STENBOL - Sekretera Pêroyî ya OHDyî Rengîn Ergul, dîyar kerd ke qerarê 'Ocalan-2' no 8 serrî yo nîno ca û wina vat: "Birêz Abdullah Ocalan û hereketê Azadîya Kurdî her tim di aştî de bi israr bîyê. Caardişê aştîye bi azadîya Birêz Ocalanî dir mimkun a." 

 

Rayberê PKKyî Abdullah Ocalan 23 serrî yo Îmrali de di binê tecrîdê giranî de yo û 15 mengî yo ke malûmat ci ra nîno girewtiş. Pêvînayîşo peyîn di 25ê Adare ya 2021î de ame ca. Selahîyetdaran serê endîşeyan de Abdullah Ocalanî bi birayê ey Mehmet Ocalanî dir bi telefon pêvînayîş da kerdiş û tena 4 deqeyî dewam kerd. 

 

No serrêke yo pêwa heme hewldayîşê avûkatan tu verpersêk pozîtîf nêameyo girewtiş. Buroyê Huqûqî yê Asrînî muracato lezkî  Roportorîyê Xusûsî yê Îşkenceyî yê NYyî rê kerd. 

 

775 avûkatan ra muracat 

 

Merkezê Pêroyî yê Komeleya Huqûqnasê Seba Azadîye (OHD) zî seba pêvînayîşan hewldayîşê xo domnenê û 775 avûkatî bi serekîya OHDyî de derheqê qedexeyê pêvînayîşê bi Rayberê PKKyî Abdullah Ocalanî dir di 10ê Hezîrane de muracatê Dedgêrîya Înfazê Bûrsayî dayî. 

 

Di pêvînayîşo peyîn de îqaz kerdbi 

 

Rayberê PKKyî di pêvînayîşê birayê xo Mehmet Ocalanî dir vatbi: "Hem ti hem dewlete şima şaşîyan kenê. Bi serran o pêvînayîşî nînê kerdiş. No di tu huqûqîyî de çinî yo. Ameyîşê to şaş o û bi talûke yo. Dewlete zî bi talûke ya. No rast nîyo. Eke pêvînayîşêke bêro ca wa bi çarçewaya huqûqî de bo. Bi telefon pêvînayîş nêbeno. Çîyê şima kenê şaş ê. Dewlete şaş kay kena. No nîno qebûlkerdiş. No xeylêk bi talûke yo. Gelo şima zanenê ke şima se kenê? Wa avûkatê mi bêrê tîya!" 

 

OHD, ÎHD û Weqfê Huqûqî yê Komele (TOHAV) di Stenbol de bi babeta 'Duştê sîyasetê tecrîdî de heqê aştî' konferans ard ca. Di konferans de ame vatiş ke ganî lezkî Abdullah Ocalanî dir pêvînayîş bêro kerdiş. 

 

'Hewl danê îradeyî çinî bikerê' 

 

Sekretera Pêroyî ya OHDyî Rengîn Ergul, da zanayene ke wedaritişê heqê umîdî bi muhakemekerdena padaye yê Abdullah Ocalanî ameyo destpêkerdiş û wina vat: "Vernîya muhakemekerdene ya Birêz Abdullah Ocalanî û girêdayeyê muhakemekerdişê vurînayîşê qanûnî, cezayê bi şertî veradayîş çinî bî. Wedaritişê heqê umîdî zî bi ardişê Abdullah Ocalanî dir dest pêkerd. Tîya de amancê înan no wo ke şexsê Şarê Kurdî de îradeyê Birêz Ocalanî çinî bikerê. No di hetê qanûnê Tirkîya û pêkerdişê mîyanneteweyî de duştê huqûqî yo." 

 

'Qerarê 'Ocalan-2' 8 serrî yo nîno ca' 

 

Rengîne qerarê 'Ocalan-2' yê di 2014î de Dadgehe ya Heqê Merdiman ê Ewrûpayî ra vejîyaya, vîr fîna û wina ard ziwan: "DMMEyî qerar da ke no qerar duştê rumetê merdimîyî de yo, duştê merdimîyî de yo û vat ganî Tirkîya mevzuat goreyê şertan awan bikero û seba tehlîyekerdişê merdimêke şert bêro awankerdiş û merdimî di binê tecrîdî de nêrê girewtiş. La Tirkîya bi tu tewirêke goreyê qerarî hereket nêkena. Tirkîya goreyê qanûnê xo zî hereket nêkena. Pêro 8 serrî yo no qerar ameyo dayîş la nîyardo ca." 

 

'Hêzê ke zor bido înan  ma yê' 

 

Rengîne di peynîyî de erjnayîşê xo wina dewam kerd: "Eke komîteyê wezîran ke tesîrê xo serê Tirkîya de bixebetnayêne do Tirkîya hema zafêr gamê pozîtîfî bieştêne. Seba ke sazgehê mîyanneteweyî tesîrê xo vindî nêkerê, bêçare ganî nê caardişan bikerê. Ma Tirkîya dawetê vurînayîşê qanûnê înan kenê. Ganî rayaumûmî nê prosesî teqîb bikero û seba sazgeyê mîyanneteweyî zî wezîfeyê xo bîyarê ca û zor bido înan. Hêzê ke zor bido înan zî ma yê; rayaumûmî ya, sazgeyê komelê sivîl ê, roşinvîrê û serekê komele yê. Awankerdişê aştî zî azadîya Abdullah Ocalanî dir mimkun a.  Birêz Ocalan û hereketê azadîyî her tim di aştî de bi israr bîyê. Seba na awan bikerê zî ciwîye û têkoşînê xo ronayê werte. Coka nê teqez awankerdişê aştîye bi azadîya Birêz Ocalanî dir mimkun a."