ŞIRNEX - Fadîle Malgaz ke seba zulmê dewlete 3 rey koçber bîya, dîyar kerd ke ê 42 serrî yo binê zulmê dewlete de yê û vat: "Dewlete keyeyê ma rijna, veşna, îşkence kerd la se kerdî nêkerdî reyna zî ma reyna fek dewaya xo ra vera nêda.”

 

Çend bajar, qeza û dewî cîya bê zî vîrardişê xeylêk  kurdan sey yewbînan ê. Kurdê ke seba nasname û bîyayîşê xo her wext binê zulm û tedayan dir rî bi rî mendê, hîkayeyê xoverdayîşî zî nuştê. Nînan ra yew keyeyan ra keyeyê Fadîle Malgaz o. Fadîle 58 serrî ya û nika qezaya Hezexî ya Şirnexî de ciwîyena û dayîka 7 tutan a.

 

Ferzkerdişê qorîcîtî…

 

Fadîle, bi eslê xo dewa Sahonî ya girêdayê qezaya Perwariya Sêrtî ra ya. Fadîleya ke wexto bena 12 serrî yena zewicnayîş û dewa Çemê Karî ya Perwarî de bi ca bena. Cuya aye ya mîyanê keyeyî de tim bi zor û zehmetiyan derbas bena. O wextî de qorîcîtî her kesî rê ameyîne ferzkerdiş. Keyeyê Fadîle zî bi eynî zulmî dir rî bi rî mendî û keyeyê înan yeno veşnayîş. 

 

Zulmê 42 serran

 

Fadîle wina qalê ê wextî kena: "Me qorîcîtî qebûl nêkerd. Ma her tewir zulm dî. 42 serrî yo ma zulmî dewlete dir rî bi rî mendê. Îşkenceyî de 7 didanê vistewreyê mi şikinayî, serê vewre de îşkence tutanê înan rê kerdî. Sewbîna heme pesê ma sere birnayî. Keyeyê ma rijnayî. Ma verê xo da Cizîr û tîya zî 2 vistewreyê mi ameyî tepiştiş. Reyke bîn seba zulmî ma verê xo da Hezex û ma tîya de bi ca bî." 

 

‘Lajê mi hemverê zulmî de tewrê têkoşînî bi’

 

Lajê Fadile, Nîhat Malgaz tewrê Têkoşînê Azadîye beno û 2yê hezîrana 2016 de Hezex de dinyaya xo bedilneno, dima ra reyna zulmê dewlete hemverê keyeyî dewam keno. Fadîle wina qalê lajê xo kerd: "Prosesê qedexeyê tebervejîyayîşê kuçeyan de  polîsan her tim eştêne serê keyeyê ma. Lajê mi Nihat seba zulmê dewlete tewrê PKKyî bi û 2yê hezîrana 2016 de şehîd kewt. Seba ez cenazeya lajê xo bigîrî ez şîya 3 bajaran û tewr peyîn mi cenazeya lajê xo girewt. Dimayê şehîdbîyayîşê lajê mi, dewlete reyna pey ma de bî. Reyke bîn keyeyê ma veşnayî, çîyêk ma rê nêverdayî. Waştêne ke ma tîya vejîyê û şêrê. Labelê ma reyna keyeyê ke ameyî veşnayîş reyke bîn viraşt.”

 

‘Ma pey dewaya xo de bê’

 

Fadîleya ke hema qijîya xo de bi zulmê dewlete dir rî bi rî menda tu wext fek xoverdayîşî ra vera nêdaya. Fadîle wina qal kerd: “Ê prosesan de ma bi her hawa perîşan bî. Hemverê zulm û zordestî ma tim xo ver da û têkoşînê xo ma dewam kerd. Lajê mi nê rayîrî de  şehîd kewt. Ma pê serberz ê. Heta ke ma sax bê, ma do pey dewaya înan de bê. Homa zalim û bêbextan rê nêverdo."

 

‘Ma hêrişan şermezar kenê’

 

Fadîle qiseykerdişê xo de bale ant serê hêrişê ke bi ca yenê û vat: "Ma hêrişê ke bi hemkarîya PDKyî bi ca yenê şermezar kenê. Ez venga Barzanî û pêşmergeyan kena. Tirkan çim vera dayo ca û warê şima! Sewbîna wa nêvajê ma kurdan qedênenê, kurdî nêqedênê.”