ŞIRNEX - Esma Ayaz ke Zîndanê Şakranî de tepişte ya, dadîya aye Emîne Ayaz dîyar kerd ke kênaya ci hemverê poşmanî vejîyaya û bi saetan bi kelemçekerde îşkence ci rê ameyo kerdiş û vat: “Înan ra vatê, ‘dewlete çira şima nêkişena'. Tehdîdê mergî înan rê ameyo kerdiş. Ma cuya tutanê xo rê endîşeyîn ê.”

 

Teda û binpaykerdişê serê zîndanan her ke şino zêde beno. Tepişteyî zî heqê xo yê bingehîn ra bêpar yenê verdayîş û yê ke hemverê nê vejênê zî hucreyê yew kesî de yenê tepiştiş. Tepişteyê ke ê caardişê bêhuqûqî bi rayîrê keyeyê xo neql kenê, vengdayîşê wayîrvejîyayîşî kenê.

 

Nê tepişteyan ra yewe zî Esma Ayaz ke Zîndanê Şakranî ya Îzmîr de tepişte ya. Esma serra 1998ine de ameye tepiştiş û 24 serrî yo tepişte ya. Sewbîna ci rê 36 serrî ceza ameya birnayîş. Esma pêvînayîşê xo yê bi telefonî de neql kerd ke Zîndanê Şakranî de cinîyan rê poşmanî yena ferzkerdiş û tepişteyê ke ê çî qebûl nêkenê bi îşkenceyî dir rî bi rî manenê.

 

‘9 rey ameye surgunkerdiş’

 

Dadîya Esma, Emîne Ayaz, dîyar kerd ke kênaya ci 9 rey ameya surgunkerdiş û pêwa nê prosesî tu wext zulm qebûl nêkerda û vat: "Kênaya mi 24 serrî yo mîyanê çar dêsan de pêwa heme zilm û tehdeyan xo ver dana. Emrê ci zindanan de derbas bi. Heme heqê înan, înan ra ameyo girewtiş. Tutê ma destê înan de yê la reyna zî rehetî nêdanê înan.”

 

‘Bi seetan bi kelemçekerde îşkence ro ci ame kerdiş' 

 

Emîne di qiseyanê xo de wina bale ante serê tehdayê hemverê Esma de: "Rojo dişeme kênaya mi bi rayîrê telefonî malûmat da ke seba ke poşmanî qebûl nêkerdo îşkence ro ci ameyo kerdiş. Dima ra zî Esma kerdê hucreyê yew merdimî û cigêrayîşo virranî înan rê ameyo ferzkerdiş. Bi nê şiklî destê înan ameyo kelemçekerdiş û bi seetan îşkence ameyo kerdiş." 

 

'Tehdîdê mergî ro înan ameyo kerdiş' 

 

Emîne eşkera kerd ke îşkence û zilm bi serran o serê tepişteyan de dewam de yo û wina nîyadîyayîşê xo ard ziwan: "Kênaya mi ra vatê, 'Dewlete çira şima nêkişena?'. Tehdîdê mergî ro înan ameyo kerdiş. Ma ciwîya tutanê xo ra bi qaxû yê. Ma veng kenê ke wa ê îşkenceyî ro tutanê ma nêkerê. Wa vengê tutanê ma bêro eşnawitiş. Wa tepişteyê nêweşî serbest bêrê veradayîş û îşkenceyo ke serê tepişteyan de yo wa peynî bibo." 

 

'Ma do vengê tepişteyan neql bikerê' 

 

Babê Esma Ferhan Ayazî zî seba tepişteyan venga hêsgirîyî kerd û vat: "Heqê telefonî bi sînor kerdê. Ma nêeşkenê kênaya xo dir bi asanî qisey bikerê. Tewr peynî bi rayîrê telefonî kênaya mi behsê îşkenceyo ke ro înan ameyo kerdiş, kerd. Di hucreyan de ê viran kerdê û kelemçe kerdê. Ma nêzanê çiqas wina mendê, labelê bi seetan bi nê şiklî mendê. Tu kes muameleyê winayîn heq nêkeno. Ma duştê nê îşkenceyan de, ganî vengê xo berz bikerê. Ma rewşa tepişteyan rayaumûmî rê û dezgeyê heqê merdiman ê Ewropayî rê neql kenê."