Medya Uren

 

AMED - Hemsereka DFGyî Dîcle Muftuoglu derheqê tepiştişê 16 rojnamegeran de ercnayîş kerd û vat: "Nê hêrişê ke yenê kerdiş, newe nîyê. Labelê xoverdayîşê çapemenîye bi 30 serrî dewam de yo. Îqtîdar wazeno ke bi bêvengkerdişê çapmenîye û komelî dir îqtîdarê xo serê lingan de verdo, do nêreso amancê xo. Ma bêveng nêbenê, ma do tîya de bê.”

 

Amed de 8ê Hezîrane de erzîya serê keyeyan û 20 ci ra rojnamegerî, 22 kesî amebî destbendkerdiş. 16ê Hezîrane de zî 16 rojnamegerî bi îdiayê "endamîya rêxistine" ameybî tepiştiş. Rojnamegerî bi bahaneyê karûbarê rojnamegerî, muhtewayê xeberan, ziwanê xeberan û polîtîkayê weşanî ameybî tepiştiş. Derheqê hêrişê serê rojnamegeran de ca ameyo, Hemsereka Komeleya Rojnamegeran ê Dîcle Firatî (DFG) Dîcle Muftuoglu qisey kerd.

 

'Hewl danê komel bêveng bikerê’

 

Dîcle Muftuoglû demê qalê hêrişê serê çapemenîye de ameyê kerdiş erjna diyar kerd ke nê hêrişî newe nîyê bingehê ci heta awanbîyayîşê komare zî derg beno. Dîcle wina vat: "Nika reyna hêrişê îqtîdarê yê serê rojnamegeran de rojeve de yê. Bi ser çapemenî de hêrişêk zaf het yeno kerdiş. Nînan ra sebebo tewr girîng zî nimitişê rastîya şarî yo. Ma tîya zî vînenê ke cayê îqtidarî lerzeno,  seba polîtîkayê xo yê lêşinî biniminê rojnamegeran tepiştî. Eslê xo de wazenê beşê muxalîf bêveng bikerê. Nê ser o rojnamegeran de yenê. Bi komelêk bêveng verdê wazenê ke îqtîdarê xo tewr derg serê lingan de verdê.”

 

'Bi tepiştiş û sansuran wazenê bibê manî' 

 

Dîcle qalê serrê 90yî  û sîstemê ê wextî kerd û wina ro ci zêde kerd: "Di serrê 90yî de Şarê Kurdî çinî ameyêne hesebnayene. Hemverê nê de zî Şarê Kurdî xoverdayîşêk pîl seba nasnameyê xo dayêne. Rastîya îqtîdarî yê hêrişkerdoxî zî werte de bî. Bi qirkerdiş û pelçiqnayîşê polîtîkayêke pîlî yê çinîkerdişî dayêne kerdiş. Çapemenîya azade zî seba deşîfrekerdişê nê tehdayan ningêke muhîm bî. Di eynî wextî de zî çapemenîya azade nasnameyê têkoşînê şarî zî şaranê dinya rê vatêne. Xeylêk îqtîdarî cayê xo yewbînan rê verdayî labelê, çi kemî çi zêde ferqê înan yewbînan ra nêbîyî. Metodê înan ê hêrişî yenê bedilnayîş, modelê înan yewbînan ra cîya benê, labelê hişmendeyê înan nîno bedinayîş. Her tim seba bêvengkerdişê rojnamegêrî,  seba xeberan nêvirazê hewldayîşêk bîbî. Serrê 90yî de buroyê çapemenîyî ameyî bombevarankerdiş, xeylêk merdimî ameyî qetilkerdiş yan zî nezaret de ameyî vindîkerdiş. Ewro zî bi tepiştiş, ablûkakerdiş û sansuran wazenê bibê manî. Dîyayîşkîyêk wina vernîyê ma de yo çi heyf! Do bi bêvengkerdişî yê ma, îqtîdarê xo bidê rayîrberdişî." 

 

'Meslegê rojnamegêrî yena muhakemekerdene' 

 

Dîcleye  qalê îqtîdarê ke amancê înan nîno bedilnayîş de kerd û wina eşkera kerd: "Ma qalê serranê 90yî û hêrişê serê Kurdan de ameyê kerdiş, kerd. Roja ewro de zî bi eynî rengî hêrişê zafhetî serê Kurdan de yenê rayîr ra şîyayîş. Hêrişê teverê sînorî ra, krîzan dir rewşa înan ê bi rayîrnêberdişê dewlete eşkera yo. Çapemenîya azade roja ewro de zî nê rastîyan weş dana mojnayene. Dîyayîşkîyo bîyaye rayaumûmîyî dir pare kenê. Coka nê yewî zî di hedefê îqtîdarî de yê. Wexto ma ro destbendkerdişê embazanê xo û tepiştişê înan  biewnenê ma do bivînê ke tena rojnamegêrî, meslegê rojnamegêrîyî ra zî nînê muhakemekerdiş. Persê, ti çirê rojnamegêrîyî kena/ê, rojnamegêran ra yenê persayîş. La rojnamegêrî her roje ra hêzêrî vejênê kuçeyan. Bi tepiştişan nêeşkenê çapemenî bêveng bikerê!" 

 

'Ma apey game nêerzenê' 

 

Dîcleye qal kerd ke serrê 90yî ra çapemenî bêveng nêbîya û wina ci de şî: "Wexto rojname ame bombevarankerdiş zî roja bîn cayêke bîn ame akerdiş û xebatî dewam kerdî. Serra 2016î de xeylêk caameyê çapemenîyî ameyî padayîş. La çapemenîyê bi alternatîf awan kerdê dir bi tewirêke rayîrê xo dewam kerd. Ewro zî do eynî çîyî biqewimîyê. Çalakîyê duştê tepiştişê 16 merdiman de yenê ca zî nê ramojnenê. Tora hetkarîyî zî nê yewî ramojnena. Embazê ma apey game nêeştî. Her roje seba zêdeyêr xeberan virazê vejênê kuçeyan. Her roje rojnamegêr serê ci de senîn barê embazê/a xo bigîrê, qisey kenê. Nê dir her kes zî beno şahid ke çapemenî bêveng nêbena. Embazê ma bêveng nêmanenê. Sozê ma esto û ma do heta peynî dimayê sozê xo de bê."