WAN - Cinîyê sîyasetmedarî û aktivîstî reaksîyon ramojnayî binpaykerdişê rojnamegeran û vatî ganî lezkî bêrê veradayîş. Cinîyan wina vat: "AKP di hadreyîyê şerêkê newe de yo. Welat de krîz û kaos nîno qebûlkerdiş û vera nê zî hêrişî dewam kenê. Ma hetkarî çapemenîya azade dir pîl kenê." 

 

Amed de 8ê Hezîrane de te de mudura ajansê ma Safîye Alagaş û edîtora ma Gulşen Koçûk, Hemserekê Komeleya Rojnamegerê Dîcle Firatî (DFG) Serdar Altan, Mudurê Karê Nuşteyî yê Rojnameyê Xwebûnî Mehmet Alî Ertaş, edîtorê Ajansê Mezopotamyayî (MA) Azîz Orûç û Omer Çelîk, muxabirê Xwebûnî Zeynel Abîdîn Bûlût û rojnameger Lezgîn Akdenîz, Mehmet Şahîn, Suat Dogûhan, Ramazan Gecîken, Esmer Tûnç, Neşe Toprak, Mazlûm Dogan Guler, Elîf Ungur, Îbrahîm Koyuncû, Remziye Temel, Mehmet Yalçin, Abdurrahman Oncu, Kadîr Bayram û Feynaz Koçûk amebî destbendkerdiş.

 

Eynî wextî de eştî serê merkezê buroyê ajansê ma zî, hard dîsk zî te de xeylêk hacetê teknîkî ameyî destserkerdiş. 2 rojê bînî zî destbendkerdişê rojnamegêran ame dergkerdiş û qerarê sînorkerdişî ardê serê dosyaya înan. Heto bîn ra zî ame banderbîyayîş ke rojnamegêrî di hucreyê yew merdimî de yenê vindarnayîş. Her hetî ra reaksîyonî duştê destbendkerdişan de dewam kenê. 

 

‘Ma keye de tena Stêrk û Medya TV temaşe kenê’

 

Aktivîsta Hereketê Cinîyan ê Azadan (TJA) Şukran Şen, derheqê amancê operasyonî de wina vat: "Wazenê vengê cinî û Kurdan bibirnê. Ma keyeyê xo de tena Stêrk û Medya TV temaşe kenê. Heme qenalê bînî bi zîhnîyetê serdestî weşan kenê. Çapemenîya azade dir ma veng û rengê cinî vîna. Ma ajans û qenalê ke hemverê fikr û ziwanê ma de rêzdar ê temaşe kenê. Çapemenî çinîbo cinî bêveng a, komele bêveng a. Coka nê ganî xebatkerdoxê çapemenîya azade bêrê veradayîş." 

 

‘Ma tehda qebûl nêkenê’

 

Aktivîsta TJAyî Leyla Aşkan zî wina reaksîyon mojna ra: "Şer senîn beno wa bibo coka nê rastîyan ra tavîz nêdanê, rastê polîtîkayê tehdayî yenê. Rojnamegerê Kurdî seba goreyê îqtîdarî hereket nêkenê hedef yenê girewtiş. Çapemenîya azade seba şarî rojnamegerî kena. Ma tehda qebûl nêkenê. Wa xebatkerdoxê çapemenîya azade lezkî bêrê veradayîş."

 

‘Wazenê bêveng bikerê’ 

 

Endama Meclîsî ya Cinîyan ê HDPî Hatîce Kîye zî qal kerd ke rojnamegêrê çapemenîya azade hewl dana vengê şarî bido eşnawitişî û nê çîyî ardî ziwan: "Amanco asasî vengê Şarê Kurdî û vengê cinîyan bibirno. Îqtîdar her çî goreyê xo wazeno û cinîya maqûle ferz keno. Hewl dano ke komelêko seretewênaye awan bikero. La no 50 serrî yo çapemenîya azade pêwa tehdayan nusnena. Do binusno zî! Ganî lezkî nê polîtîkayan ê şaşan ra agêro, xebatkerdoxê çapemenî verado." 

 

‘Falîyetê rojnamegerî suc nîyê’

 

Parlementera HDPyî ya Mûşî Şevîn Coşkûn zî derheqê babete de nîyadîyayîşê xo ard ziwan: "Falîyetê rojnamegerî sûc nîyê. Rojnamegerî vengê xo bi tewirêke tewr rast resnenê şarî. Wezîfeyê înan no yo. Tirkîya de krîzêk pîlî yê ekonomî, betalî û feqîrî esto. AKPyo ke xetemîyayo û polîtîkayê şerî reyna visto dewre, çapemenîya azade zî hedef gêno. No ma matmende nêverdeno. AKP seba çîyêke kerdo wazeno binimno,  çapemenîya azade destbend keno. Coka AKP êdî Tirkîya de nîno waştiş û nîno qebûlkerdiş, duştê heme muxalîfan de polîtîkayê tehdayî dewre de yo. Rojnamegerî hewl danê rastîyan bimojnê ra. Ma embazanê xo dir hetkarîye de yê. Zafêrî embazê rojnamegerî tepiştê. La do tu reyî dest rastîyî ra vera nêdê. Do qelema xo teslîm nêkerê." 

 

‘Ma verê çapemenîya azade de yê’

 

Parlementera HDPyî ya Wanî Muazzez Orhan zî wina vat: "Seba eksê huqûqî, şerî, krîzê ekonomî, şîdetê serê cinîyan de nêvejîyê werte, polîtîkayê eciqnayîşî yê hemverê çapemenîya azade de vistê dewre. No 6 rojî yo xebatkerdoxê çapemenîya azade di nezaret de yê û seba xeberanê xo yenê sûcdarkerdiş.  AKP seba operasyonê teverê sînorî binimno, çapemenî destbend kerd. Di serranê 90yî de hewl dayî çapemenîya azade bi polîtîkayê cîyayî bipelçeqnê. Bi derbeyî KHKyan dir, da-des sazgeyê çapemenîyî padayî. La do bi tu netîceyêke nêfînê dest. Ma verê çapemenîya azade de yê."