her hêrişê hemverê Rayberê Kurdan de hemverê şarî de yo zî. Dewlete mesajê 'Dest medê Kurdan şima zî do biveşê' dana ma. Ma zî vanê 'Ma destê Kurdan vera nêdanê'. Mesajê tewr asasî yê rayîrşîyayîşî no bi." 

 

Tecrîdo giran ke serê Rayberê PKKyî Abdullah Ocalanî de 23 serrî yo domneno û no 15 mengî yo keye û avûkatî nêeşkenê pêvînayîş bikerê. Seba tecrîd peynî bibo xeylêk programî û çalakî yenê kerdiş. 12ê Hezîrane de bi serekîya Kongreya Demokratîke ya Şaran (HDK), Kongreya Komeleya Demokratîke (KCD), Hereketê Cinîyan ê Azadan (TJA), Partîya Mintiqayê Demokratîke (DBP) û Federasyonê Komeleyê Hetkarîya bi Keyeyê Tepişteyan (MED-TUHAD-FED) bi şîarê 'Duştê sîyasetê tecrîdî de seba pawitişê azadîye ma şinê Gemlîk' ame waştiş ke Gemlîkê Bûrsayî de rayîrşîyayîşêke bêro ca." 

 

Azadîya fizîkî! 

Xeylêk şaristanê Tirkîya ra bi hezaran merdimî waştî şêrê Gemlîk, la polîsan manîyî vetî. Şar duştê nê de cayêke mendê beyanat dayî û çalakî kerdî. Kadikoyê Stenbolî de zî pêwa tehdayan rayîrşîyayîşêke ame kerdiş û bi hezaran merdimî azadîya fizîkî yê Abdullah Ocalanî waştî. Rayîrşîyayîş seranserê roje dewam kerd û 70yî zêdeyêrî merdimî ameyî destbendkerdiş. Yew nê merdiman ra beşdarê rayîrşîyayîşî bîbî, Temsîlkara Serekîya Pêroyî ya Partîya Şorişgêran Burcugul Çubuk bî." 

 

'Her cayê Kadikoyî de şar bi' 

 

Burcugule wina dest bi erjnayîşê xo kerd: "Rayîrşîyayîş sey paweyê ma bi. La hinî cayî destûr nêdayî bi wesayît vejîyê. Wesayîtê înan ameyî girêdayîş. Stenbol de zî tehdayê polîsan zêde bi. Hewl dayî ma malûmat zî nêdê. Îdarekarê sazgeyan nêeşkayêne bêrê verê yewbînan. Ma hinî Kuçeyê Serasker de, hinî Kuçeyê Bahrîye de ameyî destbendkerdiş. Her cayê Kadikoyî de şar bi. Şarî rayîrşîyayîş de bi sloganan xoverdayîşêko xurt ramojnayî. Heme çîyê qedexe kenê la hetê xeta têkoşînî de bi serkewtiş netîce beno." 

 

'Her hêriş di eynî wextî de hemverê şarî de yo' 

 

Burcugule dîyar kerd ke xetê meşrûbîyayîşî hetê îqtîdarî û polîsan ra nîno famkerdiş û nê çîyî qal kerdî: "Wexto ma nezaret de bî, ewilî Soylû, pey ra zî Erdogan malûmat da. La nê malûmatî zelal nîyê. Fam nêkenê ma bi heqdarîya xo û quwetê xo bawer ê. No bi serran o bi faşîzmî nêeşkayêne ma bipelçiqnê. No çîyêko zelal o, her hêrişê ke hemverê Rayberê Şarê Kurdî de yeno kerdiş di eynî wextî de hemverê şarî de yo zî." 

 

'Wayîrvejîyayîşêk cidî esto' 

 

Burcugule vat ke wayîrvejîyayîşêk xurt ro Rayberê PKKyî esto û di na babete de zî wina ard ziwan: "No serrêke yo tecrîd domneno. Wareyê sîyasî yeno tengkerdiş û vanê qey do şar Ocalanî ra fek verado. La wina nîyo. Şar bi tewirêke cidî wayîr ro Abdullah Ocalanî vejîyeno. Wextê hêrişê hemverê Vaşurê Kurdistanî de zî rayîrşîyayîşê şarî de ma no vîna. Çalakîyê Ewropayî de û xeylêk cayê dinya de zî ma no vîna. Hêrişê polîsan hemverê rayîrşîyayîşî de hetê şarî ra nêame qebûlkerdiş. Babeta asasî zî na ya. Xeylêk kesan tepiştiş û destbendkerdiş da verê çimanê xo û ameyî rayîrî ra şîyayîş. Şarê Kurdî tu reyî tena nînê verdayîş. Qedera ma bi Şarê Kurdî dir eynî ya. Ma dewaya Kobanî de zî vîna. Nê hêrişî hemverê heme kesî bî. Verîyê rayîrşîyayîşî hemverê HDKyî de operasyon ame ca. Sosyalîstî û welatpawitoxî ameyî tepiştiş." 

 

Mesajê rayîrşîyayîşî 

 

Burcugule eşkera kerd ke dewlete bi serran o mesaj dana û vana, ‘Dest medê Kurdan şima do zî biveşê' û wina dergî da qiseyê xo: "Ma zî vanê ke 'Ma destê Kurdan vera nêdanê'. Ma nê heqê înan meşrû vînenê û ma têreyde rayîr ra şinê. Mesajê asasî yê rayîrşîyayîşî zî no bi. Mesajê 'Pêwa heme hêrişan do têkoşînê têduştî qezenc bikero' ame dayîş. Ma do têreyde qezenc bikerê. Şima nêeşkenê ma herdê ma ra bikerê, şima nêeşkenê ma apey berê. Ma do faşîzmî bi têkoşînê xo yê têduştî apey berê. Mesajo asas no bi. Ma sey Hêzê Têkoşînê Yewbîyaye (BMG) di Rayîrşîyayîşê Gemlîkî de bî. No hêriş hemverê têkoşînî de bi. Ma wazenê bi sinifê karkerî û Şarê Kurdî dir şoriş rêxistin bikerê. Wexto ma nezaret de bî tutêke tîşortê Demîrtaşî dabî xo ra dadîya xo dir amebi destbendkerdiş. Wexto ma nezaret de bîyî, 10 merdimî vera rengê zergûn, sûr û zerdî dabîyî xo ra ameyîbî destbendkerdiş. Wexto ma nezaret de bî, restorantê Somalîyîjan ke Anqara de vera rengê netewîyî ame padayîş. La duştê nê hêrişan de ma do bi rike têkoşîn bikerê."