Rozerîn Gultekîn - Safîye Alagaş 

 

STENBOL  - Sîyasetmedara Kurde û avûkate Aysel Tugluk ke nêweşa demansî ya, agêrayîşê ATKyî de bi avûkata OHDyî Elîf Taşdogan dir pêvînayîş kerd. Elîfe vat: “Vêşêrê tektîkî bêrê kerdiş, tena vetê vernîyê heyetî û hayîdar kerd ke Aysele zîndan de xo ewle hîs nêkena û nêweşîya aye aver kewena.” 

 

Sîyasetmedara Kurde û avûkate Aysel Tugluk Zîndanê Tîpê Fyî yê Hûmara Yewî yê Kandirayî yê Kocaelîyî de yena tepiştiş û bi nêweşîya demansî kewta, hewteyo vîyarte de serê muracatê bi israrê avûkatan de seba taloqkerdena înfazî proses ame destpêkerdiş. Aysele sewqê Sazgehê Tîpê Edlî (ATK)yî amî kerdiş û 13ê Hezîrane de dermankerdişê aye ser ra ame kerdiş û reyna şawitî zîndan. Qeraro ke seba Aysele bêro dayîş bi mereq yeno pawitiş. Mudurê Pêroyî yê Keyeyê Tewqîfî û Cezayî Yûnûs Alkaç îdîa kerd ke Komîsyonê Cigêrayîşê Heqê Merdiman ê Meclîsî vêşêrê waştişî, proses dayo destpêkerdiş û Aysele şawitê ATKyî. 

 

Avûkatanê Komeleya Huqûqnasê seba Azadîye (OHD) ra Elîf Taşdogan ke Aysele dir dimayê agêrayîşê ATKyî ra pêvînayîş kerdbî, ajansê ma rê qisey kerd. 

 

'Destpêkerdişê prosesê ATKyî di netîceyê têkoşînî de ame ca' 

 

Elîfe da zanayene ke vatişê Mudurê Pêroyî yê Keyeyê Tewqîfî û Cazayî Yûnûs Alkaç ke vato 14ê Hezîrane de pêvînayîşê komîsyonê Meclîsî de bê muracat Aysele sewqê ATKyî ameya kerdiş, rastî nêmojneno ra û wina ci de şî: "Têkoşîn muhîm o û manîdar o. Bi nê wesîleyî şima vînenê beno vengê tepişteyan û bi xusûsî zî Aysel Tugluke. No proseso ke  huqûq nîno ca, erjo etîk yeno peygoşkerdiş de, merdim bibo vengê tepişteyan xeylêk bi erj o. Bi qerarê îradeyê xoserî û muhîmîyê huqûqî  Aysel Tugluk sewqê ATKyî nêamî kerdiş. Aysele netîceyê têkoşînî û awanbîyayîşê rayaumûmî de ameye sewqkerdiş. Umîddara roporo bêro dayîş xîtabê wijdanê komele bikero û goreyê erjê huqûqî qerarêk bêro dayîş." 

 

'Vejîya Heyet' 

 

Elîfe sewbîna derheqê pêvînayîşê Aysele dir zî qisey kerd û na babete de zî nê çî ardî ziwan: "Zîndan de ciwîya Aysele roj bi roje zamet bena. Ez roja panşeme şîya dîdarîyê Aysel Xanime. Aysele seba rojêke berdê û ardê. Ma zanenê proseduro normal ardê ca, veta vernîya heyetî. Yanê wina rewşêke ekstrem nêameyo ciwîyayîş. Aysele êdî agêrayîşê ATKyî ra dima qawuşa karantînayî de nêmanena. Nika verê tepişteyan de manena." 

 

'Tetkîk nêameyo kerdiş' 

 

Elîfe dewamîya qiseyê xo de wina domna: "Aysele seba rojêke berdê ATKyî û pey ra ardê. Proseduro bîyaye de tetkîk nêameyo kerdiş û tena veta vernîya heyetî. Derbasbîyayîşê raporo ke heyet bido seba wextêke yo. Her reya ke şina ATKyî çi heyf heme tetkîkî newe ra nînê kerdiş. Tena vejenê vernîyê heyetî û proseduro eşkerakerde anê ca û  erjnayîş heyetî rê verdenê. Wexto merdim ro na rewşa bîyaye ewneno zî resimê problemî yeno xêzkerdiş. Cayê ke heqê weşîye, heqê cuya merdimî babeta vatişî ya, na nizdîyîya wina esta. Tîya de zî merdim nizdîbîyayîşê hemverê tepişteyî de vîneno." 

 

'Xo ewle hîs nêkena' 

 

Elîfe dîyar kerd ke, embazê Aysele yê tepişteyî,  avûkat û hekîman têreyde derheqê rewşa Aysele de rapor hadre kerdî û muracatê Serdozgerîya Komare ya Kocaelîyî kerdê û wina ard ziwan: "Neticeyê nîyadîyayîşî de ameyo vînayîş ke rewşa Aysele xerepêna. Nêweşîya aye roj bi roje giranêr bena. Endîşeyê Birêz Aysele zêde bîyê. Her tim bi endîşe ya û xo ewle hîs nêkena. Kontrolê hemsenceyî nêeşkena bîyaro ca û no bi zelalîyî yeno vînayîş. Zaf rincan yena pêvînayîşan. No zî mojneno ke nêeşkena rakewo û seba dermanê giranan wina bena. Ciwîya Aysele zîndan de zaf zamet bîya." 

 

'Ma qerarêk huqûqî û etîk pawenê' 

 

Elîfe peynîyê qiseyê xo de eşkera kerd ke heta Aysele nêro veradayîş do gamê huqûqî bidominê û wina peynî ro ci ard: "Goreyê raporê ATKyî ra bêro, ganî gamî bêrê eştiş. Ganî dermankerdişê Aysele goreyê îlmê tibî û huqûqî di şertê însanîyî de bêro kerdiş. Ma pawenê ke qerarêke goreyê huqûqî û etîkî bêro dayîş. Umîdê ma no yo ke qerarêke eksê nê de nêro dayîş. Di rewşa qerarêk negatîf bêro dayîş de, do têkoşînê ma bidomo."