MERKEZÊ XEBERAN - Tepiştişê 16 rojnamegeran  hetê Baroyê Mêrdînî û Çewligî ra ame şermezarkerdiş û wina ame vatiş: "Ma dorê çapemenîya azad de bibê xelek û wayîrê ci vejîyê. Ganî rojnamegerî bêrê veradayîş.”

 

22 kesê ke 8ê hezîrane de çarçewaya cipersayîşê ke  Serdozgerîya Komare ya Amedî dabî destpêkerdiş, amebî destbendkerdiş û 16 rojnamegerî ci ra ameyî tepiştiş. Hemserekê Rojnamegeran ê Dîcle Firatî Serdar Altan, Midura JINNEWSî Safiye Alagaş, Midurê Karê Nuşteyî yê Rojnameyê Xwebûnî Mehmet Alî Ertaş, muxabirê Xwebûnî Zeynel Abîdîn Bulut, edîtorê Ajansê Mezopotamyayî (MA) Azîz Orûç û rojnameger Omer Çelîk, Lezgîn Akdenîz, Mehmet Şahîn, Sûat Dogûhan, Ramazan Gecîken, Neşe Toprak, Îbrahîm Koyûncû, Mazlûm Dogan Guler, Elîf Ungur, Remziye Temel û Abdurrahman Oncu ameyî tepiştiş û şawitî Zîndanê Amedî. 

 

Reaksîyonê hemverê tepiştişê rojnamegerê kurdî dewam keno. Baroyê Mêrdîn û Çewligî zî reaksîyon vera nê de beyanetêk nuşteyî dayî.

 

Mêrdîn 

 

Komîsyonê Heqê Merdiman ê Baroyê Mêrdînî beyanetêk nuşteyî da û tepiştişê 16 rojnamegerê kurdî sey "darbeyêk pîl" pênase kerd û wina vat: "Rojnamegerê ke seba xebatê xo meslegî ameyî tepiştiş, ganî bi lezkî bêrê veradayîş û biresê azadîya xo. Bi tepiştişê rojnamegeran darbeyêk heqê girewtişê xeberan ê şarî dayî.”

 

Çewlîg

 

Beyanetê Baroyê Çewligî zî bi îmzayê Serokê Baroyê Çewligî Omer Farûk Hulaku ame weşanayîş. Omer Farûk Hulaku wina vat: "Eke çapemenîya azad nêbîne do ewro xeylêk çî û serebûtî tarî de bimendêne. Bîyayîşê azadîya çapemenîye nêagerayîş o. Ma wazenê heme rojnamegerê ke  Amed de ameyî tepiştiş, ganî bêrê veradayîş û biresê azadîya xo. Cayê rojnamegeran zîndan nîyo.”