WAN - Koma yewin ê Rayîr ra Gemlikî yê Pîlî Wan ra kewte rayîr. Endamê na kome do bi sloganê, "Hemverê sîyasetê tecrîdî seba ma azadî bipawê ma ver bi Gemlikî şinê” rayîr ra şêrê, eşkerayîya çapemenîye danê. 

 

Bi nêzdîyê serrêke yo xebere Raberê PKKyî Abdullah Ocalanî ra nîna girewtiş. Nê ser de 6 sazgeh û partiyê siyasî qerar dayî ke 12ê Hezîrane de ver bi Gemlikê Bûrsayî de rayîr ra şêrê. Do bi sloganê "Hemverê siyasetê tecrîdî seba ma azadîye bipawê ma ver bi Gemlîkî de şinê” rayîr ra şîyayene organîze kerdî. Do rayîr ra şîyayîş bi rayberîya Kongreya Demokratîke ya Şaran (HDK), Kongreya Komela Demokratîke (KCD), Tevgerê Cinîyan ê Azadan (TJA), Partiya Demokratîke ya Şaran (HDP), Partîya Mintiqaya Demokratîke (DBP), MED TUHAD-FED bêro organîzekerdiş. Vernîya rayîr ra şîyayîşî de verê bînaya HDPyî ya Wanî de eşkerayîye ameye dayene.

 

‘Şima do nêeşkê rayîr ra şîyayîşê ma asteng bikerê’

 

Xeylêk kesî beşdarê eşkerayîya pankartê "Hemverê  siyasetê tecrîdî seba ma azadîye bipawê ma ver bi  Gemlikî de rayîr ra şînê” ame akerdiş, bî. Tîya de  ewil Parlamentera HDPyî ya Agirî Dîlan Dîrayet Taşdemîr qisey kerd. Dilane dîyar kerd ke rayîr ra şîyayîşê ke ê wazenê bikerê, xeylê cayan de yeno astengkerdiş û vat: “Şima do nêeşkê bi heme hêzê xo bi dorpêçkerdiş û çekê xo rayîr ra şîyayîşê ma asteng bikerê."

 

‘Heta tecrîd peynî bibo ma do têkoşîn bikerê’

 

Dilane vat, bi 23 serrî yo Îmraliyî de sîstemê tecrîdî esto û wina vat: "No îqtidar bi hawayêk nêheq, bêhuqûqî û bêwijdanî seba berjewendiyê xo tecrîd dewam keno. Tecrîd tena zîndanan de ney, heme  welat esîr girewto. Ewro siyaset, ekonomî û wareyê bîn zî xetimnayê. Rayîrê xelaskerdişê nê krîzan di destê Birêz Ocalanî de yo. Birêz Ocalanî seba  meseleyê kurdî, demokrasî û azadîye têkoşîn keno. Key vengê Îmraliyî abeno, komel boye gêno. Ewro  AKP wazeno ke rayîrê nê çareserî bi şer, operasyon, îşxalkerdiş, konseptê îmha pado. Ma do nêverdê ke  AKP bi rayîrê dişminîyê kurdan de serê lingan de bimano. Ma do her va de hemverê tecrîdî vengê xo berz bikerê û heta tecrîd bişiko ma do têkoşîn bikerê. Ewro her kesê ke dinya de bi fikir û fehmê Birêz Ocalanî zanê vera tecrîdî de vejîyê. Tecrîd sûcê merdimayî yo û şima nêeşkenê nê sucî dewam bikerê.”

 

Rayîr ra şîyayîşê aştî û azadîye

 

 

Dilane vat, rayîr ra şîyayîşê Gemlikî aştî, azadî, cuya têduşt a û vat: "Kesê di şer de israr kenê û wazenê nê rayîr ra şîyayîşî asteng bikerê, ê do vînî bikerê. Şima eşkenê nê rayîr ra şîyayîşî asteng bikerê labelê şima nêeşkenê fikir û têkoşînê şarê ma asteng bikerê."

 

Parlamentera HDPyî ya Wanî Murat Sarisaç, bale ant serê ameyîşê Tayyîp Erdoganî yê Wanî û vat: "Fotografê ke ewro Wan de vejîyayo werte, her çî vano. Hetêk ra fotografê ke ci de şarê ke seba aştî û hizûr Tirkîya bedelan danê yenê astengkerdiş û heto bîn zî fotografê ke ci de heme îmkan ci de seba serekê partî ameyo yeno seferberkerdiş est o. Demo ke ma seba şarê Tirkîya serbikewê, do şer peynî bibo û perêyê kesê ke nan çop ra kom kenê do êdî nêdê guleyan, ma tîya hewl danê vernîya nînan padê. Senîn ke Birêz Ocalan 23 serrî yo hucreyêk de seba aştî û demokrasî xo ver dano, ma zî bi eynî rengî xo ver danê. Ma do heta Gemlîkî rayîr ra şêrê. Seba ke ma zanê çareserî mitîngê Erdoganî ke ewro bêro kerdiş de nîya. Çîyo ke Erdogan bido Wanî çin o. Do şarê Wanî ra vajo fîşekêke çiqas a, qeyûm çîyêko meşrû yo, qetilkerdişê şarî yê Wanî meşrû yo.”

 

Parlamenter Muratî, tewr peyîn wina vat: "Birêz Ocalan tena seba kurdan ney seba cinî, ciwan û şafê bindestan bîyo hêvîyêke. Ewro dewlete hişê xo vînî kerda û hemverê merdiman şer îlan kerda. Birêz Ocalan 23 serrî yo seba ameyoxê nê welatî xo ver dano û ma zî her tim bi hêvî yê. Kurdî tena heqê xo wazenê. Hemverê polîtîkayê şerî yê hukmatî cinî û ciwanî heqê xo wazenê. Yewin rayîrê çareserî Îmrali yo. Ganî Birêz Ocalan azad bibo."

 

Dimayê eşkerayî û çalakîya roniştişî, rayîrşîyayîşê ver  bi Gemlîkî dest pêkerd.