Oznûr Deger 

 

ANQARA  - Meseret Karakaya ya ke Etîyopyayîj a vera rengê; kesk, sûr û zerdî serê tabelayê restorantê aye de bî û rastê tehdaya polîsan ameya û tabelaya ci bi rengo spê ame boyaxkerdiş. Meserete no serrêke yo tehdîd û hêrişê nîjadperestîyê polîsan ra yena rî bi rî. Serê nê hêrişan de sere ro CIMERî dayo û verperso ke ameyo dayîş de zî polîsan pawit o. 

 

Îqtîdarê AKP-MHPyî nîjadperestîyî kerda îdeolojîyê fermî yê heme welatî, şaristan û kuçan de no zaf baş aseno. Netîceyê vatişê nîjadperestîyî de hêrişî bêmabên domnenê. Yew şaristano ke hêriş û vatişê nîjadperestî ci de giran bîyo Anqara yo. Hemverê Kurdan, Elewîyan û heme multecîyan de neyarîyî yena kerdiş.

 

Duştê rengan de bêtehemûlî 

 

17ê Hezîrane de fînaka peyîn amî ciwîyayîş. Qezaya Çankayayî ya taxa Kizilayî de, di merasîmê akerdişê restoranto ke hetê merdima Somalî û Etîyopyayî ra amîbî akerdiş de ame ca. Emnîyetê Anqarayî rengê zergûn, sûr û zerdî yê serê tabelayî de yê kerdê behane û vatê nê rengê terorîstan ê û tabela bi rengo spê boyax kerdê. Dîmen çapemenîya komelkî de ame vînayîş. Parlementerê Partîya DEVAyî yê Stenbolî Mustafa Yeneroglû ke tewirê merasîmî bibi, mabênê ey û polîsan de kaos vejîya. 

 

'No hêrişo ewil nîyo' 

 

Wayîra kargeyî Meseret Karakaya derheqê babete de qisey kerd û da zanayene ke no hêriş yê ewil nîyo û no serrêke yo di binê hêrişan de yê. Meserete 10 serrî verî ameya Tirkîya û bîya hemwelatija Tirkîya. Meserete eşkera kena ke serrêke yo hêrişê polîsan serê înan de esto û dimayê hêrişê hemverê multecîyê Sûrîye yê Altindagî de polîsî her tim serê kargeyê înan de girewto, vêşêrê destûrî û otorîteyî, muşterîyî bizor zere ra vetê. 

 

Tehdayê ekonomî 

 

Meserete beyanat kerd ke vera tehdayan hetê ekonomî de zî bitesîr bîyê û ameyê sewîyeyê îflasî. Muşterî vera tersî nînê kafeyê înan. Meserete dustê tehdan de 4ê Teşrîna Peyîne ya 2021î de sere ro Merkezê Neqlkerdişê Serekkomarî(CÎMER) dana 

 

CÎMER polîsan pawit

 

Mengêke dimayê muracatî 1ê Kanûne ya 2021î de verpers CÎMERî ra yeno û yeno pawitiş ke hêrişî goreyê huqûqî û talîmatî yê. Meserete beyanat kerd ke îdîayê eksê rastîye yê seke 'Bi qaçaxî xebetnenê, alkol roşenê' xeylêk reyan polîsan hêrişê înan kerdo. 

 

Nê rengê 'terorîstan ê' 

 

Tewr peynî polîsan 17ê Hezîrane de serê merasîmê akerdişê restorantî de gênê û vanê nê rengî, 'rengê terorîstan ê'. Meserete reaksîyonê xo wina ard ziwan: "Nê rengê ala welatê min ê. Kes, sûr, zerd û kewe zî mîyan de esto. Komêke ciwanê zerrîwazî seba ma keyfweş bikerê tabelaya ma rengin kerdî. Bi rengê ala ma boyax kerdî. Gelo çira terorîst a? Ma bêçare mendî ke ma spê boyax bikerê. Mudaxaleyê nameyê tabelayî zî kerdî. Vatî 'SAAB' nameyo xerîb o, ganî ti bibedelnê. Manaya SAABî xurtbîyayîş o. Eya, ma xurt ê. Gelo çi şikê nê nameyî esto?" 

 

AKP nê hêrişan keno 

 

Meserete reaksîyonê xo wina domna: "Polîsan vat 'Ma şima sey Sîyayîyan Kizilayî de nêwazenê, şima tîya ra şêrê!' Pêwa her çîyê qanûnîyê zî hêriş kenê. Ez çira kargeyê xo padî? Her çîyê ci qanûnî yo. Ez wina fikirêna ke nê heme hetê AKPyî ra yenê kerdiş. Seba nê tehdayan ez bêçare ya kargeyî dewr bikera. CÎMERî vato kar û barê muhîmî yenê kerdiş. Gelo bi sereştiş û vetişê muşterîyan no kar û bar yeno kerdiş? No 10 serrî yo ez tîya der a. La no serrêke yo her çîyî zaf cîya bîyê. Ê ke goreyê qanûnan ciwîyenê zî adiz kenê."