AMED - MKGP û DFGyî bi amancê balantişê serê operesyonê 8ê Hezîrane de sereştişê ajans û awanîyê rojnamegeran de ame kerdiş de beyanat dayî çapemenîye. Rojnamegeran vat, do çapemeniya azad bi tehdîdan bêveng nêmano. 

 

Komeleya Rojnamegerê Dîcle Firatî (DFG) û Platformê Rojnamegerê Cinîyan ê Mezopotamyayî (MKGP) derheqê operesyonê 8ê Hezîrane de serê rojnamegeran û buroyê înan de ameyo kerdiş, verê  berê bînaya JİNNEWSî de beyanat dayî. Beyanat de pankartê serê fotografê rojnamegerê ke ameyê destbendkerdiş estbî û nuşteyê "Şima Nêeşkenê Bêveng bikerê” ser de amebi nuştiş wedarnayî. Pêwa  kedkarê çapemenîye; TUHA-DER, MEBYA-DER, rêxistinê Partîya Demokratîke ya Şaran (HDP), Tevgerê Cinîyan ê Azadan (TJA) û keyeyê ke Nobeta Edaletî de ca gênê beşdarê beyanatî bî.

 

Metnê beyanatî bi kurdkî vervatoxa MKGPyî Roza Metîna û metnê bi tirkî zî edîtora Jinnewsî Bêrîtan Canozer wend. 

 

‘Wazenê ma bêveng bikerê’

 

Roza, destpêkê qiseykerdişê xo de vat: "Îqtîdarê AKP-MHPyî bi polîtîkayê şerî yê zere û teberê welatî ver bi teraşî benê. Hetê ke hemverê şer, teda û şîdetî xo ver danê kenê hedef. Rojnamegerê ke benê vengê  kesê ke hemverê şer, teda, şîdetî û aştî û azadî pawenê û polîtîkayê îqtîdarî teşhîr kenê zî bi nê tedayan dir rî bi rî manenê. Embazê ma yê rojnamegerî bi 7 rojî yo mudurîyê emniyetî de yenê tepiştiş û hema ma nêzanê tam bi çi yenê sûcdarkerdiş. Labelê goreyê zanayîşê emniyetî servîs kerdo, meslegdarê ma tena seba faliyetê xo yê rojnamegerî nika yenê destbendkerdiş. Pêwa produksiyonê embazanê ma ci de xebityenê, bi bahaneyê 'Cigêrayîş dewam keno' hîn binê ablûqayê  polîsan de yê. Dinya de nimûneyê nê çin o. Ma nê ra fam kenê ke esil amancê îqtîdarê o yo ke Çapemenîya Azad bêveng bikerê û wazenê rojnamegerî nêxebityê."

 

‘Rojnamegerê cinî benê hedef’

 

Roza dewamîyê qiseyê xo de wina vat: "Seke yeno zanayîş 8ê Hezîrane de serê buroyê JINNEWSî de zî ame girewtiş. JINNEWS hemverê ziwanê pederşahî, cinsperestî, mîlîtarîst û nîjadperestî bi sloganê 'Ma vera ke camêrdî vajê çi nusenê’ vejîya û bi nê adetî têkoşînê xo dewam keno, pêwa pêro zehmetiyan bi vengê cinîya azad û do nê dewam bikero. Seba îqtîdarê AKP-MHPyî 'cinayetê polîtîkî' şarî ra binimino û cinîyê azadî bêveng bikero, her roje hêrişêk newe hemverê têkoşînê cinî de keno û hacetê tedayî awan keno. Rojnamegerê cinî yê kurdî hetê îqtîdarî ra benê hedef. Operasyonê 8ê Hezîrane de zî ma dî ke îqtîdar terseno ke rastî vejîyo werte. Terseno ke heqîqet bireso komel. Tehemul nêkeno kes hemverê înan de veng vejo.”

 

‘Embazanê ma vera bidê’

 

Roza, tewr peyîn wina vat: “Demêk ke kesê seba 'bi kurdî fîqfîq kerdî’ ameyî cezakerdiş de merdiman xo bi rêxistin kerdî û xo îfade kerdî. Demê çapemenîya azad nê bêhuqûqî teşhîr kerd bî hedef. Nameyê rêxistinêke vernîya operasyonî de bi ca kerdî bi û rastî qelibnayî. Na rewşe hema dewam kena. La gumanê ma ci ra çin o ke hedefê esil hedefgirewtişê faliyetê rojnamegerî yo. Hîn xeylêk meslegdarê ma yenê muhakemekerdiş, xeylêk zîndan de yê. Heme muhakemekerdişî de rojnamegerî sey sûc yena vînayîş. Ma baş zanê amancê nê operasyonê 8ê Hezîrane çi yo. Coka şima çiqas krîmînalîze bikerê zî şima çi qas teda bikerê zî ma do bibê vengê heqîqet î. Ma veng danê ke heme embazê ma biresê azadîya xo."

 

Beyanat bi sloganê, "Çapemeniya Azad Nîna Bêvengkerdiş" peynî bî.