STENBOL - Rojnameger, aktîvîst, siyasetmedar û temsîlkarê rêxistinê cinîyan, destbendkerdişê rojnamegeran ke mîyan de mudura JINNEWSî Safiye Alagaş û edîtora JINNEWSî Gulşen Koçuk zî estê şermezar kerdî û waştişê veradayîşê heme rojnamegeran kerdî. 

 

8ê Hezîrane de te de mudura ajansê ma Safîye Alagaş û edîtora ma Gulşen Koçûk, Hemserekê Komeleya Rojnamegerê Dîcle Firatî (DFG) Serdar Altan, Mudurê Karê Nuşteyî yê Rojnameyê Xwebûnî Mehmet Alî Ertaş, edîtorê Ajansê Mezopotamyayî (MA) Azîz Orûç û Omer Çelîk, muxabirê Xwebûnî Zeynel Abîdîn Bûlût û rojnameger Lezgîn Akdenîz, Mehmet Şahîn, Suat Dogûhan, Ramazan Gecîken, Esmer Tûnç, Neşe Toprak, Mazlûm Dogan Guler, Elîf Ungur, Îbrahîm Koyuncû, Remziye Temel, Mehmet Yalçin, Abdurrahman Oncu, Kadîr Bayram û Feynaz Koçûk amebî destbendkerdiş.

 

Eynî wextî de sereştişê keyeyê rojnamegeran û Produksiyonê Pel, Produksiyonê Piya, Produksiyonê Arî û ajansê JINNEWSî yê Amedî kerdibî. Sereştişan de xeylê hacetê rojnamegeran ameyî desteserkerdiş.

 

Sewbîna seba demê destbendkerdişê rojnamegeran derg bikerê, vizêr berdî edliye. Rojnamegerî edliye de bi saetan bikelemçekerde ameyî vindarnayîş. Dimayê reaksîyonê rojnamegeran kelemçe ameyî vetiş. Demê destbendkerdişê rojnamegeran 4 rojê bînî zî ame dergkerdiş. Bi dergkerdişê demî dir do rojnamegerî 8 rojan destbendkerde bimanê.

 

Siyasetmedar, aktîvîst û rojnamegeran reaksîyon vera destbendkerdişan da û vatî ganî rojnamegerî bêrê veradayîş.  

 

‘Ez o kîşte rojnamegerê cinîyan de bî’ 

 

Rojnameger Sevda Erkilinç, destpêkê qiseykerdişê xo de bale ant serê operasyonê siyasî yê qirkerdişî û vat: "Seba pêro beşê komelî operasyonê siyasî bi ca yenê. Labelê operasyonê hemverê cinîyan taybetî gênê dest. Ma operasyonê hemverê TJA û komeleyê cinîyan de dî. Demo ke babete bena rojnamegerê cinî taybetî nêzdîyê înan benê. Seba rojnamegerê cinî benê vengê heme cinîyan. Amed de rojnamegerê cinî yê JINNEWSî ameyî destbendkerdiş. Amanc kenê ke cinîyan bêveng bikerê. Ez sey rojnamegerêke cinî vana ez o her tim kîşte rojnamegerê cinî û kîşte JINNEWSî de bî. JINNEWS tena nîyo. Cinî tena nîyê. Ma do bibê vengê înan. Wa rojnamegerî serbest bêrê veradayîş."

 

‘Qelema rojnamegeran do erd de nêmano’

 

Vervatoxa Partiya Mintiqaya Demokratîk (DBP) ya mintiqaya Marmarayî Dîlber Demîr reaksîyon ramojna û vat: “Hêrişê hemverê JINNEWSî nîşaneyê tengbîyayîşê dewlete yo. Demo ke dewlete kewena tengî, hemverê muxalîf, rojnameger û cinî kena hedef. Ma her roje bi destbendkerdişan çimanê xo akenê. Ma zanê ke rojnamegerê cinî tu wext fek qeleme û têkoşînê xo ra vera nêdanê. Senîn ma cinîyê kurdî hemverê her tewirê hêrişan fek têkoşînî ra vera nêdanê û têkoşînê xo pîl kenê do rojnamgerî zî eynî çî bikerê. Tu wext qelema ê rojnamegeran erd de nêmanena. Ma venga serbestveradayîşê heme rojnamegeran kenê. Ma do pîya têkoşînê xo dewam bikerê û ma do paştdayîşê embazanê xo bikerê.”

 

‘Ma do tim pîya bê’

 

Aktîvîsta Yenî Demokrat Kadin Çîgdem Buyukpancar zî derheqê destbendkerdişan de wina vat: "Îqtîdar her roja ke derbas beno bêçare beno û bi polîtîkayê teda û zordarî wazeno şar bêveng bikero. Ma tîya de reyke bîn vanê rojnamegerê cinî tena nîyê. Ma tena nîyê, ma bêhêvî nîyê û ma bêçare nîyê. Ma têhet de yê û ma do têhet de bê.”

 

‘Rastî tarîtî de nêmanena’

 

Hemvervatoxa Rêxistinbîyayîşî yê Şaristanî ya Partîya Demokratîke ya Şaran(HDP)ê Stenbolî  Besra Îşsever zî wina bale ante serê muhîmîya çapemenîya azade: "JINNEWS û çapemenîya azade nê welatî de duştê qetilkerdişê cinîyan, îstîsmarîya tutan, qirkerdişê xebere viraştişî û teqdîmkerdişî de yê. Embazê ma yê cinîyî heqîqeto bîyaye anê ziwan. Keda ê embazanê ma yê di mîyanê çapemenîyî de, ma her tim vînenê. Ma veng a serbestveradayîşê înan kenê. Qelema cinî tu reyî nîna şiknayîş û do her tim nuştişê rastîyan zî bidomnê. Rastî di tarîyî de nêmanena û do vejîyo rîyê herdî."

 

‘Nêeşkenê JINNEWSî bêveng bikerê’ 

 

Endama Kirkyama ya Hetkarîya cinîyan kena ke Tulay Korkûtan, da zanayene ke polîsan eşto serê buroyê JINNEWSî û vat: "Xeylêk rojnamegerî Amed de ameyê destbendkerdiş û polîsan dest dawo serê hacetanê rojnamegeran, JINNEWS nê welatî de bîyo vengê têkoşînê cinîyan. Her tim vengê têkoşînê cinîyan dawo hesnayîş. Ma do verê JINNEWSî de bê. Nêeşkenê JINNEWSî bêveng bikerê."

 

‘Destbendkerdişî wa cade serbest bêrê veradayîş’

 

Endama Hetkarîya Muêrî Zelîha Korkmaz zî, beyanat da ke rojnamegere cinîyî duştê şîdetê dewlete ya mêrdeyî de vejîyayê û duştê ziwanê cînsîyetperestîyî ya serdestan de xeberan virazenê. Zelîha wina babete şîrove kerd: "Rojnamegerê cinîyî rojeva cinîyan eşkera kerdê û têkoşînê cinîyan pîl kerdê. JINNEWS rojeva cinîyan a û vengê cinîyan a. Cinî tu reyî bêveng nêbenê, rojnamegerê muxalîfî tu reyî bêveng nêbenê. Merdimê ke ameyê destbendkerdiş ganî lezkî bêrê veradayîş." 

 

‘Yewîye hêz a’

 

Încî Dûrgûnlû, di qiseyanê xo de bale ante serê têkoşînê cinîyan û wina qal kerd: "Ganî no tehda rojnamegeran nêtersino, têkoşîn bikerê. Qando tu çîyêke qedexe bikerê, hende zorî dano aye/ey merdimî ke têkoşîn bidomna/o. Ez veng ro her kesî kena ke JINNEWSî dir û kedkaranê çapemenîya azade dir bibê yew. Seba ke yewîyî hêze yê û têkoşîn zî ganî wina bêro dayîş."