AMED - Reaksîyon û nêrazîbîyayîşê hemverê tepiştişê 16 rojnamegeran dewam keno. Serekwekîla Koma HDPyî Meral Daniş Beştaş serdayîşê DFG û MKGPyî kerd. 

 

22 kesê ke 8ê hezîrane de çarçewaya cipersayîşê ke Serdozgerîya Komara Amedî dabi destpêkerdiş de 16 rojnamegerî ameyî tepiştiş. Hemserekê Komeleya Rojnamegaran ê Dîcle Firatî Serdar Altan, Midûra JINNEWSî Safiye Alagaş, Midûrê Karê Nuşteyê Rojnameyê Xwebûnî Mehmet Alî Ertaş, muxabirê Xwebûnî Zeynel Abîdîn Bulut, edîtorê Ajansa Mezopotamyayî (MA) Azîz Orûç û rojnameger Omer Çelîk, Lezgîn Akdenîz, Mehmet Şahîn, Sûat Dogûhan, Ramazan Gecîken, Neşe Toprak, Îbrahîm Koyûncû, Mazlûm Dogan Guler, Elîf Ungur, Remziye Temel û Abdurrahman Oncu ke dozgerî înan sewqê Dadgeha Sulhî ya Nobedar kerd, ameyî tepiştiş. Sewbîna edîtora ajansa ma Gulşen Koçuk, rojnamegere Esmer Tûnç, Kadîr Bayram, Mehmet Yalçin welatiyê bi nameyê Feynaz Koçûk û Îhsan Ergulen zî bi şertê kontrolê edlî ameyî veradayîş.

 

Serekwekîla Koma Partiya Demokratîke ya Şaran (HDP) Meral Daniş Beştaşe seba paştdayîşî serdayîşê DFGyî û Platformê Rojnamegerannê Cinîyan ê Mezopotamyayî (MKGP) kerd. Hemsereka DFGyî Dîcle Muftîoglu û vervatoxa MKGPyî Roza Metîna pêşwazîya Merale kerd. 

 

Serdayîşî de Merale bale ant serê operasyonê hemverê çapemenîye û reaksîyonê xo ard ziwan. Dîcle zî qiseyê xo de bale ant serê paştdayîşî û vat: "Çapemenîya azade 30 serrî corî ya qet bêveng nêbî û do nika zî bêveng nêbenê.”